2 SAMUẸLI 15 - BIBLU WIWE LỌ 1923

¹ E sọ wá jọ to onú he godo, wẹ Absalọmi wleawu kẹkẹ de tọn po osé lẹ po, po gbẹtọ kandeao po nado họnwezun to e nukọn.

² Absalọmi sọ tite to afọnnufu, bo ṣite to adà aliho hòngbo tọn tó: e sọ yín mọ, dọ whenuena omẹ de ko tindo owhé de he do wá ahọlu de na whẹ̀dida, whenẹnu Absalọmi nọ ylọ hlan ẹn, bo nọ dọmọ, Sọn todaho té mẹ hiẹ te? Ewọ sọ nọ dọmọ, Memẹsi towe tin sọn dopo whẹ́ndo Islaeli tọn lẹ mẹ.

³ Absalọmi sọ nọ dọ hlan ẹn dọ, Pọ́n, whẹ̀ho towe lẹ yín dagbe po jijlọ po; ṣigba omẹ whẹ́yídomẹjitọ de ma tin sọn ahọlu de nado sè we gba.

⁴ Absalọmi sọ nọ dọ dogóhumọ dọmọ, Ṣó dọ yè yi mi do basi whẹ̀datọ to aigba lọ ji, bọ omẹ he tindo owhẹ́ depope lẹpo na do wá dẽ, bọ yẹn na do wà dódo nẹ̃!

⁵ E sọ yín mọ, dọ whenuena omẹ depope wá sẹpọ́ nado kanwhébiọ nẹ̃, e nọ dè alọ etọn jẹgbonu, bo hẹn e go, bo donùnùgo nẹ̃.

⁶ Ehe hunkọ wẹ Absalọmi wà hlan Islaeli lẹpo he wá ahọlu de na whẹ̀dida: mọwẹ Absalọmi tìn ayiha omẹ Islaeli tọn tọn lẹ.

⁷ E sọ wá jọ to opodo owhe kande tọn, wẹ Absalọmi dọ hlan ahọlu dọmọ, Yẹn vẹ́ we, gbọ yẹn ni yì bo dèpà ṣie to Heblọni ehe yẹn dọ hlan OKLUNỌ.

⁸ Na mẹmẹsi towe ko dopà de whenuena yẹn tin to Gẹsuli to Silia mẹ, dọmọ, Eyín OKLUNỌ nugbonugbo na sọ hẹn mi wá Jelusalẹm, be whenẹnu yẹn na nọ sẹ́n OKLUNỌ.

⁹ Ahọlu sọ dọ hlan ẹn dọmọ, Yì jijọho mẹ. Mọwẹ ewọ tite bo yì Heblọni mẹ.

¹⁰ Ṣigba Absalọmi do amẹ́ lẹ hlan whẹndo Islaeli tọn lẹpo mẹ lédo, dọmọ, Le mì sè ogbè opẹ́n tọn ṣaun, whenẹnu wẹ mì na dọmọ, Absalọmi yín ahọlu to Heblọni mẹ.

¹¹ Sunnusi fọde po Absalọmi po sọ tón yì sọn Jelusalẹm, he yè ylọ, bo yì to mayọndẽ yetọn mẹ; yé ma sọ yón onú depope.

¹² Absalọmi sọ domẹhlan na Ahitofẹli Gilọninu lọ, hónamẹtọ Davidi tọn, sọn tòdaho etọn mẹ, yèdọ sọn Gilohi, whenuena ewọ to avọ́sánnu lẹ na. Núbibla lọ tin huhlọn; na gbẹtọ lẹ to susudeji to Absalọmi de tẹ́gbẹ.

¹³ Mẹdagun de sọ wá Davidi de, dọmọ, Jayiha omẹ Islaeli tọn lẹ tọn tin to Absalọmi godo.

¹⁴ Davidi sọ dọ hlan mẹmẹsi etọn lẹpo he tin to e de to Jelusalẹm, dọmọ, Tite, bo gbọ mí ni họ̀nyì; na é glomọ́ ode mìtọn ma na họ̀ngán sọn Absalọmi de gba: mì yawu nado fọ́nyì, ewọ niká gbòmọna mí teji, bo hẹn oylan wá mí ji, bo yí onù ohi ton do hò tòdaho lọ.

¹⁵ Memẹsi ahọlu tọn lẹ sọ dọ hlan ahọlu dọmọ, Dayi e go, mẹmẹsi towe lẹ yín awuwletọ nado wà nudepope ahọlu klunọ ṣie na dè.

¹⁶ Ahọlu sọ tón yì, po whégbètọ etọn lẹpo po to godo nẹ. Ahọlu sọ po yọnnu ao dai, he yín yọnnuyiyi lẹ, nado pọ́n whégbè go.

¹⁷ Ahọlu sọ tón yì po gbẹtọ lẹpo po to godo nẹ̃; yé sọ dọ̀ngbàn to Betimẹlhaki mẹ.

¹⁸ Mẹmẹsi etọn lẹpo sọ ju jei to adà etọn mẹ; Kẹlẹtinu lẹpo, po Pẹlẹtinu lẹpo po, po Gitinu lẹpo po, sunnusi nuọntọ̀n he domọna ẹn wá sọn Gati, ju jei to ahọlu nukọn.

¹⁹ Whenẹnu wẹ ahọlu dọ hlan Itai Gitinu lọ dọmọ, Etẹwutu wẹ hiẹ ga hodo mí jei? lẹ́, bo nò ahọlu de: na jonọ de wẹ hiẹ, podọ ga gbéjinu de; lé do otẹn towe titi mẹ.

²⁰ Osọ̀ fi wẹ hiẹ wá, yẹn ni sọ hẹn we to egbé to oji yì to odò yì po mí po, mimọ yẹn jei fie yẹn pla? hiẹ ni lé, bo plan mẹmẹsunnu towe lẹ yì; lẹblanu po nugbo po ni tin to de we.

²¹ Itai sọ gblọnna ahọlu, bo dọmọ, Le OKLUNỌ to ogbẹ́, podọ le ahọlu klunọ ṣie sọ to ogbẹ́, nugbonugbo otẹn fie me ahọlu klunọ ṣie na te, eyín na okú kavi na ogbẹ́, yèdọ finẹ ga wẹ mẹmẹsi towe na te.

²² Davidi sọ dọ hlan Itai dọmọ, Yì bo juyì gododọ̃n. Itai Gitinu lọ sọ juyì gododọ̃n, po omẹ etọn lẹpo po, po omẹ flinflin he tin to e de lẹpo po.

²³ Otò lẹpo sọ yí ogbè lélé de do to avivi, gbẹtọ lẹpo sọ juyì gododọ̃n: ahọlu lọsu ga sọ juyì tòpẹsẹ Eidlọni gododọ̃n, gbẹtọ lẹpo sọ juyì gododọ̃n, hlan aliho zùngbomẹ tọn dali.

²⁴ Bo, pọ́n, Zadọki wá ga, po Levinu lẹpo po po e po, hẹn alki alẹ̀nù Jiwheyẹwhe tọn tọn; yé sọ zé alki Jiwheyẹwhe tọn lọ dai, Abiatali sọ yì aga, kaka gbẹtọ lẹpo ko do basi jujuyì pó tọn sọn tòdaho lọ mẹ.

²⁵ Ahọlu sọ dọ hlan Zadọki dọmọ, Hẹn alki Jiwheyẹwhe tọn lọ gọ̀ yì tòdaho mẹ: eyín yẹn na mọ nukundagbe to nukun OKLUNỌ tọn lọ mẹ, ewọ na sọ hẹn mi wá, bo do e hia mi, po fininó etọn po:

²⁶ Ṣigba eyín ewọ dọ le dọmọ, Yen ma tindo homẹhùn de to hiẹ mẹ gba? dayi é go, yẹn tin to ofi, gbọ é ni wà hlan mi le é sọawuhia dagbe: hlan ẹn do.

²⁷ Ahọlu sọ dọ ga hlan Zadọki yẹwhenọ dọmọ, Hiẹ ma ka yín númọtọ? le biọ tòdaho lọ mẹ to jijọho mẹ, po visunnu towe awe lẹ po po hiẹ po, Ahimaazi visunnu towe po Jonatani visunnu Abiatali tọn po.

²⁸ Pọ́n, yẹn na dòngbàn to tòpẹsẹ zùngbomẹ tọn tó, kaka ohó do sọn mì de wá nado dọ na mi.

²⁹ Enẹwutu Zadọki po Abiatali po sọ hẹn alki Jiwheyẹwhe tọn lọ yì Jelusalẹm: yé sọ nọ̀ finẹ.

³⁰ Davidi sọ yì aga gbọn jeiaga osé Olivieli tọn lẹ dali, bo to avivi le é to aga hẹ́ jei; é tindo ota etọn ṣinyọnnúdo, bo zọ́n afọvó jei; gbẹtọ he tin to e de lẹpo omẹ dopodopo ṣinyọnnu ota etọn, yé hẹ́ji yì, bo to avivi le yé to jihẹ jei.

³¹ Omẹde sọ dọ na Davidi, dọmọ, Ahitofẹli tin to núblatọ lẹ ṣẹnṣẹn hẹ Absalọmi, Davidi sọ dọmọ, Yẹn vẹ́ we, OKLUNỌ, diọ hónamẹ Ahitofẹli tọn do ylando mẹ.

³² E sọ wá jọ, dọ whenuena yè hẹn Davidi wá adàdànu jeiaga fie yè nọ litaina Jiwheyẹwhe te tọn, dayi e go, Huṣai Alkinu lọ wá nado pé e po agawu etọn po tintlẹn, po kọ́gudu po to ota etọn:

³³ Davidi sọ dọ hlan ẹn dọmọ, Eyín hiẹ juyì po yẹn po, whenẹnu hiẹ na yín agbàn de hlan mì:

³⁴ Ṣigba eyín hiẹ gọ̀ do tòdaho mẹ, bo dọ hlan Absalọmi dọmọ, Ahọlu, yẹn na yín mẹmẹsi towe; dile yẹn ko yín mẹmẹsi otọ́ towe tọn do to ojlẹ hóhó mẹ, mọwẹ yẹn na yín mẹmẹsi towe dinvie do: whenẹnu hiẹ na gbleawhàn hónamẹ Ahitofẹli tọn na mi.

³⁵ Hiẹ ma ka tindo Zadọki po Abiatali po yẹwhenọ lẹ to finẹ po hiẹ po? enẹwutu é na yín, dọ onú depope hiẹ na sè sọn owhó ahọlu lọ tọn gbè, hiẹ na dọ ẹ hlan Zadọki po Abiatali po yẹwhenọ lẹ po.

³⁶ Dayi e go, yé tindo visunnu yetọn awe lẹ to yé de to finẹ, Ahamaazi visunnu Zadọki tọn, po Jonatani visunnu Abiatali tọn po; gbọn yé dali wẹ mì na nọ dọhlan mì onú he mìna sè lẹ depope.

³⁷ Mowẹ Huṣai họ́ntọn Davidi tọn biọ tòdaho lọ mẹ wá; Absalọmi sọ biọ Jelusalẹm mẹ wá.