Biblia Todo Logo
Bìoball air-loidhne

- Sanasan -

2 AHỌLU LẸ 2 - BIBLU WIWE LỌ 1923

1 E sọ wá jọ, whenuena OKLUNỌ na zé Elija hẹji gbọn jẹhọnlẹ́penọ de dali biọ olọn mẹ, wẹ Elija yì po Eliṣa po sọn Gilgali mẹ.

2 Elija sọ dọ hlan Eliṣa dọmọ, dọngbàn to ofi, Yẹn vẹ́ we; na OKLUNỌ ko do mi hlan yì dẹn sọ Bẹtẹli. Eliṣa sọ dọmọ, Le OKLUNỌ to ogbẹ́, podọ le alindọn towe to ogbẹ́, yẹn ma na jó we do gba. Mowẹ yé jẹte yì Bẹtẹli.

3 Visunnu yẹwhegán lẹ tọn lẹ he tin to Bẹtẹli tón wá Eliṣa de, bo dọ hlan ẹn dọmọ, Bé hiẹ yọnẹn dọ OKLUNỌ na zé mẹmẹnu towe sẹ́ sọn ota towe to egbẹ́? Ewọ sọ dọmọ, Nugbo, yẹn yón ẹn; mì nabọẹ mìtọn.

4 Elija sọ dọ hlan ẹn dọmọ, Eliṣa, yẹn vé we, dọ̀ngbàn to ofi; na OKLUNỌ do mi hlan Jẹliko. Ewọ sọ dọmọ, Le OKLUNỌ to ogbẹ́, podọ le alindọn towe sọ to ogbẹ́, yẹ́n ma jó we do gba. Mowẹ yé zọ́n wá Jẹliko.

5 Visunnu yẹwhegán lẹ tọ́n lẹ he tin to Jẹliko wá sẹpọ́ Eliṣa de, bo dọ hlan ẹn dọmọ, Bé hiẹ yọnẹn dọ OKLUNỌ na zé mẹmẹnu towe só sọn ota towe to egbẹ́? Ewọ sọ gblọn dọmọ, Yẹn yọ́n ẹn, mì nabọẹ mìtọn.

6 Elija sọ dọ hlan ẹn dọmọ, Yẹn vẹ́ we, dòngbàn to ofi; na OKLUNỌ ko do mì hlan Jọdani. Ewọ sọ dọmọ, Le OKLUNỌ to ogbẹ̀, podọ le alindọn towe sọ to ogbẹ́, yẹn ma na jó we do gba. Yé omẹ awelẹ sọ to yìyì.

7 Omẹ kandeao sọn visunnu yẹwhẹgán lẹ tọn lẹ mẹ sọ yì, bo ṣite pànnukòn yé to aganu: yé omẹ awelẹ sọ ṣite to Jọdani dali.

8 Elija sọ yí awugbó etọn, bo bẹ̀ ẹ dopọ, bo hò osìn lẹ lọ, yè sọ má yé hlanfi podọ hlandọn, mọwẹ yé omẹ awelẹ gbọn aigba húhú ji yì gododọ̃n.

9 E sọ wá jọ, whenuena yè ko hẹn yé yì gododọ̃n, wẹ Elija dọ hlan Eliṣa dọmọ, Biọ núhe yẹn na wà na we, whẹpo yẹ́n do yín zizé sọn de we. Eliṣa sọ dọmọ, Yẹn vẹ́ wẹ, gbọ mimá yẹndawe gbigbọ towe tọn de ni tin to oji e.

10 Ewọ sọ dọmọ, Hiẹ ko biọ onú sinsinyẹn de: ṣogán, eyín hiẹ mọ mi whenuena yè to zizé mi sọn de we é na yín mọ hlan we; ṣigba eyín lala, é ma na yín mọ gba.

11 E sọ wá jọ, le yé gbẹ́ sọ to yìyì, bo to hódọ, wẹ, dayi e go, kẹkẹ miyọn tọn de sọawuhia to finẹ po osọ́ miyọn tọn lẹ po he dá yé omẹ awelẹ to ṣẹnṣẹn; Elija sọ hẹji gbọn jẹhọnlẹ́penọ de dali yì biọ olọn mẹ.

12 Eliṣa sọ mọ ẹn, é sọ dawhá dọ, Otọ́ ṣie, otọ́ ṣie, kẹkẹ Islaeli tọn lẹ po osọ́nọ etọn lẹ po! E ma sọ mọ ẹn ba: é sọ hẹn avọ́ etọn titi lẹ go, bo tlẹn yé do awe.

13 E sọ zé awugbó Elija tọn ga he flẹ́ sọn e de, bo gọ̀ yì, bo ṣite to okiti Jọdani tọn dali.

14 É sọ zé awugbó Elija tọn lọ he flẹ́ sọn e de, bo hò osìn lẹ lọ, bo dọmọ, Fie OKLUNỌ, Jiwheyẹwhe Elija tọn te? whenuena ewọ ga ko sọ hò osìn lẹ, yè má yé hlanfi podọ hlandọn, Eliṣa sọ yì gododón.

15 Whenuena visunnu yẹwhegán lẹ tọn lẹ he tin to Jẹliko pànnukọn ẹn mọ ẹn, yé dọmọ, Gbigbọ Elija tọn jẹ Eliṣa ji. Yé sọ wá nado pé e bo sọ dẹ́ yéde hlan aigba to nukọn etọn.

16 Yé sọ dọ hlan ẹn dọmọ, Dayi e go dinvie, sunnusi huhlọnnọ kandeao tin finẹ tò mẹmẹsi towe lẹ de; Mi vé we, gbọ yé ni yì, bo din mẹmẹnu towe: eya gbigbọ OKLUNỌ tọn nikà ko zé e daga, bo zé e dlan osó de ji, kavi biọ agbadò de mẹ. Ewọ sọ dọmọ, Míwlẹ ma na domẹhlan gba.

17 Whenuena yé vẹ́ ẹ kaka yè do hẹnwinyanhù i, é dọmọ, Mì domẹhlan. Enẹwutu yé do sunnusi kandeao hlan; yé to dindin in azán atọ̀n, ṣigba bo ma mọ ẹn.

18 Yé sọ gọ̀ wá e de, whenuena é to gbàndọn to Jẹliko; é sọ dọ hlan yé dọmọ, Yẹn ma ka dọ hlan mì dọ, Mì yì blo?

19 Omẹ tòdaho lọ tọn lẹ sọ dọ hlan Eliṣa dọmọ, Mì vẹ́ we, dayi e go, otẹn tòdaho he tọn, dile klunọ ṣie mọ do, yín whànpẹnọ: aigba osìn yín madota, aigba lọ sọ nọ jàsé.

20 Ewọ sọ dọmọ, Mì hẹn ogò yọ́yọ́ de wá dẽ, bo yí ojó do e mẹ finẹ. Yé sọ hẹn ẹn wá e de.

21 E sọ tón yì asisa osìn lẹ tọn kòn, bo kón ojè do e mẹ finẹ, bo dọmọ, Le wẹ OKLUNỌ dọ, Yẹn ko hẹnazọ̀ngbọna osìn helẹ, okú kavi séjija de ma na sọ tin to finẹ sọnfiyì gbède ba.

22 Mowẹ yè hẹnazọ̀ngbọna osìn lẹ lọ jẹ egbé, kẹdẹdi ọhó Eliṣa tọn he é dọ.

23 E sọ hẹji sọn finẹ yì jẹ Bẹtẹli; le é to jihẹ jei to aliho, finẹ yọ̀pọ fìnfiin lẹ tón sọn tòdaho lọ mẹ ja, bo to vivlẹ ẹ, bo didọ hlan ẹn dọ, Hẹji yì, hiẹ ota pipanọ; hẹji yì, hiẹ ota pipanọ.

24 Ẹwọ sọ pọ́n godo etọn bo mọ yé, bo hodẹ̀do yé to oyín OKLUNỌ tọn mẹ. Finẹ beali-asi awe tọ́n sọn lẹ mẹ jẹgbonu wá, bo tlẹn ovi kandenukunawe sọn yé mẹ.

25 E sọ yì sọn finẹ jẹ osé Kalmẹli kọ́n, é sọ sọn finẹ gọ́yì Samalia.

Holy Bible in Gun-Alada © Bible Society of Benin and Bible Society of Nigeria, 1923.

Bible Society of Nigeria
Lean sinn:



Sanasan