2 SAMUẸLI 12 - BIBLU WIWE LỌ 1923

¹ OKLUNỌ sọ do Natani hlan Davidi de. Ewọ sọ wá e de, bo dọ hlan ẹn dọ, Omẹ awe de ko tin to tòdaho dopo mẹ; ode adọkunnọ, awetọ wàmọnọ.

² Omẹ adọkunnọ lọ sọ tindo lẹngbọpa susu po yìnpa lẹ po:

³ Ṣigba omẹ wàmọnọ lọ ma tindo núde, adavo lẹngbọvu asi pẹvi dopo, he ewọ họ̀ bo to yínyín: e sọ whẹ́n dopọ po e po, podọ hẹ ovi etọn lẹ, nùdo etọn lọsu mẹ wẹ e nọ dù sọn, bo nọ nù sọnkọfo etọn lọsu mẹ, bo nọ mlọn akón etọn mẹ, bo sọ tin hlan ẹn di viyọnnu de.

⁴ Gbéjizọnlinnọ de sọ wá omẹ adọkunnọ lọ de, ewọ sọ wàgoe nado dè sọn lẹngbọpa etọn titi mẹ podọ sọn oyìnpá etọn titi mẹ, nado wleyẹyí na omẹ gbéjizọnlinnọ he yè hẹn wá e de, ṣigba yí lẹngbọvu omẹ wàmọnọ lọ tọn, bo sò ẹ na omẹ he wá e de lọ.

⁵ Yè sọ hẹn adi Davidi tọn jimiyọn talala do omẹ lọ ji; é sọ dọ hlan Natani dọ, Le OKLUNỌ to ogbẹ̀, omẹ he wà ehe tin jẹ nado kú:

⁶ Ewọ na sọ gọ̀ lẹngbọvu lọ jó dẹnẹji, na ewọ wà onú he wutu, podọ é ma tindo lẹblanu de wutu.

⁷ Natani sọ dọ hlan Davidi dọ, Hiẹ wẹ dawe lọ. Le wẹ OKLUNỌ dọ, Jiwheyẹwhe Islaeli tọn, Yẹn yí amìsisá do yí we do dè ahọlu do Islaeli ji, yẹn sọ whlẹn we sọn alọ Sauli tọn mẹ;

⁸ Yẹn yí owhé mẹmẹnu towe tọn na we, podọ asi mẹmẹnu towe tọn lẹ do akọ́n towe mẹ, bo sọ na owhé Isláeli tọn we po Juda tọn po; podọ eyín enẹ ko yín whiwhè gbahu, yẹn na ko dè onú lankọ lankọ lẹ dogọ́ hlan we.

⁹ Etẹwutu wẹ hiẹ do vlẹ ohó OKLUNỌ tọn, nado wà enẹ he yín oylan to nukun etọn mẹ? hiẹ ko yí ohi do hò Ulia Hitinu, bo ko sọ yí asi etọn nado yín asi towe, bo sọ yí ohi ovi Ammọni tọn lẹ tọn do hù i.

¹⁰ Enẹwutu dinvie, ohi ma na tọ́nsọn owhé towe gbè gbede; na hiẹ ko vlẹ mi wutu, bo ko sọ yí asi Ulia Hitinu tọn nado yín asi towe.

¹¹ Le wẹ OKLUNỌ dọ, Dayi e go, yẹn na zé oylan tite do oji we sọn owhé towe titi gbè, yẹn na sọ yí asi towe lẹ to nukun towe lẹ nukọn, bo yí yé na hlan kọmẹnu towe, ewọ na sọ zán hẹ asi towe lẹ to nukun owhè he tọn mẹ.

¹² Na hiẹ wà ẹ nuglọ: ṣigba yẹn na wà ẹ to Islaeli lẹpo nukọn, podọ to owhè nukọn.

¹³ Davidi sọ dọ hlan Natani dọ, Yẹn ko wàylando do OKLUNỌ go. Natani sọ dọ hlan Davidi dọ, OKLUNỌ ga ko sọ dè ylando towe sẹ̀; hiẹ ma na kú gba.

¹⁴ Ṣogãn, na gbọn owàlọ towe dali hiẹ ko na hódọnù kẹ̀ntọ OKLUNỌ tọn lẹ nado Zánnù wutu, ovi lọ ga he yè ji hlan we na kú dandan.

¹⁵ Natani sọ tonyì owhé etọn gbè. OKLUNỌ sọ linú ovi he asi Ulia tọn ji hlan Davidi lọ, ewọ sọ yín awutunọ susu.

¹⁶ Enẹwutu Davidi to Jiwheyẹwhe vẹ̀ na ovi lọ; Davidi to nùbla, bo biọ whégbe, bo mlọn aigba to ozán nẹ mẹ.

¹⁷ Mẹho owhé etọn gbè tọn lẹ tite, bo ṣite to e dali, nado zé e tite sọn aigba: ṣigba ewọ ma jlo, mọ é ma sọ dùnú po yé po.

¹⁸ E sọ wá jọ to azán sinawetọ gbè, wẹ ovi lọ kú. Mẹmẹsi Davidi tọn lẹ sọ dibu nado dọ nẹ dọ ovi lọ kú: na yé dọmo, Dayi e go, whenuena ovi lọ gbẹ́ sọ to ogbẹ́, mí dọhó hlan ẹn, ewọ ma tuntóai hlan ogbè mìtọn: nawẹ ewọ na doyana ede sọ, eyín mí dọ nẹ̃ dọ ovi lọ yín oṣiọ?

¹⁹ Ṣigba whenuena Davidi mọ dọ mẹmẹsi etọn lẹ to pádè dopọ, Davidi fọyẹ̀ dọ ovi lọ yín osiọ: Davidi sọ dọ hlan mẹmẹsi etọn lẹ dọ, Ovi lọ yín oṣiọ wẹ? yé sọ dọmọ, Ewọ yín oṣiọ.

²⁰ Whenẹnu wẹ Davidi tite sọn aigba, bo lawu, bo samisisána ede, bo diọ avọ̀ etọn; é sọ wá bíọ ohò OKLUNỌ tọn mẹ bo litai: whenẹnu wẹ é wá owhé etọn titi gbè; whenuena é biọ yé yí akla do nukọn nẹ̃, ewọ sọ dùnú.

²¹ Whenẹnu wẹ mẹmẹsi etọn lẹ dọ hlan ẹn dọ, Onú tẹwẹ ehe hiẹ ko wà? hiẹ to nùbla bo sọ to avivi na ovi lọ whenuena é tin to ogbẹ̀; ṣigba whenuena ovi lọ yín osiọ, hiẹ tite bo sọ dù akla.

²² Ewọ sọ dọmọ, Whenuena ovi lọ gbẹ́ sọ tin to ogbẹ yẹn to nùbla bo sọ to avivi: na yẹn dọmọ, Mẹnu wẹ yọnẹn eyín OKLUNỌ ma na yin nukundagbenọ hlan mi, bọ ovi lọ nidonọgbẹ́?

²³ Ṣigba ewọ ko yín oṣiọ, etẹ́ yẹn sọ to nùbla na? yẹn sọgan hẹn ẹn gọ̀ wẹ? yẹn wẹ jei e de, sigba ewọ ma na sọ lẹ́gọ̀ do dẽ gba.

²⁴ Davidi sọ miọnhọmẹna Bati-ṣeba asi etọn, bo sọ biọ họmẹ yì e de, bo zán hẹ ẹ: é sọ ji visunnu de, ewọ sọ ylọ oyín etọn dọ Sọlọmọni. OKLUNỌ sọ yiwanna ẹn.

²⁵ Ewọ sọ domehlan gbọn alọ Natani Yẹwhegán lọ tọn mẹ, ewọ sọ ylọ oyín etọn dọ Jedidia, na OKLUNỌ tọn wutu.

²⁶ Dinvie Joabi to avùnho hẹ Labba sọn ovi Ammọni tọn lẹ mẹ, bo yí ahọlutodaho lọ.

²⁷ Joabi sọ do mẹdagun lẹ hlan Davidi de, bo dọmọ, Yẹn ko hòavùn hẹ Labba, nugbo, yẹn ko sọ yí todaho osìn lẹ tọn.

²⁸ Enẹwutu dinvie bẹ pipòtọ gbẹtọ lẹ tọn pli, bo dosla do tòdaho lọ nukọn, bo yi i: yẹn niká yí tòdaho lọ, yè bo na nọ yí oyín ṣie do ylọ ẹ.

²⁹ Davidi sọ bẹ́ gbẹtọ lẹpo pli, bo yì Labba, bo hòavùn hẹ ẹ, bo yí i.

³⁰ E sọ yí ojẹgbakun ahọlu yetọn tọn sẹ̀ sọn ota etọn; pinpẹ̀n etọn yín talẹnti dopo sika tọn, zannu akuẹgégé tọn lẹ sọ tin to e mẹ; yè sọ Zé e do ota Davidi tọn. E sọ hẹn ogblannú lẹ jẹgbonu sọn tòdaho lọ mẹ, susu gégé.

³¹ E sọ hẹn omẹ he tin to e mẹ lẹ jẹgbonu, bo yí yé do ayìnyọn lẹ glọ, podọ do aigbakùnnúkẹ́nnọ ogànyu tọn lẹ glọ, podọ do asiọvi gànyù tọn lẹ glọ, bo sọ hẹn yé jugbọn tijolomòdò ṣẹnṣẹn: le wẹ é wà do hlan tòdaho ovi Ammọni tọn le tọn lẹpo. Davidi po gbẹtọ lẹpo po sọ lẹ́gọ̀ jẹ Jelusalẹm.