2 SAMUẸLI 23 - BIBLU WIWE LỌ 1923

¹ DINVIE ehelẹ wẹ ohó agọgbọnẹn Davidi tọn lẹ. Davidi visunnu Jẹsse tọn dọmọ, Podo dawe he yè zetite daga dọmọ, Mẹyíamisisádodè Jiwheyẹwhe Jakobu tọn tọn, Psalm vivinọ Islaeli tọn lọ;

² Gbigbọ OKLUNỌ tọn dọhó gbọn dali ṣie, Ohó etọn sọ tin to odẹ́ ṣie ji.

³ Jiwheyẹwhe; Islaeli tọn dọmọ, Osé Islaeli tọn lọ dọhó hlan mi: Mẹdopo he yí dódó do dùahọlu to gbẹtọ lẹ ji, He dùahọlu to osi Jiwheyẹwhe tọn mẹ,

⁴ Ewọ na tin di hinhọn afọnnu tọn, whenuena owhè zè, Afọnnu de matin aslọ lẹ; Whenuena ogbé kikọ́ tọnkùn sọn aigba mẹ, Gbọn sisẹ́ diun mẹ to jikun godo.

⁵ Nugbonugbo owhe ṣie ma tin to mọ to Jiwheyẹwhe de gba; Gãnṣo ewọ ko basi alẹ̀nù madopodo de po yẹn po, Didoai to onú lẹpo mẹ, bo hẹndò: Na whlẹngan ṣie lẹpo, po ojlo ṣie lẹpo po wẹ, Le é ma tlẹ basi i nado whén gba.

⁶ Ṣigba mẹylankan lẹ na tin popo yé tọn di owùn lẹ nado yín tùntùn hlan, Na yè ma sọgan yí alọ do bẹ́ yé gba:

⁷ Ṣigba yè ma sọgan nọma yí: Gànyũ po alọnupò owhán de tọn po do sọawhànnuna omẹ he doalọ yé go gba.

⁸ Ehelẹ yín oyín omẹ hlọnhlọnnọ lẹ tọn mẹhe Davidi tindo lẹ: Josẹbibasebẹti Takemoninu de, ogán awhàngán lẹ tọn; doponẹ wẹ Adino Ezninu lọ, to alántọsiọ fẹnẹ ji to ojlẹ dopo mẹ.

⁹ To godo ewọ tọn wẹ Eleazali visunnu Dọdai tọn visunnu Ahohinu de tọn, dopo sọn omẹ hlọnhlọnnọ atọ̀n lẹ mẹ po Davidi po, whenuena yé ylọavùn Filistini lẹ he yè bẹ́ plidopọ to finẹ hlan awhànfuntẹn, yè sọ hẹn omẹ Islaeli tọn lẹ yí:

¹⁰ Ewọ sọ tite, bo hò Filistini lẹ kaka alọ etọn do yín kúkú, alọ etọn sọ tẹ́ do ohilọ go: OKLUNỌ sọ basi awhàngba daho de to gbènẹgbe; gbẹtọ lẹ sọ lẹ́gọ̀ hodo e nado dugbànfia sokẹdẹ.

¹¹ To ewọ godo wẹ Samma visunnu Agee Halalinu de tọn te. Yè sọ bé Filistini lẹ pli dopọ do awhan de mẹ, fie oglegbàn daho he gọ́ na ayivi lẹ te; gbẹtọ ewlẹ sọ họ̀nyì sọn Filistini lẹ de.

¹² Ṣigba ewọ site to ogbla glegbàn lọ tọn mẹ, bo whlẹn ẹn dai, bo hù Filistini lẹ: OKLUNỌ sọ basi awhàngba daho de.

¹³ Ogán atọ̀n sọn ogbàn lẹ mẹ sọ̀ jẹte yì, bo wá Davidi de to ojibẹ whenu jẹ aigbaslo Adulami tọn kọ̀n; yè sọ hẹn awhànfuntọ Filistini lẹ tọn lẹ dosla do agbadò Lefaimi tọn mẹ.

¹⁴ Davidi sọ tin to odò lọ mẹ, otowhàn Filistini lẹ tọn sọ tin to Bẹti-lehẹm to whenẹnu.

¹⁵ Davidi sọ to jijlo, bo dọmọ, Ṣó dọ mẹde do na osìn mi nado nù sọn odòtọ Bẹti-lehẹm tọn mẹ, he tin to hòngboji dali!

¹⁶ Dawe hlọnhlọnnọ atọ̀n lẹ sọ dá gbọn awhànpa Filistini lẹ tọn ṣẹnṣẹn, bo dòn osìn sọn odòtọ Bẹti-lehẹm tọn lọ mẹ, he tin to hòngbo lọ ji dali, bo zé e, bo hẹn ẹn wá Davidi de: ṣigba ewọ ma jlo na nù sọn e mẹ gba, ṣigba kòn ẹn jẹgbonu hlan OKLUNỌ.

¹⁷ E sọ dọmọ, OKLUNỌ E, é ni tin dẹn do mi, dọ yẹn ni do wà ehe: yẹn na ka nù ohùn omẹ he yì to owù ogbẹ yetọn lẹ tọn mẹ wẹ? enẹwutu wẹ é ma do jlo na nù in gba. Onú helẹ wẹ omẹ hlọnhlọnnọ atọn lẹ wà.

¹⁸ Abisai, nọvisunnu Joabi tọn, visunnu Zeluia tọn, wẹ ogán omẹ atọ̀n lẹ tọn. E sọ zé owhán etọn daga do omẹ fọdekanweko jì bo hù yé, bo do tindo oyín de to omẹ atọ̀n lẹ ṣẹnṣẹn.

¹⁹ Be ewọ ma yín mẹgbògbéna susu talala to omẹ atọ̀n lẹ mẹ? enẹwutu wẹ yè do yí i do basi awhàngán yetọn: ṣogàn ewọ ma sọ omẹ tintan atọn lẹ gba.

²⁰ Benaia visunnu Jehọiada tọn, visunnu dawe tudotọ Kabzeẹli tọn tọn de, mẹhe ko wà onú dahodaho lẹ, é hù visunnu awe Allẹli Moabi tọn tọn lẹ: é jẹte yì ga bo hù kinnikinni de tò ogbla dògbigbọ de tọn mẹ to ojlẹ ọsìn agonọ tọn mẹ:

²¹ E sọ hù Egiptinu de, omẹ whànpẹnọ de: Egiptinu lọ sọ tindo owhán de to alọ etọn mẹ; ṣigba ewọ jẹte yì e de po alọnupò de po, bo gbì owhán lọ sọn alọ Egiptinu lọ tọn mẹ, bo sọ yí owhán etọn titi do hù i.

²² Onú helẹ wẹ Benaia visunnu Jehọiada tọn wà, bo sọ tindo oyín de to omẹ hlọnhlọnnọ etọ̀n lẹ ṣẹnṣẹn.

²³ Ewọ yín mẹgbògbéna susu hú ogbàn lẹ, ṣigba é ma sọ omẹ tintan atọ̀n lẹ gba. Davidi sọ zé e do ahọluwhàn etọn ji.

²⁴ Asahẹli nọvisunnu Joabi tọn sọ yín dopo to ogbàn lẹ mẹ; Ẹlhanani visunnu Dodo Bẹti-lehẹm tọn tọn;

²⁵ Ṣamma Halodinu lọ, Elika Halodinu lọ;

²⁶ Helẹzi Paltinu lọ, Ila visunnu Ikẹsi Tekoanu lọ tọn;

²⁷ Abiẹzeli Anatotinu lọ, Mẹbunnai Husatinu lọ;

²⁸ Zalmọni Ahohinu lọ, Mahalai Nẹtofatinu lọ;

²⁹ Holẹbi visunnu Baana Nẹtofatinu lọ tọn, Itai visunnu Libai Gibea tọn tọn sọn ovi Bẹnjamini tọn lẹ mẹ;

³⁰ Benaia Pilatoninu de, Hiddai sọn tòpẹsẹ gaasi tọn lẹ mẹ;

³¹ Abialbọni Albatinu lọ, Azmavẹ Balhuminu lọ;

³² Eliahiba Ṣaalbọninu lọ visunnu Jasẹni tọn lẹ, Jonatani;

³³ Samma Halalinu lọ, Ahiami visunnu Salali Alalinu lọ tọn;

³⁴ Elifelẹti visunnu Ahasbai tọn, visunnu Maakatinu lọ tọn, Eliami visunnu Ahitofẹli Giloninu lọ tọn;

³⁵ Hẹzlo Kalmẹlinu lọ, Paalai Albinu lọ;

³⁶ Igali visunnu Natani Zoba tọn tọn, Bani Gadinu lọ;

³⁷ Zelẹki Ammọninu lọ, Nahalai Beẹlotinu lọ, awhàngbajahẹntọ hlan Joabi visunnu Zeluia tọn lẹ;

³⁸ Ila Itlinu lọ, Galẹbi Itlinu lọ;

³⁹ Ulia Hitinu lọ: popolẹpo gbàntónnukunawe.