2 JOHANU 1 - BIBLU WIWE LỌ 1923

¹ MẸDAHO lọ hlan yọnnu mẹsinsinyan yẹyinọ po ovi etọn lẹ po, mẹhe yẹn yiwanna to nugbo mẹ; é ma sọ yín yẹn dopokẹdẹ, ṣigba yé he ko yọn nugbo lẹpo ga;

² na nugbo lọ tọn wutu, he to ninò mí mẹ, bo nasọ nọ nọhẹ mí kakadoi.

³ Ojọmiọn na tin to mì de, lẹblanu po jijọho po, sọn Jiwheyẹwhe Otọ́ de, sọn Oklunọ Jesu Klisti, Ovi Otọ́ tọn de, to nugbo po owanyi po mẹ.

⁴ Homẹ ṣie hùn susu dọ yẹn mọ to ovi towe lẹ mẹ to zọnlinzin to nugbo mẹ, yèdọ dile mí ko yí osẹ́n sọn Otọ́ de do.

⁵ Be dinvie yẹn sọ vè we, yọnnu yẹyinọ é ma yín yẹn tlẹ sọ wlanwe osẹ́n yọ́yọ́ de tọn hlan we gba, adavo ehẹ mí ko tindo sọn whẹ́whẹ́whenu, dọ mì ni yiwanna mìnọzo.

⁶ Ehe sọ wẹ owanyi, dọ mí ni to zọnlinzin kẹdẹdi osẹ́n etọn lẹ. Ehe wẹ osẹ́n lọ, na, le mì ko sè sọn whẹ́whẹ́whenu, dọ mì ni to zọnlinzin tò e mẹ.

⁷ Na mẹklọtọ susu ko jẹgbonu yì biọ aihọn mẹ, yèdọ yé he ma yígbe dọ Jesu Klisti wá to agbasalan mẹ. Mẹklọtọ wẹ ehe lọ podọ agọ̀jẹdo-Klistigotọ.

⁸ Mì pọ́n mìde go, na mí nikã hẹn onú nẹlẹ he mí ko wà bú, adavo dọ mí ni mọ ale gigọ́ yí.

⁹ Mẹdepope he jẹ osẹ́n mẹ, bo, ma sọ nọte to oplọ́n Klisti tọn mẹ, ma tindo Jiwheyẹwhe gba. Éwọ he ka note to oplọ́n Klisti ton mẹ, wẹ mẹhe tindo Otọ́ po Ovi pọ.

¹⁰ Eyín mẹdepope wá mì de, bo ma hẹn oplọ́n he wá mì yí i do owhé mìtọn gbè blo, mì sọ hodè ali dagbe tọn nẹ̃ blo:

¹¹ na ewọ he hodè ali dagbe tọn nẹ̃, yín mimátọ to azọ́n ylankan etọn mẹ.

¹² Le yẹn do owé onú susu tọn nado wlan hlan mì, yẹn ma jlo nado yí wema po wesìn po do wlanwe hlan mì gba, ṣigba yẹn to tódo nado wá mì de, bo dọhó hẹ mì nukun mọ nukun, na ayajẹ mìtọn nido gọ́.

¹³ Ovi mẹmẹyọnnu sinsinyan towe tọn lẹ dọnúdo we. Niṣẹ.