1 SAMUẸLI 28 - BIBLU WIWE LỌ 1923

¹ E sọ wá jọ to azán nẹlẹ mẹ, wẹ Filistini lẹ bé awhànpa yetọn lẹ plidopọ na awhànvipẹzọ́n, nado họavùn hẹ Islaeli. Akisi sọ dọ hlan Davidi dọ, Hiẹ ni yọnẹn nugbonugbo, dọ hiẹ na tón hẹ mi yì to awhànpa lọ mẹ, hiẹ po omẹ towe lẹ po.

² Davidi sọ dọ hlan Akisi dọmọ, Enẹwutu hiẹ na yón núhe mẹmẹsi towe na wà. Akisi sọ dọ hlan Davidi dọmọ, Enẹwutu wẹ yẹn na hẹn we basi nugopọ́ntọ ota ṣie tọn kaka doi.

³ Samuẹli ko yín osiọ dinvie, Islaeli lẹpo ko sọ ví i, bo di i do Lama, yèdọ do tòdaho etọn titi me. Sauli ko sọ dè enẹlẹ he tindo gbigbọ kẹninsi tọn lẹ, po azetósunnu lẹ po jẹgbonu sọn aigba lọ ji.

⁴ Filistini lẹ sọ bẹ́ yéde plidopọ, bo wá bo whèsla do Ṣunẹmi mẹ: Sauli sọ bẹ́ Islaeli lẹpo plidopọ, yé sọ whèsla do Gilboa mẹ.

⁵ Whenuena Sauli mọ awhànpa Filistini lẹ tọn, ewọ yín avọ̀satọ, ayiha etọn sọ to sisọsisọ talala.

⁶ Whenuena Sauli kanbiọ sọn OKLUNỌ de, OKLUNỌ ma gblọnhó nẹ̃ gba, gbọn odlọ lẹ dali, kavi gbọn Ulimi dali, kavi gbọn yẹwhegán lẹ dali.

⁷ Whenẹnu wẹ Sauli dọ hlan devi etọn lẹ dọmọ, Mì din yọnnu de na mi he tindo gbigbọ kẹninsi de ton, na yẹn nido yì e de, bo kanbiọ sọn e de. Devi etọn lẹ sọ dọ hlan ẹn dọ, Dayi e go, nawe de tin he tindo gbigbọ kẹninsi tọn de to Ẹn-dọli.

⁸ Sauli sọ diọunna ede, bo yí awu devo do, bo yì, ewọ po sunnusi awe po po e po, yé sọ wá nawe lọ de to zánmẹ: ewọ sọ dọmọ, Yẹn vé we, kànnú hlan dẽ gbọn gbigbọ kẹnsi tọn dali, bo hẹn wá aga na mi mẹdepope yẹn na ylọyín hlan we.

⁹ Nawe lọ sọ dọ hlan ẹn dọmọ, Dayi e go, hiẹ yón núhe Sauli ko wà, le ewọ ko sán enẹlẹ he tindo gbigbọ kẹnnsi lẹ do, po azetọ-sunnu lẹ po sé sọn aigba lọ ji do: enẹwutu etẹwutu hiẹ do omó de na ogbẹ́ ṣie, nado basi mi nado kú?

¹⁰ Sauli sọ whle hlan ẹn gbọn OKLUNỌ dali, dọmọ, Le OKLUNỌ to ogbẹ́, yàdonamẹ de ma to na jọ do ogo we na onú he gba.

¹¹ Whenẹnu wẹ nawe lọ dọmọ, Mẹnu wẹ yẹn na hẹn wá aga hlan we? Ewọ sọ dọmọ, Hẹn Samuẹli wá aga na mi,

¹² Whenuena nawe lọ mọ Samuẹli, é yí ogbè gángán do dawhá: nawe lọ sọ dọhó hlan Sauli, dọmọ, Etẹwutu wẹ hiẹ klọ mi? na Sauli wẹ hiẹ.

¹³ Ahọlu sọ dọ hlan ẹn dọ, A yín avọ̀satọ blo: na etó hiẹ mọ? Nawe lọ sọ dọ hlan Sauli dọ, Yẹn mọ yẹwhe de ja aga sọn aigba mẹ.

¹⁴ Ewọ sọ dọ hlan ẹn dọ, Ojlẹmọ tẹ́ tọn wẹ ewọ? é sọ dọmọ, Dawe yónhonọ de wá aga; yè sọ yi otewu de ṣinyọn ẹn. Sauli sọ yọnẹn dọ Samuẹli wẹ, é sọ dẹ́ po nukunmẹ etọn po hlan aigba, bo kànwhébiọ.

¹⁵ Samuẹli sọ dọ hlan Sauli dọ, Etẹwutu hiẹ to magbọjẹdona mi, nado hẹn mi wá aga? Sauli sọ gblọn dọ, Yè hẹn nukunbia mi susu; na Filistini lẹ to awhàn basi to oji e, Yè sọ hẹn Jiwheyẹwhe yì sọn dẽ, bo ma sọ to hógblọnna mi ba, gbọn Yẹwhegán lẹ dali, kavi gbọn odlọ lẹ dali: enẹwutu wẹ yẹn ko do ylọ we, na hiẹ nido hẹn zùn yinyọnẹn hlan mi núhe yẹn na wà.

¹⁶ Samuẹli sọ dọmọ, Whenẹnu etẹwutu hiẹ kanbiọ sọn dẽ, mimọ dọ OKLUNỌ ko yì sọn de we, bọ yè hẹn lẹzùn mẹglatọ towe?

¹⁷ OKLUNỌ ko sọ basi na ede dile é dọhó gbọn dali ṣie do: OKLUNỌ ko sọ fẹ́n ahọludu lọ sọn alọ towe mẹ, bo na ẹn hlan kómẹnu towe, yèdọ hlan Davidi.

¹⁸ Na hiẹ ma sètónuna ogbè OKLUNỌ tọn wutu, bo ma hẹn homẹgble miyọnawu etọn sẹ to Amalẹki ji gba, enẹwutu wẹ OKLUNỌ do wà onú he do ogo we to egbé.

¹⁹ Humọ OKLUNỌ na jó Islaeli ga po hiẹ po do alọ Filistini lẹ tọn mẹ: to osò hiẹ po visunnu towe lẹ po na tin to dẽ: OKLUNỌ na jó awhànpa Islaeli tọn ga do alọ Filistini lẹ tọn mẹ.

²⁰ Whenẹnu wẹ Sauli zònzú jai jẹ aigba, bo sọ yín avọ̀satọ susu, na ohó Samuẹli tọn lẹ wutu: huhlọn de ma sọ tin to e homẹ; na é ma ko dù akla de to okle lẹpo gba, kavi to ozán lẹpo mẹ.

²¹ Nawe lọ sọ wá Sauli de, bo mọ dọ yè hẹn ẹn jẹtukla talala, bo sọ dọ hlan en dọ, Dayi e go, deviyọnnu towe ko tuntóai hlan ogbè towe, yẹn ko sọ yí ogbẹ̀ ṣie do alọ tọwe ṣie mẹ, bo ko tuntóai hlan ohó towe lẹ he hiẹ dọ hlan mi.

²² Enẹwutu dinvie, yẹn vè we, hiẹ ni sọ tuntóai ga hlan ogbè deviyọnnu towe tọn, bo gbọ yẹn ni zé nùdo akla tọn de do nukọn towe; bo dù, na hiẹ nido tindo huhlọn, whenuena hiẹ to yìyì to aliho towe ji.

²³ Ṣigba ewọ gbè, bo dọmọ, Yẹn ma to na dùnú gba. Ṣigba devi etọn lẹ, kòndopọ hẹ nawe lọ, hẹn ẹnsèvè; ewọ sọ tuntóai hlan ogbè yetọn. Mowẹ é tite sọn aigba, bo sinai to adọzàn ji.

²⁴ Nawe lọ sọ tindo yìnvú ojonọ de to owhé gbè; ewọ sọ yawu, bo hù i; é sọ yí olìnfin, bo hò e, bo hì akla madotón etọn:

²⁵ E sọ hẹn ẹn wá Sauli nukọn, po devi etọn lẹ po nukọn; Yé sọ dù. Whenẹnu wẹ yé tite, bo yì to ozán nẹ mẹ.