2 PITA 3 - BIBLU WIWE LỌ 1923

¹ MÌ mẹyiwanna emi, episteli awetọ he wẹ yẹn wlan hlan mì dinvie; to awe lẹ mé yẹn tọ homẹ wiwe mìtọn fọ́n daga gbọn óflin tọn dali:

² na mì nido nọ flin ohó he yè dọ sọn onù yẹwhegán wiwe lẹ tọn mẹ jẹnukọn, podọ osén mí he yín Apọsteli Oklunọ Whlẹngantọ tọn tọn lẹ:

³ na mì ni sọ yọn ehe whẹ́, dọ, mẹvlẹtọ lẹ ná wá po ovlẹ po to azán godo tọn mẹ, bo na to zọnlinzin to ojlo yéde tọn mẹ,

⁴ bo ná to didọmọ, Fie wẹ opagbe gigọ̀wá etọn tọn te? na sọn whenuena otọ́ mítọn lẹ ko damlọn, doponẹ wẹ onú popo te sọn whẹwhẹ́whenu nudida tọn gbọ̃n.

⁵ Na ehe wẹ yé yí ojlo do wòn, dọ gbọn ohó Jiwheyẹwhe tọn dali wẹ olọn lẹ do tin to hóhówhenu, bọ aigba dó mlindopọ sọn osìn mẹ, bó sọ nọte to osìn mẹ.

⁶ Gbọn ehétọn dali aihọn he tin to whenẹnu, le yè yí osìn do gó ẹ, é súdo:

⁷ ṣigba olọn he tin to dinvie lẹ, po aigba lọ po, gbọn ohó dopo lọ dali yè sọ whlá hlan miyọn, bo sọ hla yé dai hlan whẹdazángbè po dindọn mẹylankan lẹ tọn po.

⁸ Ṣigba mẹyiwanna emi, mì yín madọnanọ onú dopo akàn he tọn blo, dọ azán dopo to Oklunọ de taidi owhè fọtọ́n, owhè fọtọ́n sọ taidi azán dopo.

⁹ Oklunọ ma gbòawupò gbọn opagbe etọn dali gba, dile mẹdelẹ lẹn awugbòpò do; ṣigba é yín lìnsinyẹntọ hlan mí dali, na é ma jlo dọ mẹdepope ni dòn, adavo dọ omẹ popo ni wá lẹnvọjọ kòn.

¹⁰ Ṣigba azán Oklunọ tọn ja di ajotọ to ozán mẹ, ehe mẹ olọn lẹ na yí lìlì gángán do juwayì, bọ nugonu lẹ nasọ gbọn yózo sinyẹnsinyẹn mẹ yọ́, aigba po azọ́n he tin to e mẹ lẹ po nasọ fiọ gbidigbidi.

¹¹ Le onú helẹ pó na yọ́ kọnyingbe nẹ, omẹ na hunkọ wẹ mìwlẹ lo yín to owalọ wiwe lẹpo mẹ, to jìjọ-di Jiwheyẹwhe tọn mẹ,

¹² na mì ni to nukundo, bo sọ to mìzọmìzọnji hlan wiwá azán Jiwheyẹwhe tọn tọn, ehe mẹ olọn lẹ na yímiyọn, bo sọ yọ, nugonu etòn lẹ nasọ gbọn yózo sinsinyẹn mẹyọ́?

¹³ Ṣigba, di opagbe etọn, mìwlẹ to nukundo olọn yọ́yọ́ lẹ, po aigba yóyọ́ de po, ofì he dódó nọnọ̀.

¹⁴ Enẹwutu, meyiwanna emi, le mìwlẹ to nukundo onú helẹ hunkọ, mì yín vivẹnunọ, na yè nido mọ mì to e de to jijọho mẹ, to matin apà podọ to madowango mẹ.

¹⁵ Na mì ni sọ lẹn ẹn dọ, linsinsinyẹn Oklunọ mìtọn tọn whlẹngan wẹ: yèdọ dile Paulu, mẹyiwanna mẹmẹsunnu mítọn, wlanwe hlan mì do ga, kẹdẹdi nuyọnẹn he yè na ẹn.

¹⁶ Podọ to episteli etọn lẹpo mẹ, é to ohó onú helẹ tọn dọ; ehe mẹ onú he sinyẹnawú nado yọnẹn delẹ te, ehe wunvinọ po lẹjẹlẹjẹnọ lẹpo po to sislo, dile; ye nọ wà na Owé wiwe devo lẹ do, hlan dindọn yéde tọn.

¹⁷ Enẹwutu, mì mẹyiwanna emi, le mìwlẹ ko yón onú helẹ dai, mì nọ payi mìde go na yè nikã yí alibubu mẹylankan lẹ tọn do dòn mì, na mì nikã jai sọn tenọgligli mìtọn mẹ

¹⁸ Ṣigba mì ni to whinwhẹn to ojọmiọn mẹ, podọ to oyọnẹn Jesu Klisti Oklunọ Whlẹngantọ mítọn tọn me. Na ewọ wẹ gigo tin hlan sọn dinvie kaka doi. Niṣẹ.