1 SAMUẸLI 3 - BIBLU WIWE LỌ 1923

¹ OVI lọ Samuẹli sọ to devizọ́nwà hlan OKLUNỌ to Eli nukọn. Ohó OKLUNỌ tọn sọ yín nuhọakuẹ to azán nẹle me; numimọ gbangba de ma sọ tin.

² E sọ wá jọ to ojlẹ nẹ mẹ, whenuena yè hẹn Eli mlọnai to otẹn etọn mẹ, (dinvie nukun etọn lẹ ko sọ nado whẹ́n dozin, bọ é ma do sọ sọgan mọnu,)

³ miyọngbán Jiwheyẹwhe tọn yè ma ko hẹn si gba, yè sọ hẹn Samúẹli mlọnai nado dọamlọn, to tẹmpli OKLUNỌ tọn mẹ, fie alki Jiwheyẹwhe tọn tin te:

⁴ bọ OKLUNỌ ylọ Samuẹli: ewọ sọ dọmọ, Yẹn tin to ofi.

⁵ Ewọ sọ dowezun yì Eli de, bo dọmọ, Yẹn tin to ofi; na hiẹ to yiylọ mi. Ewọ sọ dọmọ, Yẹn ma ylọ gba; yì mlọnai.

⁶ OKLUNỌ sọ vọ́ ylọ, Samuẹli. Samuẹli sọ tite bo yì Eli de, bo dọmọ, Yẹn tin to ofi; na hiẹ to yiylọ mi Ewọ sọ gblọn dọ, Yẹn ma ylọ gba; visunnu ṣie; sọ yì mlọnai.

⁷ Dinvie Samuẹli ma ko yón OKLUNỌ gba, mọ yè ma ko hẹn ohó OKLUNỌ tọn sọawuhia hlan ẹn gba.

⁸ OKLUNỌ sọ vó Samuẹli ylọ atọ̀ntọ. E sọ tite bo sọ yì Eli de, bo dọmọ, Yẹn tin to ofi; na hiẹ to yiylọ mi. Eli sọ yọnẹn dọ OKLUNỌ wẹ ko to ovi lọylọ.

⁹ Ènẹwutu wẹ Eli do dọ hlan Samuẹli dọmọ, Yì, mlọnai: é na sọ yín, eyín é sọ ylọ we, wẹ hiẹ na dọmọ, To hódọ, OKLUNỌ; na devi towe to sisè. Mọwẹ Samuẹli yì bo mlọnai to otẹn etọn mẹ

¹⁰ OKLUNỌ sọ wá, bo ṣite, bo ylọ di whenu tintan tọn lẹ, Samuẹli, Samueli. Whenẹnu wẹ Samuẹli dọmọ, To hódọ; na devi towe to sisè.

¹¹ OKLUNỌ sọ dọ hlan Samuẹli dọ, Dayi e go, yẹn na wà onú de to Islaeli mẹ, ehe go otó awe mẹdepope he sè tọn lẹ na, hè.

¹² To azán nẹ gbè yẹn na wà do Eli enẹ he yẹn ko dọ gbọn owhé etọn tọn dali lẹpo, sọn odò yèdọ jẹ opòdo.

¹³ Na yẹn ko dọ nẹ dọ yẹn na dawhèna owhé etọn kakadoi, na oylanwà he ewọ yọnẹn, na visunnu etọn ko hẹn dẹ́hodo de wá yéde ji wutu, bọ ewọ ma sọ gọ̀ ye gba.

¹⁴ Podọ enẹwutu yẹn ko whle hlan owhé Eli tọn, dọ oylanwà owhé Eli tọn tọn yè ma to na yí avọ́ kavi avọ́ nunina do Mẹ sẹ́ gba kakadoi.

¹⁵ Samuẹli sọ mlọnai kaka jẹ afọnnu bo sọ hùn ohọ̀n OKLUNỌ tọn tọn lẹ. Samuẹli sọ dibu nado do numimọ lọ hia Eli.

¹⁶ Whenẹnu wẹ Eli ylọ Samuẹli, bo dọmọ, Visunnu ṣie, Samuẹli. Ewọ sọ dọmọ, Yẹn tin to ofi

¹⁷ Ewọ sọ dọmọ, Etẹ wẹ onú he OKLUNỌ dọ hlan we? Yẹn vẹ́ we a sọ ẹ whla do mi blo: Jiwheyẹwhe ni wà mọ hlan we, podọ humọ ga, eyín hiẹ yi onú depope whla do mi sọn onú he é dọ hlan we lẹpo mẹ.

¹⁸ Samuẹli sọ dọ patapatapó nẹ̃, bo ma whla núde do e. Ewọ sọ dọmọ, OKLUNỌ wẹ: gbọ é ni wà núhe sọawuhia dagbe nẹ̃.

¹⁹ Samuẹli sọ whén, OKLUNỌ sọ tin po e po, bo ma sọ dike núde son ohó etọn lẹ mẹ ni flẹ́ jẹ aigba gba.

²⁰ Islaeli lẹpo sọn Dani Yèdọ jẹ Beẹl-seba sọ yọnẹn dọ Samuẹli wẹ yè hẹn lódo nado yín yẹwhenọ OKLUNỌ tọn de.

²¹ OKLUNỌ sọ doawuhia to Ṣilo: na OKLUNỌ sọ ede hia hlan Samuẹli to Ṣilo mẹ gbọn ohó OKLUNỌ tọn dali.