2 SAMUẸLI 20 - BIBLU WIWE LỌ 1923

¹ OMẸ Beliali tọn de dúkosọ nado tin to fine, oyín mẹhetọn yín Ṣeba, visunnu Bikli tọn, Bẹnjamininu de: ewọ sọ kún opẹ́n lọ, bo dọmọ, Míwlẹ ma tindo mimá de to Davidi mẹ gba, mọ mí ma sọ tindo ogú de to visunnú Jẹsse tọn mẹ: omẹ dopodopo hlan gohọ̀ etọn mẹ, mì Islaeli emi,

² Mowẹ omẹ islaeli tọn lẹpo hẹaga yì sọn Davidi hihodo mẹ, bo to hihodo Seba visunnu Bikli tọn; aigba omẹ Juda tọn lẹ sọ klan hlan ahọlu yetọn de, sọn Jọdani yèdọ jẹ Jelusalẹm.

³ Davidi sọ wá owhé etọn gbè to Jelusalẹm; ahọlu sọ bé yọnnu ao. Yọnnuyiyí etọn lẹ, mẹhe é pòdai nado pọ́n whégbè go lẹ, bo bẹ́ yé do síngbo mẹ, bo yi núdùdù do wleawuna yé, ṣigba bo ma sọ biọ whégbè yì yé de gba. Mowẹ yè glọn yé do jẹ azán okú yetọn tọn gbè, ninò asúsiọsiten mẹ.

⁴ Whenẹnu wẹ ahọlu dọ hlan Amasa dọmọ, Ylọ omẹ Juda tọn lẹ plidopọ na mi to azán atọ̀n mẹ, hiẹ ni sọ tin to ofìle.

⁵ Mọwẹ Amasa yì nado ylọ omẹ Juda tọn lẹ plidopọ: ṣigba ewọ dòngbàn dẹn hú ojlẹ didè he ewọ dè nẹ

⁶ Davidi sọ dọ hlan Abisai dọmọ, Dinvie Seba visunnu Bikli tọn na wà danu hẹ mí hú ehe Absalọmi wà: bé mẹmẹsi klunọ towe tọn lẹ, bo domọ nẹ̃ to godo, ewọ niká jẹ́ tòdaho dokónọ lẹ mẹ, bo hòngán nukun mìtọn mẹ.

⁷ Omẹ Joabi tọn lẹ de sọ tón yì to godo nẹ̃, po Kẹlẹtìnu lẹ po po Pẹlẹtinu lẹ po, po omẹ huhlọnnọ lẹpo po: yé tón yì sọn Jelusalẹm, nado domọna Seba visunnu Bikli tọn to godo.

⁸ Whenuena yé tin to zannu daho lọ kón ehe tin to Gibeoni mẹ, Amasa wá nado pé yé. Yè sọ yí awu awhàn tọn etọn he tin to e go do blahomẹ na Joabi, yè sọ gbàn homẹbla po ohi de po do e ji to alinkan etọn to apà etọn mẹ; le é to yìyì é flẹ sọn apà mẹ.

⁹ Joabi sọ dọ hlan Amasa dọmọ, Be é yín dagbe to de we, nọvisunnu ṣie? Joabi sọ yí alọ adusi etọn do hẹn ogbì Amasa tọn go nado donùnùgo nẹ̃.

¹⁰ Ṣigba Amasa ma payi de do ohi he tin to alọ Joabi tọn mẹ go gba: mọwẹ é yí i do hò e sọn hoto, bo kọ̀n adọ̀ etọn tọ́n aigba, bo ma sọ vó nuli i ba; ewọ sọ kú. Joabi po Abisai nọvisunnu etọn po sọ domọna Ṣeba visunnu Bikli tọn to godo.

¹¹ Ode sọn yọ̀pọ sunnu Joabi tọn lẹ mẹ sọ ṣite to e dali, bo dọmọ, Ewọ he jòawu Joabi, po ewọ he tin na Davidi po, gbọ é ni hodo Joabi.

¹² Amasa sọ mlọnai to sùho to ohùn etọn mẹ to gblagbla alihogbo tọn mẹ. Whenuena dawe lọ mọ dọ gbẹtọ lẹpo ṣite abọẹ, é hẹn Amasa tón sọn gblagbla alihogbo lọ tọn mẹ biọ danji, bo dlẹn awu de do e ji, whenuena é mọ dọ omẹ he wá e dali lẹpo site abọẹ.

¹³ Whenuena yè diọtẹn nẹ̃ sọn alihogbo ji, gbẹtọ lẹpo to yìyì to Joabi godo, nado domọna Ṣeba visunnu Bikli tọn to godo.

¹⁴ Ewọ sọ gbọn whẹndo Islaeli tọn lẹpo me yì lẹ́do jẹ Abẹli, podọ jẹ Bẹti-maaka, po Belitinu lẹpo po: yè sọ bẹ́ yé pli dopọ, bo sọ to yìyì ga to ewọ godo.

¹⁵ Yé sọ wá bo glọnalina ẹn to Abẹli Bẹti-maaka tọn mẹ, yé sọ dlan osé de daga pannukọn tòdaho lọ, é sọ ṣitẹ pannukọn agbó lọ: omẹ he tin to Joabi de lẹpo to nuli adó lọ wunklẹnwunklẹn, nado họ́ ẹ liai.

¹⁶ Whenẹnu wẹ nawe nuyọnẹnnọ de dawhá tọn sọn tòdaho lọ mẹ dọmọ, Sè, sè; yẹn vẹ̀ mì, dọ hlan Joabi dọmọ, Wá sẹpọ́ file, na yẹn nido dọhó hẹ we.

¹⁷ Ewọ sọ wá sẹpọ́ hlan e de; nawe lọ sọ dọmọ, Hiẹ wẹ Joabi? Ewọ sọ gblọn dọ, Yẹn wẹ. Whenẹnu wẹ é dọ hlan ẹn dọmọ, Sè ohó deviyọnnu towe tọn lẹ. Ewọ sọ gblọn dọ, Yẹn to sisè.

¹⁸ Whenẹnu wẹ é dọhó, dọmọ, Yé yín asànọ nado nọ dọhó to hóhó whenu, dọmọ, Yé na nọ kàn hónamẹ biọ to Abẹli dodo: mọ yé dotana whẹhó lọ do.

¹⁹ Yẹn tin sọn yé he yín jijọhonọ po dódonọ lẹ po mẹ to Islaeli mẹ: hiẹ to dindin nado và tòdaho de po onọ de po to Islaeli mẹ: etẹwutu wẹ hiẹ na zé ogú OKLUNỌ tọn mì?

²⁰ Joabi sọ gblọn bo dọmọ, E ni tin dẹn, é ni tin dẹn sọn dẽ, bọ yẹn na do zé mì kavi và.

²¹ Whóhé lọ ma yín mọ gba: ṣigba dawe de sọn otò okọta Eflaimi tọn mẹ, ṣeba visunnu Bikli tọn gbọn oyín dali, wẹ ko zé alọ etọn daga do ahọlu ji, yèdọ do Davidi ji: mì jó ewọ kẹdẹ, yẹn na sọ fọ́nyì sọn tòdaho lọ de. Nawe lọ sọ dọ hlan Joabi dọmọ, Dayi e go, yè na zé ota etọn dlan hlan we to adó ji.

²² Whenẹnu wẹ nawe lọ yì gbẹtọ lẹpo de to nuyọnẹn etọn mẹ. Yé sọ sán ota Ṣeba visunnu Bikli tọn tọn sẹ́, bo zé e dlan gbonu hlan Joabi. Ewọ sọ kún opẹ́n lọ, yè sọ kija yé sọn tòdaho lọ kòn, omẹ dopodopo hlan gohọ́ etọn mẹ. Joabi sọ légọ́ do Jelusalẹm do ahọlu de.

²³ Dinvie Joabi tin to awhànpa Islaeli tọn lẹpo ji: Benaia visunnu Jehọiada tọn tin to Kẹlẹtinu lẹ ji podọ to Pẹlẹtinu lẹ ji:

²⁴ Adọlami tin to otokuẹ ji: Jehọṣafati visunnu Ahiludi tọn yín tòwekàntọ.

²⁵ Seva yín wékantọ: Zadọki po Abiatali po yín yẹwhenọ lẹ.

²⁶ Ila ga Jailinu lọ sọ yín yẹwhenọ hlan Davidi.