2 SAMUẸLI 7 - BIBLU WIWE LỌ 1923

¹ E sọ wá jọ, whenuena ahọlu tin to owhé etọn gbè, bọ OKLUNỌ ko na gbọjẹ ẹ sọn kẹ̀ntọ etọn lẹpo de lédo,

² wẹ ahọlu dọ hlan Natani yẹwhegán dọ, Pòn dinvie, yẹn tin to ohò kedali tọn de mẹ, ṣigba alki Jiwheyẹwhe tọn tin to avọ̀hò lẹ homẹ.

³ Natani sọ dọ hlan ahọlu dọ, Yì, wà núhe tin to ayiha towe mẹ lẹpo; na OKLUNỌ tin to de we.

⁴ E sọ wá jọ to ozán doponẹ mẹ, wẹ ohó OKLUNỌ tọn wá Natani de, dọmọ,

⁵ Yì bo dọ na Davidi mẹmẹsi ṣie dọ, OKLUNỌ dọ le, Bọ́ hiẹ na dó na mi ohò de na mi nado nọnọ̀ e mẹ?

⁶ Na yẹn ma ko nò ohò de mẹ sọn azán he gbè he yẹn ko hẹn ovi Islaeli tọn lẹ hẹji sọn Egipti wá, yèdọ jẹ egbé he, ṣigba bo ko to zọnlinzin to gohọ̀ de mẹ podọ to oflò de mẹ.

⁷ To ofi lẹpo fiemẹ yẹn ko to zọnlinzin te po ovi Islaeli tọn lẹpo po, bé yẹn dọ ohó de po depope po sọn whẹndo Islaeli tọn lẹ mẹ, mẹhe yẹn degbèna nado nọ yìn Islaeli omẹ ṣie lẹ, dọmọ, Etẹwutu mì ma dó ohọ̀ kedali tọn de na mi?

⁸ Enẹwutu dinvie le hiẹ na dọ hlan Davidi devi ṣie, dọ, Le wẹ OKLUNỌ awhànpa lẹ tọn dọ, Yẹn dè we sọn lẹngbọpa mẹ, sọn lẹngbọ hihodo mẹ, dọ hiẹ nido yín ahọvi to omẹ ṣie lẹ ji, to Islaeli ji:

⁹ Yẹn sọ tin po hiẹ po to fie hiẹ to yìyì lẹpo, bo ko sọ sán kẹ̀ntọ towe lẹpo sọn nukọn towe; yẹn na sọ basi oyín daho de na we, taidi oyín omẹ daho he tin to owẹkẹ mẹ lẹ de tọn.

¹⁰ Yẹn na sọ dè otẹn de na Islaeli omẹ ṣie lẹ, bo na dó yé, na yé nido nọnọ̀ otẹn yetọn titi mẹ, bo ma yín mẹsẹtẹnna ba; mọ ovi ylanwà tọn lẹ ma na bianukunna yé depope ba, di tintan tọn,

¹¹ podọ di sọn azán he gbè yẹn degbèna whẹ̀datọ lẹ nado tin to Islaeli omẹ ṣie lẹ ji; yẹn na sọ hen we nado gbọjẹ sọn kẹ̀ntọ towe lẹ si. Humọ OKLUNỌ dọ na we dọ OKLUNỌ na basi owhé de na we

¹² Whenuena yè sọ hẹn azán towe lẹ pe, bọ hiẹ na damlọn po otọ́ towe lẹ po, yẹn na zé okún towe daga to godo towe, he na tón sọn vidọ̀ towe lẹ mẹ jẹgbonu, yẹn na sọ hẹn ahọludu etọn lódo.

¹³ Ewọ na sọ dó ohò de na oyín ṣie, yẹn na sọ hẹn ofìn ahọludu etọn tọn lódo kakadoi.

¹⁴ Yẹn na yín otọ́ etọn, ewọ na sọ yín visunnu ṣie: eyín ewọ wà ylando, yẹn na yí opò gbẹtọ lẹ tọn do vódo e, po mẹhòba ovi gbẹtọ lẹ tọn tọn lẹ po;

¹⁵ ṣigba lẹblanu ṣie ma to na yìsọn e de gba, dile yẹn dè e sọn Sauli de do, mẹhe yẹn dè sẹ̀ sọn nukọn towe.

¹⁶ Owhé towe po ahọludu towe po yè na hẹn li kakadoi to nukọn towe: yè na hẹn ofìn towe lódo kakadoi.

¹⁷ Kẹdẹdi ohó helẹ pó kẹdẹdi numimọ he lẹpo, mọwẹ Natani dọhó do hlan Davidi.

¹⁸ Whenẹnu wẹ Davidi ahọlu yì whégbe, bo sinai to OKLUNỌ nukọn; ewọ sọ dọmọ, OKLUNỌ Jiwheyẹwhe E, mẹnu yẹn yín, etẹ́ sọ wẹ owhẹ́ ṣie, bọ hiẹ ko do hẹn mi wá dẹ̀n sọ le?

¹⁹ Gãnṣo onú pẹvi de wẹ ehe sọ yín to nukun towe lẹ mẹ, OKLUNỌ Jiwheyẹwhe È; ṣigba hiẹ ko dọhó owhé mẹmẹsi towe tọn tọn ga na osã dindẹn he ja de; podọ ehe ga kẹdẹdi ọwàlọ gbẹtọ lẹ tọn, OKLUNỌ Jiwheyẹwhe E.

²⁰ Eté Davidi sọgan sọ dọ hlan we ba? na hiẹ yón mẹmẹsi towe. OKLUNỌ Jiwheyẹwhe E.

²¹ Na ohó towe tọn wutu, podọ kẹdẹdi ayiha towe lọsu, wẹ hiẹ do basi odaho he lẹpo, nado hẹn mẹmẹsi towe yón ẹn.

²² Enewutu daho wẹ hiẹ, OKLUNỌ Jiwheyẹwhe E: na omẹ de ma tin di we, mọ Jiwheyẹwhe depope ma tin adavo hiẹ, kẹdẹdi ehe mi ko yí otó mìtọn lẹ do sè lẹpo.

²³ Podọ akọta to owẹkẹ mẹ tẹ́ wẹ di omẹ towe lẹ, yèdọ di Islaeli, mẹhe Jiwheyẹwhe yì nado fli hlan ede de na gbẹtọ de, podọ nado basi oyín de nè, podọ nado wà onú daho lẹ na mì, po onú dobu lẹ po na aigba towe, to omẹ towe lẹ nukọn, he hiẹ fli hlan de we sọn Egipti, sọn akọta lẹ de po yẹwhe yetọn lẹ po?

²⁴ Hiẹ sọ hẹn Islaeli omẹ towe lẹ lódo hlan dewe nado yín gbẹtọ lẹ de hlan de we kakadoi; bọ hiẹ, OKLUNỌ, sọ lẹzùn Jiwheyẹwhe yetọn.

²⁵ Podọ dinvie, OKLUNỌ Jiwheyẹwhe È, ohó he hiẹ dọ gbọn mẹmẹsi towe tọn dali, podọ gbọn owhé etọn tọn dali, hiẹ ni hẹn ẹn li kakadoi, bo sọ wà dile hiẹ dọ do

²⁶ Bo gbọ oyín towe ni yín hẹnklo kakadoi, dọmọ, OKLUNỌ awhànpa lẹ tọn wẹ Jiwheyẹwhe to Islaeli ji: owhé Davidi mẹmẹsi towe tọn na yín hẹnlódo to nukọn towe.

²⁷ Na hiẹ, OKLUNỌ awhànpa lẹ tọn È, Jiwheyẹwhe Islaeli tọn, ko dohia hlan mẹmẹsi towe, dọmọ, Yẹn na dó ohò de na we: enẹwutu wẹ mẹmẹsi towe mọ to ayiha etọn mẹ nado hò odó he hlan de we.

²⁸ Podọ dinvie, OKLUNỌ Jiwheyẹwhe È, hiẹ wẹ Jiwheyẹwhe, nugbo wẹ ohó towe lẹ sọ yín, hiẹ ko sọ gblọnadan onú daho he tọn hlan mẹmẹsi towe.

²⁹ Enẹwutu dinvie gbọ é ni hẹnhomẹhùn we nado dona owhó mẹmẹsi towe tọn, dọ é nido nọte kakadoi to nukọn towe: na hiẹ, OKLUNỌ Jiwheyẹwhe È, ko dọ ẹ: bo sọ gbọ yè ni yí odona towe do dona owhé mẹmẹsi towe tọn kakadoi.