1 SAMUẸLI 2 - BIBLU WIWE LỌ 1923

¹ HANNA hodẹ̀ bo sọ dọmọ: Ayiha ṣie zédaga to OKLUNỌ mẹ, Yè hẹn azò ṣie zédaga to OKLUNỌ mẹ: Yè hẹn onù ṣie gblo do kẹ̀ntọ ṣie lẹ ji; Na yẹn to ayajẹ to whlẹngan towe mẹ wutu.

² Mẹde ma yín wiwe di OKLUNỌ gba; Na mẹde ma tin to adà towe mẹ gba: Na osé depope ma tin di Jiwheyẹwhe mìtọn gba.

³ A sọ yí sakla do dọhó lankan mọ ba blo; A sọ dike hófusa tọ́n sọn onù towe mẹ blo: Na OKLUNỌ Jiwheyẹwhe oyọnẹn tọn de wẹ, Gbọn e dali wẹ yè nọ jlẹ owàlọ lẹ.

⁴ Yè wẹ́n ogá omẹ huhlọntọ lẹ tọn lẹ, Yè sọ yi huhlọn do blagbajana yé he to samù lẹ.

⁵ Yé he yín gigè lẹ ko sú yéde afà na akla; Yé he yín huvẹtọnọ lẹ ko gbòdò: Nugbo, wẹ̀nsinọ ko zé ṣinawe hẹn; Ewọ he tindo ovi susu pòkàn.

⁶ OKLUNỌ wẹ nọ hù bo sọ nọ hẹn do ogbẹ̀: Ewọ wẹ nọ hẹn jẹte wá kutòmẹ, bo sọ nọ hẹn wá aga.

⁷ OKLUNỌ wẹ nọ hẹn zùn wamọnọ, bo sọ nọ hen zùn adọkunnọ: E nọ hẹn wá odò, é sọ nọ jlọdaga ga.

⁸ E nọ zé wamọnọ tite sọn kògudu mẹ, E nọ jlọ agbatọnọ dote sọn ogbó ji, Nado hẹn yé sinai hẹ ahọvi lẹ, Bo sọ dugú ofìn gigo tọn: Na OKLUNỌ tọn wẹ dotin aigba tọn lẹ, E ko sọ zé aihọn do yé ji.

⁹ E na hẹn afọ omẹ wiwe etọn lẹ tọn dote, Ṣigba mẹylankan lẹ wẹ yè na hẹn nọ abọẹ to zinvlu mẹ; Na omẹ de ma na gbọn huhlọn dali glonú gba.

¹⁰ Yè na gbà ye he to avùnhò hẹ OKLUNỌ lẹ hányán; Yé ji wẹ é na yẹnwan do to olọn mẹ: OKLUNỌ na dawhèna opòdo aigba tọn lẹ; Ewọ na sọ na huhlọn hlan ahọlu etọn, Bo sọ zé azò mẹyíamisádodè etọn tọn daga.

¹¹ Ẹlkana sọ yì owhé etọn gbè to Lama. Ovi lọ sọ to devizọ̀nwà hlan OKLUNỌ to Eli yẹwhenọ nukọn.

¹² Dinvie visunnu Eli tọn lẹ yín visunnu Beliali tọn lẹ; yé ma yòn OKLUNỌ gba.

¹³ Wàlọ yẹwhenọ lẹ tọn to gbẹtọ le de wẹ, dọ, whenuena omẹ depope na avọ́sannu, devi yẹwhenọ tọn nọ wá, whenuena olàn lọ tin to akúnsìn mẹ, po lànsọ́nu okẹ́n atọ̀n tọn de po to alọ etọn mẹ;

¹⁴ é sọ yí i do pánu mẹ, kavi gànzẹ́npẹvi, kavi gànzéndaho, kavi ozẹn; ehe lànsọ́nu hẹn wá aga lẹpo yẹwhenọ nọ yí na ede. Mọwẹ yé to wiwà to Ṣilo hlan Islaelinu lẹ he wá finẹ lẹpo.

¹⁵ Nugbo, whẹpo yé do nọ mè ojó lọ, devi yẹwhenọ tọn nọ wá, bo nọ dọ hlan omẹ he sanvọ̀ dọ, Na olàn nado mẹ̀ na yẹwhenọ; na ewọ ma na yí olàn akúnsìnnọ sọn asi we gba, adavo omú

¹⁶ Eyín omẹ lọ sọ dọ hlan ẹn dọ, Yé na mẹ̀ ojo lọ dinviedinvie, whenenu bo yí sùsọ ehe ayiha towe jlo; whenẹnu ewọ na dọmọ, Lala, adavo hiẹ na ẹn mi dinvie: eyín a kò, yẹn na yí i gbọn Adán dali.

¹⁷ Ylando yọ̀pọ Sunnu ewlẹ tọn sọ yín dahò tàla to OKLUNỌ nukọn: na gbẹtọ lẹ to avọ̀ nuna OKLUNỌ tọn vlẹ.

¹⁸ Dinvie Samuẹli to devizọ̀nwà to OKLUNỌ nukọn, yínyín yọ̀pọ de, yè yí efọdi alavọ̀ tọn de do blagbaja nẹ̃.

¹⁹ Humọ onọ etọn basi tewu de nẹ, bo nọ hẹn ẹn wá nẹ̃ whèmẹ whèmẹ, whenuena ewọ hẹaga wá po asú etọn po nado na avọ̀sannu whèmẹ tọn lọ.

²⁰ Eli sọ dona Ẹlkana po asi etọn po, bo dọmọ, OKLUNỌ na okún we sọn nawe he de na núyìnyan he yè whé hlan OKLUNỌ. Yé SỌ yì owhé yetọn lọsu gbè.

²¹ OKLUNỌ dla Hanna pọ̀n, é sọ mọhò, bo ji visunnu atọ̀n po viyọnnu awe po. Ovi Samuẹli sọ whẹ́n to OKLUNỌ nukọn.

²² Dinvie Eli yín yònhonọ tàla; é sọ sè onú lẹpo he visunnu etọn lẹ to wiwà hlan Islaeli lẹpo, podọ le yé to hòdo hẹ yọnnusi he sinsẹ̀nzọ̀n wà to ohòn gohò pipli tọn tọn ji lẹ do.

²³ Ewọ sọ dọ hlan yé dọ, Etẹwutu wẹ míwlẹ to onú mọnkọ lẹ wà? na yẹn to zinzán ylankan mìtọn tọn sè sọn gbẹtọ he lẹpo de

²⁴ Lala, visunnu ṣie emi; na é ma yín lìnlìn dagbe de wẹ yẹn to sisè gba: míwlẹ to omẹ OKLUNỌ tọn lẹ hẹn nado to ylankan wà.

²⁵ Eyín omẹ de wàylando do mẹawetọ, Jiwheyẹwhe na dawẹ̀na ẹn: ṣigba eyín omẹ de wàylando do OKLUNỌ, menu wẹ na vẹ̀vẹ̀ na ẹn? Ṣogán yé ma tuntóai hlan ogbè otọ́ yetọn tọn gba, na OKLUNỌ na hù yé wutu.

²⁶ Ovi lọ Samuẹli sọ to whinwhẹn, bo sọ tin to nukundagbe mẹ to OKLUNỌ de podọ to gbẹtọ lẹ de ga.

²⁷ Omẹ Jiwheyẹwhe tọn de sọ wá Eli de, bo do hlan ẹn dọmọ, Le wẹ OKLUNỌ dọ, Be yẹn do dẽ hia hlan owhé otò towe tọn, whenuena yé tin to Egipti to mẹglọnọ mẹ hlan owhé Falo tọn?

²⁸ Be yẹndè e sọn whẹndo Islaeli tọn lẹpo mẹ nado yín yẹwhenọ ṣie, nado hẹji yì agbà ṣie ji, nado nọ mẹ̀nuwhénwan, nado nọ do ẹfodi to nukọn ṣie? Be yẹn na hlan owhé otò towe tọn avọ̀ nunina ovi Islaeli tọn lẹ tọn lẹ he yè basi gbọn miyọn dali?

²⁹ Etẹwutu wẹ míwlẹ sẹ́whẹ̀ do avọ̀ ṣie podọ do nunina ṣie, he yẹn ko degbèna to fininọ̀ ṣie mẹ; bo gbogbóna visunnu towe hú mi, nado yí avọ̀ nunina whanpẹnọ Islaeli ome ṣie lẹ tọn lẹpo do hẹn mìde dojó?

³⁰ Enẹwutu OKLUNỌ, Jiwheyẹwhe Islaeli tọn, dọmọ, Yẹn dọ nugbonugbo dọ owhé towe, po owhe otọ̀ towe tọn po, na nọ zinzonlin to nukọn ṣie kakadoi: ṣigba dinvie OKLUNỌ dọmọ, E ni tin dẹn do mi; na yé he gbògbóna mi lẹ wẹ yẹn na gbògbéna, yé he sọ vlẹ mi lẹ wẹ yè ma na hòpón.

³¹ Dayi e go, azán lẹ wá, bọ yẹn na sán awà towe sẹ́, po awà owhé otọ́ towe tọn tọn po, bọ omẹ hóhó de ma na tin to owhé towe gbè

³² Hiẹ na sọ dayi nukunbibia fíninó ṣie tọn go, to adọkun lẹpo he Jiwheyẹwhe na na Islaeli mẹ: omẹ hóhó de ma na sọ tin to owhé towe gbè gbedegbede.

³³ Òmẹ sọn towe mẹ lọ, he yẹn na sán sẹ́ sọn agbà ṣie kòn, na tin nado và nukun towe lẹ podọ nado hẹn ayiha towe sádi: jideji owhé towe tọn lẹpo wẹ na kú to winyanwinyan whenu yetọn tọn mẹ.

³⁴ Ehe wẹ na sọ yín ohia hlan we, he na wá visunnu towe awe lẹ ji, Họfni po Finehasi po ji; azán dopo mẹ yé omẹ awe lẹ na kú.

³⁵ Yẹn na sọ zé yẹwhenọ dódónọ de tite na mi, he na wà kẹdẹdi enẹ he tin to ayiha ṣie mẹ podọ to ojlo ṣie mẹ: yẹn na sọ gbá ohọ́ gangán de nẹ̃; é na sọ to zọnlinzin to mẹyíamisisádodè ṣie nukọn kakadoi.

³⁶ E na sọ wá jọ, dọ omẹ he yè na pòdai to owhé towe gbè lẹ na wá bo dó hlan ẹn na fataka vude po agó akla tọn de po, bo na dọmọ, Yl mi do azọ́nhọ yẹwhenọ tọn de mẹ, yẹn vé we, na yẹn nido dù nùdo akla tọn de.