1 SAMUẸLI 23 - BIBLU WIWE LỌ 1923

¹ YÉ sọ dọ na Davidi dọmọ, Dayi e go, Filistini lẹ to avùnhò hẹ Keila, yé sọ yí vẹ̃nlitẹn lẹ.

² Enẹwutu wẹ Davidi kanbiọ sọn OKLUNỌ de, dọmọ, Yẹn na yì bo hò Filistini helẹ? OKLUNỌ sọ dọ hlan Davidi dọ, Yì, bo hò Filistini lẹ bo whlẹn Keila.

³ Omẹ Davidi tọn lẹ sọ dọ hlan ẹn dọ, Dayi e go, mí yín avosatọ to ofi to Juda: nẹmunẹmu whenẹnu eyín mí yì Keila to awhàn Filistini lẹ tọn ji?

⁴ Whenẹnu wẹ Davidi sọ vọ́ kanbiọ sọn OKLUNỌ de. OKLUNỌ gblọnna ẹn bo dọmọ, Fọn, jẹte yì Keila; na yẹn na jó Filistini lẹ do alọ towe mẹ.

⁵ Davidi po omẹ etọn lẹ po sọ yì, bo hoavùn hẹ Filistini le, bo hen kanlinpa yetọn lẹ wá yì, bo yí hùhù daho de do hù yé. Mowẹ Davidi whlẹn tòmẹnu Keila tọn lẹ.

⁶ E sọ wá jọ, whenuena Abiatali visunnu Ahimelẹki tọn họnyì Davidi de to Keila, wẹ é jẹte wá po ẹfọdi de po to alọ etọn me.

⁷ Yè sọ dọ ẹ na Sauli dọ yè hen Davidi wá Keila. Sauli sọ dọmọ, Jiwheyẹwhe ko jó e do alọ ṣie mẹ; na yè sú i do whégbe, gbọn bibiọ otòpẹvi de mẹ he tindo họ̀ngbo lẹ po gànbá lẹ po.

⁸ Sauli sọ ylọ gbẹtọ lepo pli do awhàn kòn, nado jẹte yì Keila, nado gbòalina Davidi po omẹ etọn lẹ po.

⁹ Davidi sọ yọnẹn dọ Sauli to okà lẹn do e go; é sọ dọ hlan Abiatali yẹwhenọ dọ, Hẹn ẹfọdi lọ wá file.

¹⁰ Whenenu wẹ Davidi dọmọ, OKLUNỌ E, Jiwheyẹwhe Islaeli tọn mẹmẹsi towe ko sè nugbonugbo dọ Sauli to dindin nado wá Keila, nado và tòdaho lọ na ṣie tọn wutu.

¹¹ Bé omẹ Keila tọn lẹ na jó mi do alọ etọn mẹ? bé Sauli na heji wá, dile mẹmẹsí towe sè do? OKLUNỌ È, Jiwheyẹwhe Islaeli tọn, yẹn vẹ we, dọ na mẹmẹsi towe. OKLUNỌ sọ dọmọ, Ewọ na jẹte wá.

¹² Whenẹnu wẹ Davidi dọmọ, Bé omẹ Keila tọn lẹ na jó mi po ome ṣie lẹ po do alọ Sauli tọn mẹ? OKLUNỌ sọ dọmọ, Yé na jó we do.

¹³ Whenẹnu wẹ Davidi po omẹ etọn lẹ po, he yín nuontòn nkọ, tite bo fonyì sọn Keila, bo to yìyì fidepope yé sọgan yì. Yè sọ dọ na Sauli dọ Davidi ko hòngán sọn Keila; é sọ gbọ sọn nado tón yì go.

¹⁴ Davidi sọ nọnó zùngbo mẹ to odò gángán lẹ mẹ, bo sọ to otò okọta tọn mẹ nò to zùngbo Zifi tọn mẹ. Sauli sọ to dindin in egbesọegbesọ, ṣigba Jiwheyẹwhe ma jó e do alọ etọn mẹ gba.

¹⁵ Davidi sọ mọ dọ yè hẹn Sauli tón jẹgbonu nado din ogbẹ etọn: Davidi sọ tin to zùngbo Zifi tọn mẹ to atin lẹ gblamẹ.

¹⁶ Jonatani visunnu Sauli tọn sọ tite, bo yì Davidi de to atin lẹ gblamẹ, ho hẹn alọ etọn dohuhlọn to Jiwheyẹwhe mẹ.

¹⁷ E sọ dọ hlan ẹn dọ, A dibu blo: na alọ Sauli otọ́ ṣie tọn ma to na mọ we gba; hiẹ na yín ahọlu to Islaeli ji, yẹn na sọ yín omẹ awetọ hlan we; podọ Sauli otọ́ ṣie yọnẹn ga.

¹⁸ Yé omẹ awelẹ sọ basi alẹ̀nù de to OKLUNỌ nukọn: Davidi sọ to atin lẹ gblamẹ nọ̀, Jonatani sọ yì owhé etọn gbè.

¹⁹ Whenẹnu wẹ Zifinu lẹ hẹji wá Sauli de to Gibea, dọmọ, Bé Davidi ma sọ ede whlá to mí de to odò gángán lẹ mẹ to atin lẹ gblamẹ, to okọta Hakila tọn mẹ, he tin to hùwaji zùnkan tọn go?

²⁰ Enẹwutu dinvie, ahọlu, jẹte wá, kẹdẹdi ojlo alindọn towe tọn lẹpo nado jẹte wá: mìtọn dali tọn na yín nado jó e do alọ ahọlu tọn mẹ.

²¹ Sauli sọ dọmọ, Donanọ sọn OKLUNỌ de mì ni yín; na mìwlẹ tindo awuvẹmẹ to oji e.

²² Mì yì, yẹn vẹ́ mì, bọ vó basi nugbonugbo, bo yọnẹn bo sọ mọ otẹn etọn fie jẹtẹn etọn te, po mẹhe ko mọ ẹn to finẹ po: na yè ko dọ na mi dọ nuyọnẹnwinniwinni wẹ é nọ zán.

²³ Enẹwutu pọ́n, bo yí oyọnẹn bibẹ́tẹn lẹpo tọn fie é whlá ede do, mì bo sọ vó wá dẽ sọn nugbo de mẹ, yẹn na sọ yì po mì po: é na sọ wá jọ, eyín ewọ tin to aigba lọ ji, wẹ yẹn na din in mọ to fọtọ́n Juda tọn lẹ ṣẹnṣẹn.

²⁴ Yé sọ tite, bo yì Zifi to Sauli nukọn: aigba Davidi po omẹ etọn lẹ po tin to zùngbo Maoni ton mẹ, to Alaba mẹ to hùwaji zùnkan tọn go

²⁵ Sauli po omẹ etọn lẹ po sọ yì nado din in Yé sọ dọ na Davidi: enẹwutu wẹ é jẹte wá osé kọ̀n, bo nọnọ̀ zùngbo Maoni tọn mẹ. Whenuena Sauli sè enẹ, é domọna to Davidi godo to zùngbo Maoni tọn mẹ.

²⁶ Sauli to yìyì to awà osó tọn he ji, Davidi po omẹ etọn lẹ po to awà osó tọn nẹ ji: Davidi sọ yawu nado yi sẹ́ na osi Sauli tọn; na Sauli po omẹ etọn lẹ po glọn Davidi po omẹ etọn lẹ po lédo nado wlé yé.

²⁷ Ṣigba mẹdagun de wá Sauli de, dọmọ, Hẹn dewe yawu, bo wá; na Filistini lẹ ko basi oṣinyọn de do aigba.

²⁸ Mowẹ Sauli lẹ́gọ̀ sọn mọdona to Davidi godo, bo yì Filistini lẹ ji; enẹwutu wẹ yé do nọ ylọ ofi nẹ dọ Sela-hammalekọti.

²⁹ Davidi sọ hẹji yì sọn finẹ, bo nọnọ̀ odò gángán Ẹn-gẹdi tọn lẹ mẹ.