2 SAMUẸLI 14 - BIBLU WIWE LỌ 1923

¹ DINVIE Joabi visunnu Zeluia tọn mọ dọ ayiha ahọlu tọn tin hlan Absalọmi dali.

² Joabi sọ domẹhlan Tekoa, bo hẹn nawe, nuyọnẹntọ de sọn dọ̃n, bo dọ hlan ẹn dọmọ, Yẹn vẹ̀ we, basi devie nado yín awublatọ de, bo yí avọ̀ họ̀nmẹ tọn do ogo, yẹn vẹ we, a yi amisisá do sánú na dewe blo, ṣigba tin di yọnnusi de he ko to awubla to ojlẹ dindẹn de mẹ na osiọ:

³ Bo biọ whégbe yì ahọlu de, bo dọhó hunkọ he hlan ẹn. Mọwẹ Joabi yí ohó lẹ do onù etọn mẹ.

⁴ Whenuena nawe Tekoa tọn lọ to hódo hlan ahọlu, é ṣinyọn nukunmẹ etọn ji hlan aigba, bo kanwhébiọ, bo dọmọ, Ahọlu E, gọalọ.

⁵ Ahọlu sọ dọ hlan ẹn dọmọ, Eté wẹ wiwà we? Ewọ sọ gblọn dọ, Sọn nugbo de mẹ yọnnu asúṣiọsi de wẹ yẹn, asú ṣie yín osiọ.

⁶ Deviyọnnu towe sọ tindo visunnu awe, Yé omẹ awe lẹ nọpọ pláhi to danji, mẹde ma sọ tin to finẹ nado da yé, ode lọ hò awetọ, bo hù i.

⁷ Bo, dayi e go, whédo pete wẹ yè hẹn tite do deviyọnnu towe ji, yé sọ dọmọ, Jó ewọ he hò nọvisunnu etọn na mí nido hù i na ogbẹ nọvisunnu etọn he é hù tọn, mọ bo sọ và whẹ́dutọ lọ ga: le wẹ yé na si akán ṣie he yè pòdai, bo ma na jódo hlan asú ṣie oyín kavi pipòtọ do nukunmẹ aigba tọn ji gba.

⁸ Ahọlu sọ dọ hlan nawe lọ dọmọ, Yì owhé towe gbè, yẹn na naṣẹ gbọn towe tọn dali.

⁹ Nawe Tekoa ṣọn lọ sọ dọ hlan ahọlu dpmọ, Ahọlu È, klunọ ṣie, ylanwà lọ ni tin to oji e, podọ to owhé otọ ṣie tọn ji: ahọlu po ofìn etọn po yín matinwhẹgbledo.

¹⁰ Ahọlu sọ dọmọ, Medepope he dọ núde hlan we, hẹn ẹn wá dẽ, ewọ ma to na sọ doalọ ogo we ba.

¹¹ Whenẹnu we é domọ, Yẹn vẹ we, gbọ ahọlu ni flin OKLUNỌ Jiwheyẹwhe tọwe, na ahọsuyítọ ohùn tọn vàmẹ ba blo, yé niká và visunnu towe. Ewọ sọ dọmọ, Le OKLUNỌ to ogbẹ, odà visunnu towe tọn dopo ma na flẹjẹ aigba gba.

¹² Whenẹnu wẹ nawe lọ dọmọ, Yẹn vẹ̀ we, gbọ deviyọnnu towe ni dọhó hlan klunọ ṣie ahọlu. Ewọ sọ dọmọ, To didọ zọnmí.

¹³ Nawe lọ sọ dọmọ, Etẹwutu wẹ hiẹ dawa onú mọnkọ de do omẹ Jiwheyẹwhe tọn lẹ go? na to didọ ohó he mẹ ahọlu tin di ode he yín whẹ̀gbledonọ, to ehe mẹ bọ ahọlu ma sọ plan omẹ yàndogbé eton gẹ wá whégbe gba.

¹⁴ Na mí ma nanọma kú gba, bo sọ tin di osìn túntún do aigba ji, he yè ma sọgan sọ bépli; mọ Jiwheyẹwhe ma dè ogbè sẹ gba, ṣigba dowé ali lẹ tọn, na ewọ he yè yàndogbé yín mẹzédlan de sọn e de blo.

¹⁵ Enẹwutu dinvie, mimọ dọ yè hẹn mi wá nado dọhó he hlan ahọlu klunọ ṣie, é yín na gbẹtọ lẹ ko hẹn mi savo wutu wẹ: bọ deviyọnnu towe dọmọ, Yẹn na dọhó dinvie hlan ahọlu; é sọgan yín dọ ahọlu na yí ojlo mẹmẹsi etọn tọn basi.

¹⁶ Na ahọlu na sè, nado whlẹn mẹmẹsi etọn sọn alọ omẹ he jlo na và mi lọ tọn mẹ po visunnu ṣie po dopo tọ́n sọn ogú Jiwheyẹwhe tọn mẹ.

¹⁷ Whenẹnu wẹ deviyọnnu towe do dọmọ, Yẹn vẹ we, gbọ ohó ahọlu klunọ ṣie tọn ni yín homẹmiọn tọn: na di angẹli Jiwheyẹwhe tọn de, mọwẹ ahọlu klunọ ṣie yín nado yọ́n dagbe po oylan po: OKLUNỌ Jiwheyẹwhe towe ni tin to de we.

¹⁸ Whenẹnu wẹ ahọlu gblọn bo dọ hlan nawe lọ dọmọ, Yẹn vè we, a sọwhla do mi blo, núde he yẹn na biọ we Nawe lọ sọ dọmọ, Gbọ ahọlu klunọ ṣie ni dọhó lò.

¹⁹ Ahọlu sọ dọmọ, Alọ Joabi tọn tin he we to ehe lẹpo mẹ? Nawe lọ sọ gblọn bo dọmọ, Le alindọn towe to ogbẹ, ahọlu klunọ ṣie, núde ma sọgan lẹ́ hlan alọ adusi dali kavi hlan amiyọn sọn onú he ahọlu klunọ ṣie ko dọ mẹ gba: na Joabi mẹmẹsi towe, ewọ wẹ degbèna mi, ewọ wẹ sọ yí ohó helẹ do onù deviyọnnu towe tọn mẹ:

²⁰ Nado diọ nukunmẹ owhẹhó lọ tọn wẹ Joabi mẹmẹsi towe do wà onú he: klunọ ṣie sọ yin nuyọnẹnnọ, kẹdẹdi nuyọnẹn angẹli Jiwheyẹwhe tọn tọn de, nado yọn onú lẹpo he tin to aihọn mẹ,

²¹ Ahọlu sọ dọ hlan Joabi dọmọ, Dayi e go dinvie, yẹn ko wà onú he: enẹwutu yi, sọ hẹn Absalọmi yọ̀pọ sunnu lọ wá.

²² Joabi sọ ṣinyọn aigba to nukunmẹ etọn ji, bo kanwhébiọ, bo dona ahọlu: Joabi sọ dọmọ, Egbé wẹ mẹmẹsi towe yọnẹn dọ yẹn mọ nukundagbe to nukun towe mẹ, ahọlu klunọ ṣie, to ehe mẹ bọ ahọlu ko yí ojlo mẹmẹsi etọn tọn basi.

²³ Mọwẹ Joabi tite bo yì Gẹsuli, bo hẹn Absalọmi wá Jelusalẹm.

²⁴ Ahọlu sọ dọmọ, Gbọ ewọ ni lẹ́ hlan owhé etọn titi gbè, ṣigba a dike é mọ nukunmẹ ṣie blo. Mowẹ Absalọmi lẹ́ hlan owhé etọn titi gbè, bo ma mọ nukunmẹ otọ́ etọn tọn gba.

²⁵ Dinvie to Islaeli lẹpo mẹ mẹde ma tin nado yín pipa susu sọmọ di Absalọmi na owhànpẹ etọn: sọn afọgbẹn afọ etọn tọn yèdọ jẹ ahọndomẹ ota etọn tọn dèhlan de ma tin to ewọ mẹ gba.

²⁶ Whenuena ewọ sọ pà odà ota etọn tọn, (dinvie é yín opodo owhèmẹ whemẹ tọn wẹ é nọ pà ẹ: na odà lọ yín agbàn to e ji wutu, enẹwutu wẹ e do nọ pà ẹ:) é jlẹ odà ota etọn tọn do ṣẹkle fọde, kẹdẹdi ojlẹ ahọlu tọn.

²⁷ Podọ hlan Absalọmi yè ji visunnu atọ̀n, po viyọnnu dopo po, oyín mẹhetọn yín Tamali: ewọ sọ yín yọnnu nukunmẹ owhanpẹ tọn de.

²⁸ Absalọmi sọ̀ owhè awe gigọ́ to Jelusalẹm; ewọ ma sọ mọ nukunmẹ ahọlu tọn gba.

²⁹ Whenẹnu wẹ Absalọmi domẹhlan Joabi, nado do e hlan ahọlu de; ṣigba ewọ ma jlo na wá e de gba: é sọ vọ́ mẹdohlan whla awetọ, aigba ewọ ma sọ jlo na wá.

³⁰ Enẹwutu ewọdọ hlan mẹmẹsi etọn lẹ dọmọ, Pọ́n ogle Joabi tọn tin sẹpọ ṣie, é sọ tindo gbadó bale to finẹ; mì yì bo si miyọn ẹn. Mẹmẹsi Absalọmi tọn lẹ sọ si miyọn ogle lẹ.

³¹ Whenẹnu wẹ Joabi tite bo wá Absalọmi de to owhé etọn gbè, bo dọ hlan ẹn dọmọ, Etẹwutu wẹ mẹmẹsi towe lẹ do si miyọn ogle ṣie?

³² Absalọmi sọ gblọnna Joabi dọmọ, Dayi e go, yẹn domẹhlan we, dọmọ, Wá file, na yẹn nido do we hlan ahọlu de, nado dọmọ, Etẹwutu wẹ yè do hẹn mi wá sọn Gẹsuli? é yín pónte na mi nado tin to finẹ zọnmì: enẹwutu dinvie gbọ yẹn ni mọ nukunmẹ ahọlu tọn; podọ eyín ylanwà tin to yẹn mẹ, gbọ e ni hù mi.

³³ Mọwẹ Joabi wa ahọlu de, bo dọ nẹ̃; whenuena ewọ sọ ylọ na Absalọmi, é wá ahọlu de bo dẹ ede do nukunmẹ etọn ji hlan aigba to ahọlu nukọn: ahọlu sọ donunùgona Absalọmi.