2 SAMUẸLI 13 - BIBLU WIWE LỌ 1923

¹ E sọ wá jọ to ehe godo, bọ Absalọmi visunnu Davidi tọn tindo nọviyọnnu whànpẹnọ de, oyín mẹhetọn yín Tamali; bọ Ammọni visunnu Davidi tọn sọ yiwanna ẹn.

² Yè sọ doyàna Ammọni sọmọ bọ ewọ jẹawutu na Tamali nọ viyọnnu etọn tọn wutu; na awhlivu wẹ ewọ; é sọ sọawuhia sinyẹn hlan Ammọni nado wà onú de hlan e dali.

³ Ṣigba Ammọni tindo họntọ̀n de, oyín mẹhetọn yin Jonadabi visunnu Simea tọn nọvisunnu Davidi tọn: Jonadabi yín gbẹtọ zìnzìntọ susu de.

⁴ E sọ dọ hlan ẹn dọmọ, Etẹwutu wẹ, visunnu ahọlu tọn È, bọ hiẹ do to kàngble egbesọegbesọ le? hiẹ ma na dọ na mi? Ammọni sọ dọ hlan ẹn dọ, Yẹn yiwanna Tamali, nọviyọnnu Absalọmi nọvisunnu ṣie tọn,

⁵ Jonadabi sọ dọ hlan ẹn dọmọ, Hẹn dewe mlọnai to adọzàn towe ji, bo basi dewe di awutu jẹtọ: whenuena otọ́ towe wá nado pọn we, dọ hlan ẹn dọmọ, Yẹn vẹ̀ we, gbọ Tamali nọviyọnnu ṣie ni wá dẽ, bo na akla mi nado dù, bo sọ to núdùdù lọ sọ̀ to nukun ṣie mẹ, na yẹn nido to mimọ ẹn, bo sọ dù i to alọ etọn mẹ.

⁶ Mọwẹ Ammọni mlọnai, bo basi ede di awutujẹtọ: whenuena yè hẹn ahọlu wá nado pọ́n ẹn, Ammọni dọ hlan ahọlu dọmọ, Yẹn vẹ̀ we, gbọ Tamali nọviyọnnu ṣie ni wá, bo basi akla hihi awe de to nukun ṣie mẹ, na yẹn nido dù to alọ etọn mẹ.

⁷ Whenẹnu wẹ Davidi domẹhlan whégbe hlan Tamali, dọmọ, Yì owhé nọvisunnu towe Ammọni tọn gbè dinvie, bo sò núdùdù nẹ.

⁸ Mowẹ Tamali yì owhé Ammọni nọvisunnu etọn tọn gbè; yè ko sọ hẹn ewọ mlọnai. E sọ yí linfìnhihò bo mlin in, bo basi akla hihi lẹ to nukun etọn mẹ, bo sọ hi akla hihi lẹ lọ.

⁹ E sọ yí gàngbán, bo kọ̀n yé jẹgbonu to nukọn etọn; ṣigba ewọ gbé nado dù Ammọni sọ dọmọ, Dè gbẹtọ lẹpo jẹgbonu sọn dẽ. Gbẹtọ lẹpo sọ jẹgbonu yì sọn e de.

¹⁰ Ammọni sọ dọ hlan Tamali dọmọ, Hẹn núdùdù lọ biọ abò mẹ wá, na yẹn nido dù sọn alọ towe mẹ. Tamali sọ zé aklahihi lẹ lọ he é ko basi, bo hẹn wá biọ abò mẹ jẹ Ammọni novisunnu etọn de.

¹¹ Whenuena ewọ hẹn ye sẹpò e de nado dù, é hẹn e go, bo dọ hlan ẹn domọ. Nọviyọnnu ṣie, wá mlọnai to dẽ.

¹² Ewọ sọ gblọn nẹ̃ dọ, Lala, nọvisunnu ṣie, a gblé mi blo; na onú mọnko ma jẹ nado yín wiwà to Islaeli mẹ gba: hiẹ wà, ylando he blo.

¹³ Pòdọ yẹn, fie yen na hẹn owinyan ṣie biọ? podọ na towe tọn, hiẹ na tin di ode to nulunọ lẹ mẹ to Islaeli mẹ. Enẹwutu dinvie, Dọhó hlan ahọlu, yẹn vẹ̀ we; na ewọ ma to na whlẹn mi do we gba.

¹⁴ Ṣogán ewọ ma jlo na tuntóai hlan ogbè etọn gba: ṣigba yínyín huhlọnnọ hú ewọ, é gblé e, bo sọ zán hẹ ẹ.

¹⁵ Whenẹnu wẹ Ammọni yí ogbéna daho talala do gbẹwanna ẹn: na ogbéna he é do gbẹwanna ẹn yín daho hú owanyi he é do yiwanna ẹn.

¹⁶ Ewọ sọ dọ hlan ẹn dọmọ, Mọ ma gba, na oylan daho to didè mi jẹgbonu mẹ yín yínylan hú enẹ he a ko wà hlan mi wutu. Ṣigba ewọ ma jlo na tuntóai hlan ẹn gba.

¹⁷ Whenẹnu wẹ é ylọ mẹmẹsi etọn he nọ wàdevizọ̀n hlan ẹn, bo dọmọ, Dè nawe he jẹgbonu sọn dè, bo sú ohòn do e do gbonu.

¹⁸ Ewọ sọ tindo awu whẹ̀kan wunmẹwunmẹnọ de to ogo: na tewu mọnkọ lẹ wẹ yè nọ dó na viyọnnu ahọlu tọn lẹ he yín awhlivu lẹ. Whenẹnu wẹ mẹmẹsi etọn hẹn ẹn jẹgbonu, bo sú ohọ̀n do e do gbonu.

¹⁹ Tamali sọ dè afín do ota etọn, bo tlẹn awu whẹkan wunmẹwunmẹnọ etọn he tin to e go; é sọ yi alọ etọn do ota, bo wle ali etọn jei, bo awhádo lélé le é to yìyì.

²⁰ Absalọmi nọvisunnu etọn sọ dọ hlan ẹn dọmọ, Ammọni nọvisunnu towe ko tin to de we wẹ? ṣigba dinvie, nọviyọnnu ṣie, nọabọẹ: nọvisunnu towe wẹ ewọ; a yí onú he do ayiha mẹ blo Mowẹ Tamali gbògbé to owhé Absalọmi nọvisunnu etọn tọn gbè.

²¹ Ṣigba whenuena Davidi ahọlu sè onú helẹ pó, ewọ yín homẹgblenọ susu.

²² Absalọmi ma sọ dọhó dagbe kavi ylanylan hlan Ammọni gba: na Absalọmi gbẹwanna Ammọni, na é gblé Tamali nọviyọnnu etọn wutu.

²³ E sọ wá jọ to owhè awe gigò godo, wẹ Absalọmi tindo lẹngbọfúnpatọ lẹ to Baali-hazọli mẹ, he tin to Eflaimi go: Absalọmi sọ ylọ visunnu ahọlu tọn lẹpo.

²⁴ Absalọmi sọ wá ahọlu de, bo dọmọ, Dayi e go dinvie, mẹmẹsi towe tindo lẹngbọfúnpatọ lẹ; yẹn vè wẹ, gbọ ahọlu po memesi etọn lẹ po ni yì be mẹmẹsi etọn.

²⁵ Ahọlu sọ dọ hlan Absalọmi dọmọ, Lala, visunnu ṣie, a dike mí mẹpo yì blo, mí nika yín nupẹnagbàn hlan we. Ewọ sọ vẹ́ e; sogàn ewọ ma jei gba, ṣigba dona ẹn.

²⁶ Whenẹnu wẹ Absalọmi dọmọ, Eyín lala, yẹn vẹ̀ we, gbọ Ammọni nọvisunnu ṣie ni yi hẹ mi. Ahọlu sọ dọ hlan ẹn dọmọ, Etẹwutu ewọ ni do yì hẹ we?

²⁷ Ṣigba Absalọmi vẹ̀ ẹ, bọ é gbọ Ammọni po visunnu ahọlu tọn lẹpo po ni yì hẹ ẹ.

²⁸ Absalọmi sọ degbèna mẹmẹsi etọn lẹ, dọmọ, Mì ni dohia dinvie, whenuena ayiha Ammọni tọn yín hùnhùn na ovẹ̃n; whenuena yẹn dọ hlan mì dọ, Hò Ammọni, whenẹnu mì ni hù i, mì dibu blo: yẹn ma ka ko degbèna mì? mì yín tudotọ, bo yín hlọnhlọnnọ.

²⁹ Mẹmẹsi Absalọmi tọn lẹ sọ wà hlan Ammọni dile Absalọmi degbèna yé do. Whenẹnu wẹ visunnu ahọlu tọn lẹpo tite, omẹ dopodopo yé tọn hẹn ede yì kanklosọpóawenọ etọn ji bo họ̀nyì.

³⁰ E sọ wá jọ, whenuena yé tin to aliho, wẹ linlin wá Davidi de, dọmọ, Absalọmi ko hù visunnu ahọlu tọn lẹpo, podọ yè ma pò dopo dai sọn yé mẹ gba.

³¹ Whenẹnu wẹ ahọlu tite, bo tlẹn awu etọn lẹ, bo mlọn aigba; mẹmẹsi etọn lẹpo sọ ṣite to olá po avọ̀ yetọn lẹ po tintlẹn.

³² Jonadabi, visunnu Ṣimea nọvisunnu Davidi tọn tọn, gblọn bo dọmọ, Mì dike klunọ ṣie lẹn dọ yé hù yọ̀pọ dẹpẹ lọ lẹpo visunnu ahọlu tọn lẹ blo; na Ammọni dopokẹdẹ wẹ oṣiọ: na gbọn didè Absalọmi tọn dali wẹ yè ko magbèna ehe sọn azán he gbè ewọ ko gblé Tamali nọviyọnnu etọn.

³³ Enẹwutu dinvie mì dike klunọ ṣie ahọlu yí onú he do ayiha etọn mẹ blo nado lẹn dọ visunnu ahọlu tọn lẹpo yín osiọ na Ammọni dopokẹdẹ wẹ oṣiọ.

³⁴ Ṣigba Absalọmi họ̀nyì. Yọpọ sunnu he tin to hihọtẹn zé nukun etọn lẹ hlan aga, bo pọ́n, bo, dayi e go, gbẹtọ gégé gbọn aliho adà okọta tọn ji ja to godo etọn.

³⁵ Jonadabi sọ dọ hlan ahọlu dọ, Dayi e go, yè hen visunnu ahọlu, tọn lẹ gọ̀: le mẹmẹsi towe dọ do, mọwẹ é, yín.

³⁶ E sọ wá jọ le é dotana didọhó tọn, wẹ, dayi e go, visunnu ahọlu tọn lẹ wá, bo zé ogbè yetọn daga, bò to avivi: ahọlu ga po mẹmẹsi etọn lẹpo po sọ viavi badabada.

³⁷ Ṣigba Absalọmi ko họ̀nyì, bo yì Talmai visunnu Ammihuli tọn de, ahọlu Gẹsuli tọn. Davidi sọ to awubla na visunnu etọn egbesọegbesọ.

³⁸ Mowẹ Absalọmi họ̀nyì, bo yì Gẹsuli, bo tin to finẹ owhè atọ̀n.

³⁹ Alindọn Davidi ahọlu tọn to jijlo nado tọ́n yì Absalọmi de: na yè ko miọnhomẹna ẹn gbọn Ammọni tọn dali, mimọ dọ ewọ ko yín oṣiọ.