2 SAMUẸLI 22 - BIBLU WIWE LỌ 1923

¹ DAVIDI sọ dọhó hlan OKLUNỌ ohó ohàn he tọn to azán he gbè OKLUNỌ whlẹn ẹn sọn alọ kẹ̀ntọ etọn lẹpo tọn mẹ, podọ sọn alọ Sauli tọn mẹ:

² Ewọ sọ dọmọ, OKLUNỌ wẹ osé ṣie, podọ figángán ṣie, podọ whlẹntọ ṣie, yèdọ ṣie;

³ Jiwheyẹwhe osé ṣie tọn, ewọ mẹ wẹ yẹn na dotódido te; Awọyínu ṣie, podọ azò whlẹngan ṣie tọn, atọ̀họ he yìaga ṣie, podọ fìbẹ̀tado ṣie; Whlẹnigantọ ṣie, hiẹ whlẹn mi sọn huhlọnnu si.

⁴ Yẹn na to OKLUNỌ ylọ, mẹhe tin jẹhe yè nado nọ pà: Mọwẹ yè na whlẹn mi sọn kẹ̀ntọ ṣie lẹ si.

⁵ Na agbowhẹn okú tọn lẹ léhla mi, Otọ ylankanwiwà tọn hẹn mi sávò.

⁶ Okan kutòmẹ tọn lẹ tin lẹ́do mi: Omọ okú tọn lẹ wá oji e.

⁷ To nukunbibia ṣie mẹ yẹn ylọ OKLUNỌ; Nugbo, yẹn ylọ hlan Jiwheyẹwhe ṣie: Ewọ sè ogbè ṣie sọn tẹmpli etọn me, Awhá ṣie sọ wá biọ otó etọn lẹ mẹ.

⁸ Whenẹnu wẹ aigba whàn bo sisọ, Dòdonu olọn tọn lẹ sẹ́tẹn Yè whàn yé, na ewọ yín homẹgblenọ wutu.

⁹ Azò de hẹaga yì sọn awọntinslo etọn lẹ mẹ, Podọ miyọn sọn onù etọn mẹ to mefiọ: Yè hẹn akán lẹ to miyọn ji gbọn e dali.

¹⁰ E dé olọn lẹ ga, bo jẹte wá; Zinvlu tlitli tin to afọ etọn lẹ glọ.

¹¹ E sọ hó kẹlubi de ji, bo to zinzlọn: Nugbo, yè mọ ẹn to awà jẹhọn tọn lẹ ji.

¹² E yí zinvlu do basi ohòsi lẹ lẹ́do e, Bẹ́pli osìn lẹ tọn, aslọ titli agahomẹ lẹ tọn lẹ.

¹³ To sisẹ́ kọ̀n to nukọn etọn Yè hẹn akán lẹ to miyọnji.

¹⁴ OKLUNỌ yénwán sọn olọn mẹ, Podọ Gigogán do ogbè etọn.

¹⁵ E do ogá lẹ hlan gbonu, bo vúnvún yé; Hinhọ́n, bo gbà yé do.

¹⁶ Whenẹnu wẹ asábọ ohù tọn lẹ sọawuhia Yè dè dodonu aihọn tọn lẹ domé, Gbon owọhe OKLUNỌ tọn dali, To fìnfìn gbọfufu awọntinslo etọn lẹ tọn tọn ji.

¹⁷ E domẹhlan sọn aga, é dè mi; E dọn mi tọ́n sọn osìn susulẹ mẹ;

¹⁸ E whlẹn mi sọn kẹ̀ntọ ṣie hu hlọnnọ si, Sọn yé he gbẹwanna mi lẹ si; Na yé yín hlọnhlọnnọ gbahu na mi.

¹⁹ Yé wá ojie to azán núhamẹ ṣie tọn gbè: Ṣigba OKLUNỌ wẹ mẹzèn ṣie.

²⁰ E hẹn mi jẹgbonu ga biọ otẹn daho de mẹ: E whlẹn mi, na é yí homẹhùn to yẹn mẹ wutu.

²¹ OKLUNỌ nale mi kẹdẹdi dódó ṣie: Kẹdẹdi owiwe alọ ṣie lẹ tọn wẹ é ko nale mi.

²² Na yẹn ko payi aliho OKLUNỌ tọn lẹ go, Bo ma ko yí yìnylan do tọ́nyì sọn Jiwheyẹwhe ṣie de gba.

²³ Na whẹ̀dida etọn lẹpo tin to nukọn ṣie: Podọ na oséndoaì etọn lẹ tọn Yẹn ma tọ́nyì sọn yé mẹ gba.

²⁴ Yẹn yín pipénọ hlan e dali ga, Yẹn sọ whla dẽ sọn ylankanwiwà ṣie mẹ

²⁵ Enẹwutu OKLUNỌ ko nale mi kẹdẹdi dódó ṣie; Kẹdẹdi owiwe ṣie to nukunnumọ etọn mẹ.

²⁶ Hẹ leblanunọ hiẹ na do dewe hia lẹblanunọ. Hẹ omẹ pipé hiẹ na do dewe hia pipé;

²⁷ Hẹ wiwenọ hiẹ na do dewe hia wiweno; Podọ hẹ tasinyẹntọ hiẹ na do dewe hia adingbànnọ.

²⁸ Podọ hiẹ na whlẹn gbẹtọ oyànọ lẹ gán: Ṣigba nukun towe lẹ tin to saklanọ lẹ go, na hiẹ nido hẹn yé wá odò.

²⁹ Na OKLUNỌ wẹ miyọngbán ṣie: Podọ OKLUNỌ na hẹn zinvlu họnun

³⁰ Na gbọn dali towe yẹn họ̀nwezun gbọn awhànfuntọ de ji: Gbọn Jiwheyẹwhe ṣie dali yẹn lọ́nfundòkọ de.

³¹ Na Jiwheyẹwhe tọn, pipé wẹ aliho etọn: Yè whle ohó OKLUNỌ tọn pọ́n; Awòyinu de wẹ ewọ hlan yé mẹpo he dotódido to e mẹ lẹ.

³² Na mẹnu wẹ Jiwheyẹwhe, adavo OKLUNỌ? Podọ mẹnu sọ wẹ osé de, adavo Jiwheyẹwhe mìtọn?

³³ Jiwheyẹwhe wẹfigángán sinsinyẹn ṣie: Ewọ sọ nọ do mẹpipé to aliho etọn mẹ.

³⁴ Ewọ basi afọ etọn lẹ di afọ agbànlin lẹ tọn: Bo sọ zé mi do otẹn ylaga ṣie lẹ ji.

³⁵ E plọn alọ ṣie lẹ nado funawhàn; mọ bọ awà ṣie lẹ dẹ́ ogába gànvẹ̃ tọn de.

³⁶ Hiẹ ko na awọ̀yinu whlẹngan towe tọn mi ga: Jijọ dẹdẹ towe ko hẹn mi zùn daho.

³⁷ Hiẹ ko hẹn afọdidè ṣie lẹ zùn daho to oglọ ṣie, Afọgomẹ ṣie ma sọ whàn.

³⁸ Yẹn ko yàn kẹ̀ntọ ṣie lẹ, bo pla yé; Mọ yẹn ma sọ ló godo kaka yè do gbidi yé.

³⁹ Yẹn ko gbidi yé, bo hò yé lẹ́do, bọ yé ma sọ sọgan fọ́ntite: Nugbo, yè hẹn yé jai to afọ ṣie glọ.

⁴⁰ Na hiẹ ko yí huhlọn do blagbajana mi hlan awhàn lọ: Hiẹ ko sọ zín enẹlẹ he fọ́ntite do oji e lẹ dòdo to oglọ ṣie.

⁴¹ Hiẹ ko hẹn kẹ̀ntọ ṣie lẹ na nègbé kọ̀godo yetọn tọn lẹ hlan mi ga, Na yẹn nido sukún yé he gbẹwanna mi lẹ tọn do

⁴² Yé dawhá, ṣigba mẹde ma tin finẹ nado whlẹngan; Yèdọ hlan OKLUNỌ, ṣigba é ma siọ ye gba.

⁴³ Whenẹnu wẹ yẹn tùn yé pọdọpọdọ di kọgudu aigba tọn, Yẹn zín yé di ogbọ̀n alihogbó lẹ tọn, bo gbàda yé pé.

⁴⁴ Hiẹ ko whlẹn mi sọn avùnhiho omẹ ṣie le tọn lẹ mẹ ga; Hiẹ ko whla mi nado yín nukọntọ akọta lẹ tọn: Gbẹtọ he yẹn ma kó yọnẹn lẹ de na nọ sẹn mi.

⁴⁵ Jonọ lẹ na jó yéde hlan mi: Eyín yé sè linlin ṣie, yé na litaina mi.

⁴⁶ Tuwhẹ́ na li jonọ lẹ, Bo na yí sisọsisọ do tọ́n sọn fiwhiwhla yetọn lẹ mẹ wá.

⁴⁷ OKLUNỌ tin to ogbẹ̀; podọ donanọ osé ṣie yín; Podọ zizédaga Jiwheyẹwhe osé whlẹngan ṣie tọn tọn yín:

⁴⁸ Yèdọ Jiwheyẹwhe he hẹn ahọ́suyi ṣẹ na mi, Bo hẹn gbẹtọ lẹ jẹte wá oglọ ṣie,

⁴⁹ Podọ he hẹn mi jẹgbonu sọn kẹntọ ṣie lẹ de: Nugbo, hiẹ zé mi daga to yé he fọ́ntite do oji e lẹ ji: Hiẹ whlẹn mi sọn dawe adingbànnọ lọ si.

⁵⁰ Enẹwutu yẹn na nọ na opé hlan we OKLUNỌ È, to kosi lẹ ṣẹnṣẹn, Bo na sọ nọ jihàn pipa lẹ hlan oyín towe.

⁵¹ Whlẹngan daho wẹ é na hlan ahọlu etọn: Bo sọ do dagbewanyi hia hlan mẹyíamisisádodè etọn, Hlan Davidi podọ hlan okún etọn kakadoidoi.