1 SAMUẸLI 6 - BIBLU WIWE LỌ 1923

¹ ALKI OKLUNỌ tọn lọ sọ tin to otò Filistini lẹ tọn me osùn ṣinawe.

² Filistini lẹ sọ ylọ yẹwhenọ lẹ po asẹlio lẹ po, dọmọ, Etẹ́wẹ mi na zòndo alki OKLUNỌ tọn lọ? mì dohia mí, eté wẹ mí na do do e hlan otẹn etọn mẹ.

³ Yé sọ dọmọ, Eyín mì do alki Jiwheyẹwhe Islaeli tọn tọn lọ hlan, mì do e hlan agbá blo; ṣigba to alọ depope mẹ mì ni lẹ avọ́ nunina whẹ́yìnylan tọn de gọ̀ nẹ̃: whenẹnu yè na hẹnazọ́ngbọna mi, é na sọ yín yinyọnẹn hlan mì etẹwutu yè ma do dè alọ etọn sọn mì go.

⁴ Whenẹnu wẹ yé dọmọ, Etẹ́wẹ na yín avọ́ nunina whẹ́yìnylan tọn he mí na na hlan? Yé sọ dọmọ, Agówuwu sikanọ atón, po ajaka sikanọ atón po, kẹdẹdi osọhà ogán Filistini lẹ tọn tọn: na azònylankan dopo wẹ tin to mì omẹ pó, podọ to ogán mìtọn lẹ go.

⁵ Enẹwutu wẹ mì na basi boṣio agówuwu mìtọn lẹ tọn lẹ, po bosiọ ajaka mìtọn lẹ tọn lẹ po he hẹn aigba lọ flu; mìwlẹ na sọ na gigo hlan Jiwheyẹwhe Islaeli tọn: eya é na dè alọ etọn sẹ́ sọn mì go, pọdọ sọn yẹwhe mìtọn lẹ go, podọ sọn aigba mìtọn go.

⁶ Whenẹnu etẹwutu wẹ mì hẹn ayiha mìtọn lẹ sinyẹn, dile Egiptinu lẹ po Falo po hẹn ayiha yetọn lẹ sinyẹn do? whenuena ewọ yí nujawu do wázón to yé ṣẹnṣẹn, be ye na gbọ gbẹtọ ewlẹ ni yì, bọ yé sọ fọnyì?

⁷ Enẹwutu dinvie mì ni yí bo wleawu na mì kẹkẹ yọ́yọ́ de, po yìnsi vinọ awe po, ehe ji glepònu de ma ko jẹ gbède, bo sìn yìnsi lẹ lọ do kẹkẹ lọ go, bo fò yìnvi yetọn lẹ sọn yé kòn wá owhé.

⁸ Bo zé alki OKLUNỌ tọn lọ, bo yí i do kẹkẹ lọ ji; bo yí asọdonu sika tọn le, he mì gọ̀jọ́ nẹ̃ na avọ́ nunina whèyinyian tọn de, to apotin de mẹ to adà etọn mẹ; bo do e hlan, na é nido yì.

⁹ Bo pinpọn, eyín é gbọn aga jeì to aliho owhègbè etọn titi tọn dali hlan Bẹti-semẹsi dali, be whenẹnu ewọ wẹ ko wàylan daho he do mí: ṣigba eyín lala, whenẹnu mí na yọ́nẹn dọ é ma yín alọ etọn wẹ ko hò mí gba; be núdukosọ de wẹ é yín he ko jọ hlan mí de.

¹⁰ Omẹ ewlẹ sọ wà mọ; bo yí yìnsi vinọ awe lẹ, bo sìn yé do kẹkẹ lọ go, bo súapó do yìnvi yetọn lẹ do whégbe:

¹¹ yé sọ zé alki OKLUNỌ tọn lọ do kẹkẹ lọ ji, apotin po ajaka sika tọn lẹ po po boṣiọ agówuwu yetọn tọn lẹ po

¹² Yìnsi lẹ lọ sọ yí aliho titegbe gbọn aliho hlan Bẹti-semẹsi dali; yé to yìyì to alihogbo lọ ji, bo to awhádo le yé to yìyì, bo ma tó do apadopo hlan alọ adusi mẹ kavi hlan amiyọn mẹ; ogán Filistini tọn lẹ bọdo yé go jẹ dògboji Bẹti-semẹsi tọn.

¹³ Yé Bẹti-semẹsi tọn lẹ ko to oli bibia yetọn gbẹn to agbàdo lọ mẹ: yé sọ zé nukun yetọn lẹ daga, bo mọ alki lọ, bo sẹ̀ jaya nado mọ ẹn.

¹⁴ Kẹkẹ lọ sọ wá biọ ogle Josua Bẹti-semẹsinu lọ tọn mẹ, bo nọtó to finẹ, fie zannu daho de ko te: yé sọ zé nakó kẹkẹ lọ tọn bo yí yìnsi lẹ lọ do na avọ́ nunina mimẹ̀ de hlan Okluvọ

¹⁵ Levinu lẹ sọ zé alki OKLUNỌ tọn lọ do aigba, po apotin he tin po e po po, ehemẹ aṣọdonu sika tọn lẹ te, bo yí ye do zannu daho lọ ji: omẹ Bẹti-semẹsi tọn lẹ na avọ́ nunina mimẹ̀ lẹ bo sọ sán avọ́ lẹ to gbèdoponẹ hlan OKLUNỌ.

¹⁶ Whenuena ogán aión Filistini tọn lẹ ko mọ ẹn, yé lẹ́gọ̀ do Eklọni to gbèdoponẹ.

¹⁷ Ehelẹ sọ wẹ agówuwu sikanọ lẹ he Filistini lẹ gójó na avọ́ nunina whèyinylan de tọn hlan OKLUNỌ; na Dopo na Asidọdi, dopo na Gaza, dopo na Aṣikelọni, dopo na Gati, dopo na Eklọni;

¹⁸ Ajaka sika tọn lẹ lọ kẹdẹdi osọha todaho Filistini lẹ tọn lẹpo he yín ogán atón lẹ tọn, tòdaho dòkọnọ lẹ po otò gbẹta tọn lẹ po: yèdọ hlan zannu daho lọ kọ̀n, fìetọnji yé zlọn alki OKLUNỌ tọn lọ do, zannu he gbó sọ tin kaka jẹ egbé to ogle Josua Bẹti-semẹsinu tọn mẹ

¹⁹ E sọ ho sọn omẹ Beti-ṣemẹsi tọn lẹ mẹ, na yé pọ́n hlan alki OKLUNỌ tọn mẹ wutu, yèdọ é hò sọn omẹ ewlẹ mẹ sunnusi fọtọ́n kandeao é lán kandegbàn: omẹ ewlẹ sọ blawu na OKLUNỌ ko yí hùhù daho de do hò omẹ ewlẹ wutu.

²⁰ Omẹ Bẹti-semẹsi tọn lẹ sọ dọmọ, Mẹnu wẹ tin sọgan nado nọte to OKLUNỌ nukọn, Jiwheyẹwhe wiwé he? podọ mẹnu de wẹ é na hẹagayì sọn mí de?

²¹ Yé sọ do mẹdagun lẹ hlan tòmẹnu Kiliati-jealimi tọn lẹ, dọmọ, Filistini lẹ ko hẹn alki OKLUNỌ tọn wá; mì jẹte wá, bo hẹn ẹn hẹji yì mì de.