2 SAMUẸLI 24 - BIBLU WIWE LỌ 1923

¹ YÈ sọ vọ́ adi OKLUNỌ tọn hẹn jimiyọn do Islaeli ji, é sọ dè Davidi do yé ji, dọmọ, Yì, hia Islaeli po Juda po.

² Ahọlu sọ dọ hlan Joabi awhàngán awhànpa lọ tọn he tin to e de, dọmọ, Yì dinvie godo po nukọn po lédo whẹndo Islaeli tọn lẹ, sọn Dani yèdọ jẹ Beẹl-seba, mì ni bo hia gbẹtọ lẹ, na yẹn nido yọn sọha gbẹtọ lẹ tọn.

³ Joabi sọ dọ hlan ahọlu dọmọ, Dinvie OKLUNỌ Jiwheyẹwhe towe ni dèdogọ́ hlan gbẹtọ, sù sọ depope yé yín, do ogbẹ́ kanweko ji, nukun ahọlu klunọ ṣie tọn lẹ nido sọ mọ ẹn: ṣigba etẹwutu wẹ ahọlu klunọ ṣie yíhomẹhùn to onú he mẹ?

⁴ Ṣogãn ohó ahọlu tọn ṣinyọn Joabi ji, po awhàngán awhànpa lọ tọn lẹ po ji. Joabi po awhàngán awhànpa lọ tọn lẹ po sọ jẹgbonu yì sọn nukọn ahọlu tọn, nado hia gbẹtọ Islaeli tọn lẹ.

⁵ Yé sọ juyì Jọdani gododọ̃n bo dosla do Aloẹli mẹ do adusi wàji tòdaho lọ tọn he tin to ṣẹnṣẹn agbadò Gadi tọn tọn, podọ jẹ Jazeli:

⁶ Whenẹnu wẹ yé wá Gileadi, podọ jẹ aigba Tahtimi-họdṣi tọn ji; yé sọ wá Dani-jaani, podọ lédo pé jẹ Zidoni.

⁷ Bo wá jẹ agbó Tile tọn ji, podọ jẹ tòdaho Hivinu lẹ tọn lẹpo mẹ, podọ Kananinu lẹ tọn lẹ mẹ: yé sọ jẹgbonu yí jẹ hùwàji Juda tọn, to Beẹli-seba.

⁸ Mọwẹ whenuena yé ko yì godo po nukọn po lẹ́do aigba lẹpo, yé wá Jelusalẹm to opòdo osùn sinẹnẹ po azán okò po tọn.

⁹ Joabi sọ yi olẹndopọ hihia omẹ Islaeli tọn lẹ tọn na ahọlu: to Islaeli mẹ sunnusi tudotọ he dọ̀n ohi fọtọ́n fẹnẹ wẹ tin to finẹ; omẹ Juda tọn lẹ yin sunnusi fọtọ́n fowekanweko.

¹⁰ Ayiha Davidi tọn sọ to hihò e to godo he é ko hia gbẹtọ lẹ. Davidi sọ dọ hlan OKLUNỌ dọmọ, Yẹn ko wàylando dahodaho, to ehe yẹn ko wà mẹ: ṣigba dinvie, OKLUNỌ E, yẹn vẹ we, dè ylanwà mẹmẹsi towe tọn sẹ; na yẹn ko yí núlu daho do basi.

¹¹ Whenuena Davidi fọ́ntite to afọnnu, ohó OKLUNỌ tọn wá yẹwhegán Gadi de, numọtọ Davidi tọn, dọmọ,

¹² Yì bo dọhó hlan Davidi dọmọ, Le wẹ OKLUNỌ dọ, dọmọ, Yẹn whle onú atọ́n we; dè na we dopo sọn yé mẹ, na yẹn nido wà hlan we.

¹³ Mọwẹ Gadi wà Davidi de, bo dọ nẹ́, bo dọ hlan ẹn dọmọ, Na owhè ṣinawe huvẹ́ tọn ni wá de we to aigba towe ji? Kavi na hiẹ ni to hinhònyì osùn atọ̀n to mẹslẹtọ towe lẹ nukọn whenuena yé to mọdona we? Kavi na azọ̀nylankan azán atọ̀n tọn ni tin to aigba towe ji? dawe na we lò, bo hẹn gbegblọn he yẹn na hẹngò yì ewọ he do mi hlan de.

¹⁴ Davidi sọ dọ hlan Gadi domọ, Yẹn tin to jinjan daho de mẹ: dinvie gbọ mí ni jai do alọ OKLUNỌ tọn mẹ; na daho wẹ lẹblanu etọn lẹ: a gbọ yẹn jai do alọ gbẹtọ tọn mẹ blo.

¹⁵ Mọwẹ OKLUNỌ do azọ̀nylankan de hlan Islaeli ji sọn afọnnu yèdọ jẹ ojlẹ didè lọ mẹ: gbẹtọ fọtọ́n kandegbàn sọ kú sọn gbẹtọ lẹ mẹ sọn Dani yèdọ jẹ Beẹli-sẹba.

¹⁶ Whenuena angẹli dlẹn alọ etọn tón hlan Jelusalẹm dali nado và ẹ, OKLUNỌ diọlinlẹn nẹ̃ sọn oylan lọ mẹ, bo dọ hlan angẹli lọ he to gbẹtọ lẹ và dọmọ, E tin pekọ́; do alọ towe ote lò. Angẹli OKLUNỌ tọn lọ ko tin to vẹ́nlitẹn Alauna Jẹbusinu tọn dali.

¹⁷ Davidi sọ dọhó hlan OKLUNỌ, whenuena é mọ angẹli he to gbẹtọ lẹ hò lọ, bo dọmọ, Pọn, Yẹn wẹ ko wàylando, yẹn wẹ ko sọ yi tasinsinyẹn do wà: ṣigba lẹngbọ helẹ, etẹ yéwlẹ wà? Yẹn vẹ́ we, gbọ alọ towe, ni tin to ogo e, podọ to owhé otọ́ ṣie tọn go.

¹⁸ To gbènẹgbe Gadi sọ wá Davidi de, bo dọ hlan en dọmọ, Heji yì, té agbà de hlan OKLUNỌ do vẹnlitẹn Alauna Jẹbusinu tọn lọ mẹ.

¹⁹ Davidi sọ hẹaga yì kẹdẹdi didọ Gadi tọn, dile OKLUNỌ degbè do.

²⁰ Alauna sọ pòn gbonu, bo mọ ahọlu po mẹmẹsi etọn lẹ po ja e dali: Alauna sọ tọ̀n jẹgbonu, bo dẹ́ ede to ahọlu nukọn po nukunmẹ etọn po hlan aigba.

²¹ Alauna sọ dọmọ, Etẹwutu wẹ yè hẹn ahọlu klunọ ṣie wá mẹmẹsi etọn de? Davidi sọ dọmọ, Nado họ̀ vẹ̃nlitẹn sọn así we, nado do agbà de hlan OKLUNỌ, na yè nido hẹn azọ̀nylankan dote sọn gbẹtọ lẹ de.

²² Alauna sọ dọ hlan Davidi dọmọ, Gbọ ahọlu klunọ ṣie ni yí bo do nanunina he sọawuhia dagbe hlan ẹn: dayi e go, oyín lẹ na avọ̀ nunina mimẹ̀, vẹnlili nuzinzán le po aṣọdonu oyín lẹ tọn po na naké:

²³ Ehe lẹpo wẹ ahọlu Alauna na hlan ahọlu lọ. Alauna sọ dọ hlan ahọlu dọmọ, OKLUNỌ Jiwheyẹwhe towe ni kẹalọyi we.

²⁴ Ahọlu sọ dọ hlan Alauna dọmọ, Lala; ṣigba yẹn na họ̀ ẹ nugbonugbo sọn así we do ahidona de ji: mọ yẹn ma na na avọ̀ nunina mimẹ̀ lẹ hlan OKLUNỌ Jiwheyẹwhe ṣie he ma na zánkuẹ de mi. Mowẹ Davidi hò vẹ̃nlitẹn lọ po oyín lẹ po na ṣẹkle kandeao fataka tọn.

²⁵ Davidi sọ do agbà de hlan OKLUNỌ, bo na avọ̀ nunina mimẹ̀ lẹ po avọ̀ nunina jijọho tọn lẹ po. Mowẹ yè hẹn OKLUNỌ sevè na aigba lọ, yè sọ hẹn azọ̀nylankan lọ dote sọn Islaeli de.