2 SAMUẸLI 21 - BIBLU WIWE LỌ 1923

¹ HUVẸ de sọ tin to azán Davidi tọn lẹ mẹ hò owhè atọ̀n, owhè me owhè mẹ; Davidi sọ din nukunmẹ OKLUNỌ tọn. OKLUNỌ sọ dọmọ, E tin na Sauli, podọ na owhé ohùnnọ etọn, na ewọ hù. Gibeọninu lẹ wutu.

² Ahọlu sọ ylọ Gibeọninu lẹ, bo dọ hlan yé; (dinvie Gibeọninu lẹ ma tin to ovi Islaeli tọn lẹ mẹ gba, adavo to pipòtọ Amọlinu lẹ tọn mẹ; ovi Islaeli tọn lẹ ko whle hlan yé: Sauli sọ din nado hù yé to vivẹnu etọn mẹ na ovi Islaeli po Juda po tọn lẹ:)

³ Davidi sọ dọ hlan Gibeọninu lẹ dọmọ, Etẹ́ yẹ́n na wà na mì? podọ etẹ́ yẹn na yí do basi ovẹ́sè, na mì nido dona ogú OKLUNỌ tọn?

⁴ Gibeọninu lẹ sọ dọ hlan ẹn dọmọ, E ma yín whẹhó fataka kavi sika tọn to mí po Sauli po ṣẹnṣẹn, kavi owhé etọn gba; mọ é ma sọ tin na mí nado hù omẹ depope to Islaeli mẹ gba. Ewọ sọ dọmọ, Núhe mìwlẹ na dọ, enẹ wẹ yẹn na wà na mì.

⁵ Yé sọ dọ hlan ahọlu dọmọ, Omẹ he và mí, podọ bo sọ lẹnnu do mí go, dọ yè nido và mí sọn pipò mẹ to agboji Islaeli tọn lẹ depope mẹ,

⁶ Gbọ yè ni jó sunnusi ṣinawe hlan mí sọn visunnu etọn lẹ mẹ, míwlẹ na sọ zé yé pla aga hlan OKLUNỌ to Gibea Sauli tọn mẹ, mẹdidè OKLUNỌ tọn. Ahọlu sọ dọmọ, Yẹn na jó yé.

⁷ Ṣigba ahọlu whlẹn Mẹfibosẹti, visunnu Jonatani tọn visunnu Sauli tọn, na whiwhle OKLUNỌ tọn he tin to yé ṣẹnṣẹn wutu, to Davidi po Jonatani visunnu Sauli tọn po ṣẹnṣẹn

⁸ Ṣigba ahọlu bẹ́ visunnu awe Lizpa viyọnnu Aia tọn tọn pẹ, he é ji hlan Sauli, Almọni po Mẹfibosẹti po; po visunnu atón Mikali viyọnnu Sauli tọn tọn lẹ po, he é ji hlan Adliẹli visunnu Balzilai Mẹholatinu tọn:

⁹ Ewọ sọ jó yé do alọ Gibeọninu lẹ tọn lẹ mẹ, yé sọ zé yé pla do osé lọ mẹ to OKLUNỌ nukọn, yé sọ flẹ yé omẹ ṣinawe lẹ dopọ: yè sọ hù yé to azán jibó tọn lẹ mẹ, to azán tintan lẹ gbè, to bibẹ bibẹ whenu ojibé bale tọn.

¹⁰ Lizpa viyọnnu Aia tọn sọ yí odévò, bo tó ẹ nẹ̃ to osé ji, sọn saunẹaun ojibé tọn kaka yè do kòn osìn do yé ji sọn olọn; é ma sọ dikẽna ohó aga tọn lẹ nado jó do yé ji to okle, kavi kanlin danji tọn lẹ to ozánmẹ.

¹¹ Yè sọ dọ na Davidi núhe Lizpa viyọnnu Aia tọn, yọnnuyiyi Sauli tọn, ko wà

¹² Davidi sọ yì bo bé ohú Sauli tọn lẹ po ohú Jonatani visunnu etọn tọn lẹ po sọn omẹ Jabẹsi-gileadi tọn lẹ si, ye ko fìn yé sọn aligbo Bẹti-sani tọn ji, fie Filistini lẹ ko zé yé pla do, to azán he gbè Filistini lẹ hù Sauli to Gilboa mẹ:

¹³ E sọ hẹn ohú Sauli tọn lẹ po ohú Jonatani visunnu etọn tọn lẹ po heji sọn finẹ wá; yé sọ bẹ́ ohú yé he yè zé pla aga lẹ tọn plidopọ.

¹⁴ Yé sọ̀ di ohú Sauli po Jonatani visunnu etọn tọn lẹ po do otò Bẹnjamini tọn mẹ to Zela mẹ, do olidò Kisi otọ́ etọn tọn mẹ: yé sọ yí ehe ahọlu degbèna lẹpo wà. To enẹ godo yè vọ́ Jiwheyẹwhe na aigba lọ.

¹⁵ Filistini lẹ sọ vó awhàn tindo po Islaeli po; Davidi sọ jẹte yì po mẹmẹsi etọn lẹ po po e po, bo funawhàn hẹ Filistini lẹ: Davidi sọ lẹzùn nudikọnanọ.

¹⁶ Isibi-benọbi, he tin sọn visunnu gbẹtọkúngbonọ lẹ tọn mẹ, ojlẹ owhán mẹhetọn tọn yín ṣẹkle gànvẽ tọn fọdekanweko to pinpẹ̀n mẹ, yè yí ohi yọ́yọ́ de bla na, he yè lẹn nado ko hù Davidi.

¹⁷ Ṣigba Abisai visunnu Zeluia tọn gọalọ nẹ́, bo hò Filistini lọ, bo hù i. Whenẹnu wẹ omẹ Davidi tọn lẹ whle hlan ẹn, dọmọ Hiẹ ma na sọ tọ́n yì awhàn po mí po ba gba, dọ hiẹ ṣi miyọngbán Islaeli tọn blo.

¹⁸ E sọ wá jọ to ehe godo, bọ awhàn sọ vọ́ tin po Filistini lẹ po to Gọbi: whenẹnu wẹ Sibẹkai Husatinu lọ hù Safi, he tin sọn visunnu gbẹtọkúngbonọ lọ tọn lẹ mẹ.

¹⁹ Awhàn sọ vó tin po Filistini lẹ po to Gọbi; Ẹlhanani visunnu Jaaleọlegimi Bẹti-lehẹminu lọ sọ hù Goliati Gitinu lọ, owhán alọnupò mẹhetọn tọn tin di opọ́ntin avọ̀lọ́ntọ de tọn.

²⁰ Awhàn sọ vọ́ tin to Gati, fie dawe kiklo daho tọn de te, he tindo alọviyẹyẹ ṣidopo to alọ awe lẹpo go, podọ afọviyẹyẹ ṣidopo to afọ awe lẹpo go, konukunẹnẹ to osọha mẹ; ewọ ga yín jiji hlan gbẹtọkúngbonọ lọ.

²¹ Whenuena ewọ to avùnylọ Islaeli, Jonatani visunnu Ṣimei tọn nọvisunnu Davidi tọn hù i.

²² Omẹ ẹnẹ helẹ yín jiji hlan gbẹtọkúngbonọ lọ to Gati mẹ; ye sọ jai gbọn alọ Davidi tọn dali, podọ gbọn alọ mẹmẹsi etọn lẹ tọn dali.