2 PITA 1 - BIBLU WIWE LỌ 1923

¹ SIMỌNI Pita, afànumẹ de podọ apọsteli Jesu Klisti tọn, hlan yé he yi yise he họakuẹ sọmọ lọ hẹ mí gbọn dóaó Jiwheyẹwhe tọn po Jesu Klisti Whlẹngantọ mítọn tọn po dali:

² Na ojọmiọn po jijọho po ni to jiji deji hlan mì to oyọnẹn Jiwheyẹwhe tọn mẹ po Jesu Oklunọ mítọn tọn po,

³ mimọ dọ yẹwhe huhlọn etọn ko na onú popo má he yín ogbẹ́ po jijọ-di-Jiwheyẹwhe po tọn, gbọn oyọnẹn ewọ he ylọ mí hlan gigo po jijọdagbe po mẹ:

⁴ gbọn ehetọn mẹ yè yí opagbe daho talala akuẹgegenu na mí: na gbọn ehelẹ dali mì nido yín máhẹtọ jọwamọ yẹwhe, le mí to tutlu sọn gbigble he tin to aihọn mẹ mẹ gbọn wantúntún dali.

⁵ Mowẹ podọ na ehe tọn ga, le mì nọ dovivẹnu to onu popo mẹ, mì yí jijọdagbe dogó yise mìtọn; bo yí oyọnẹn dogó jijọdagbe;

⁶ owùnza dogọ́ oyọnẹn; homẹfa dogọ́ owùnza; jijọ-di-Jiwheyẹwhe tọn dogó homẹfa;

⁷ owanyi na mẹmẹsunnu dogó jiji-di-Jiwheyẹwhe tọn; podọ owanyi dogó owanyi na mẹmẹsunnu.

⁸ Na eyín onú helẹ yín mìtọn bo sù, yé ma na hẹn mì zùn adidọno kavi madọsinsẹ́nnọ hlan oyọnẹn Jesu Klisti Oklunọ mítọn tọn gba.

⁹ Ṣigba ewọ he ma tindo onú helẹ, yín nukuntọ́nnọ, é ma sọgan mọnú to aganu, é sọ wọ̀n dọ yè ko lẹ̀ ẹ wé sọn ylando etọn hóhó lẹ mẹ.

¹⁰ Enẹwutu mẹmẹsunnu emi, mì kúkú gbọ bo nọ dovivẹnu do hẹn oylọ po didè mìtọn po diun: na eyín mìwlẹ to onú helẹ wà, mì ma na jai gbède.

¹¹ Na le wẹ yè na deali hlan mì susu biọ ahọludu madopopo Jesu Klisti Oklunọ Whlẹngantọ mítọn tọn mẹ do.

¹² Enẹwutu yẹn ma to na wòn nado nọ flinnu helẹ mì whepoponu gba, eyín mì tlẹ sọ yón yé, bọ yè sọ hẹn mì lódo to nugbo he tin to mì de mẹ

¹³ Nugbo, yẹn sọ lẹn dọ é jẹ, sọle yẹn tin to gohò he mẹ, nado nọ yí oflin do fọ́n mì daga;

¹⁴ yinyọnẹn dọ, didè ogohọ̀ ṣie sé tọn to wezun ji ja, yèdọ dile Jesu Klisti Oklunọ mítọn ko sọhia mi do.

¹⁵ Mowẹ yẹn na dovivẹnu, dọ mìwlẹ nido nọ flin onú helẹ whepoponu to okú ṣie godo.

¹⁶ Na mìwlẹ ma to otàn vọnu he yè yí nuyọnẹn flinflin do doai hodo gba, whenuena mí to huhlọn po gigowá Jesu Klisti Oklunọ mítọn tọn po hẹn zùn yinyọnẹn hlan mì, ṣigba mìwlẹ yí nukun mítọn titi do mọ gigodaho etọn.

¹⁷ Na é yí yẹyi po gigo po sọn Jiwheyẹwhe Otọ́ de, whenuena ogbè nẹ hunkọ wá e de sọn gigo daho nẹ mẹ dọ, Ehe wẹ Ovi vivẹ ṣie, mẹhe mẹ homẹ ṣie hùn te talala.

¹⁸ Podọ ogbè he sọn olọn mẹ wá mìwlẹ sè, whenuena mí tin po e po to osó wiwe lọ ji.

¹⁹ Mìwlẹ sọ tindo oho dọdai tọn he diun hú enẹ ga; hlan ehetọn mì wà dagbe bọ mì do payi e go, di hlan miyọngbán de he hón to ofì dozín de, kaka oun do kẹ̀n, bọ sunwhlẹvu afọnnu tọn lọ do zẹ́ to ayiha mìtọn lẹ mẹ:

²⁰ yinyón ehe whé, dọ dọ dai Owé wiwe tọn de ma yín otadena di ojlo tọn de gba.

²¹ Na dodai ma gbọn ojlo gbẹtọ tọn dali wá to hóhówhenu gba: ṣigba gbẹtọ lẹ dọhó sọn Jiwheyẹwhe de dile yè dòn yé yì do gbọn Gbigbọ Wiwe dali.