1 SAMUẸLI 15 - BIBLU WIWE LỌ 1923

¹ Samuẹli sọ dọ hlan Sauli dọ, OKLUNỌ do mi hlan nado samisisána we nado yín ahọlu to omẹ etọn lẹ ji, to Islaeli ji: enẹwutu dinvie hiẹ ni tuntóai hlan ogbè ohó OKLUNỌ tọn tọn go.

² Le wẹ OKLUNỌ awhànpa lẹ ton dọ, Yen ko ṣinyandola enẹ he Amalẹki wà hlan Islaeli, le é dè ede do e ji to aliho do, whenuena é hẹji tòn sọn Egipti ja.

³ Dinvie yì bo hò Amalẹki, bo và onú he yé tindo lẹpo gbidigbidi, a hla yé dai blo; aigba hù sunnu po yọnnu po, yọ̀pọ po vianònu po, oyín po lẹngbọ po, kanklosọ-póawenọ po kẹtẹkẹtẹ po.

⁴ Sauli sọ ylọ gbẹtọ lẹ pli, bo hia yé to Tetaimi mẹ, afọnọ fọtọ̀n fọde, po fọtọ̀n ao omẹ Juda tọn lẹ po.

⁵ Sauli sọ wá tòdaho Amalẹki tọn mẹ, bo và dọ owu mẹ to agbàdò mẹ.

⁶ Sauli sọ dọ hlan Kẹninu lẹ dọmọ, Mì yì, tònyì, mì jẹte yì sọn Amalẹkinu lẹ ṣẹnṣẹn, yẹn nikã và mìwlẹ po yé po: na mìwlẹ do homẹhùn hia ovi Islaeli tọn lẹpo, whenuena yé hẹaga tòn ja sọn Egipti. Mowẹ Kẹninu lẹ tònyì sọn Amalẹkinu lẹ ṣẹnṣẹn.

⁷ Sauli sọ hò Amalẹkinu lẹ sọn Havila le hiẹ jei Ṣuli, he tin to Egipti nukọn.

⁸ Ewọ sọ wlé Agagi ahọlu Amalẹkinu lẹ tọn gbẹ̀te, bo yí onù ohi tọn do và gbẹtọ lẹpo gbidigbidi.

⁹ Ṣigba Sauli po gbẹtọ lẹ po Agagi dai, podọ dagbe talala sọn lẹngbọ lẹ mẹ, podọ sọn oyín lẹ mẹ, podọ sọn ehe dojó lẹ mẹ, po lẹngbọvu lẹ pọ, po ehe yín dagbe lẹpo po, bo ma na và yé gbidigbidi gba: ṣigba onú he yín ylanylan po gbẹ́dai lepo po, enẹ ye và gbidigbidi.

¹⁰ Whenẹnu wẹ ohó OKLUNỌ tọn wá Samuẹli de, dọmọ,

¹¹ E hẹn mi diọlinlẹn dọ yẹn ko zé Sauli daga nado yín ahọlu: na yè ko hẹn ẹn lẹ́ sọn hihodo mi mẹ, bo ma ko sọ yí gbèdide ṣie lẹ basi gba. Samuẹli sọ yín homẹgblenanọ; é sọ to awhádo hlan OKLUNỌ to ozán nẹ lẹpo mẹ.

¹² Samueli sọ tite to flifli mẹ nado pé Sauli to afọnnu: Yè ko sọ dọ na Samuẹli, dọmọ, Sauli ko wá Kalmẹli, bo, dayi e go, é ko zé oflinnu de daga nẹ̃, yè sọ hẹn ẹn yì lépé, bo juyì nukọn bo jẹte yì Gilgali.

¹³ Samuẹli wá Sauli de: Sauli sọ dọ hlan ẹn dọ, Donanọ hiẹ yín sọn OKLUNỌ de: yẹn ko yí gbèdide OKLUNỌ tọn basi.

¹⁴ Samuẹli sọ dọmọ, Be eté wẹ ogbè lẹngbọ lẹ tọn to otọ́ ṣie lẹ mẹ yín, po awhá oyín lẹ tọn po he yẹn to sisè?

¹⁵ Sauli sọ dọmọ, Amalẹkinu lẹ de wẹ yé hẹn yé sọn: na gbẹtọ lẹ hla dagbe talala lẹ dai sọn lẹngbọ lẹ mẹ podọ sọn oyín lẹ mẹ, nado sánvò hlan OKLUNỌ Jiwheyẹwhe towe; pipòtọ lẹ mí ko và gbidigbidi.

¹⁶ Whenẹnu wẹ Samuẹli dọ hlan Sauli dọ, Nọte, yẹn na sọ dọ na we núhe OKLUNỌ dọ hlan mi to ozán he mẹ. Ewọ sọ dọ hlan ẹn dọ, Dọ zònmí.

¹⁷ Samuẹli sọ dọmọ, Le hiẹ tlẹ yín pẹvi to nukun dewe titi tọn mẹ sọ bé yè ko yí we do basi ota whẹ̀ndó Islaeli tọn lẹ tọn? OKLUNỌ sọ samisisána we do doahọlu do Islaeli ji;

¹⁸ OKLUNỌ sọ do we hlan gbéjizọnlin de ji, bo dọmọ, Yì bo và Amẹlẹkinu ylandonọ lẹ gbidigbidi, bo sọ hòavùn hẹ yé kaka yé do yín súsúdo.

¹⁹ Whenẹnu etẹwutu hiẹ ma do sètónuna ogbè OKLUNỌ tọn, ṣigba bo zlọn jẹ ogblannu ji, bo wà enẹ he yín oylan to OKLUNỌ nukunmẹ?

²⁰ Sauli sọ dọ hlan Samuẹli dọ, Nugbo, yẹn ko sè, tónuna ogbè OKLUNỌ tọn, bo ko sọ yì aliho he é do mi hlan ji, bo ko sọ hẹn Agagi ahọlu Amalẹki tọn wá, bo ko sọ và Amalẹkinu lẹ gbidigbidi.

²¹ Ṣigba gbẹtọ lẹ yí sọn ogblannu mẹ, lẹngbọ lẹ po oyín lẹ, po, nújọnú sọn onú dodopà lẹ mẹ nado sánvò hlan OKLUNỌ, Jiwheyẹwhe towe to Gilgali.

²² Samuẹli sọ dọmọ, Bé OKLUNỌ tindo homẹhùn he klo to avọ̀ nunina mimẹ̀ lẹ mẹ po avọ̀ lẹ po di to tónusisèna ogbè OKLUNỌ tọn mẹ? Dayi e go, nado sètónu yín pònte hú avọ́, podọ nado tuntóai hú ojó agbò lẹ tọn.

²³ Na tólivivẹ tin di ylando afionnọn tọn, podọ tasinsinyẹn tin di bosiọsinsèn po hennuvodun po. Na hiẹ ko gbé ohó OKLUNỌ tọn dai wutu, ewọ ga ko sọ gbé we dai sọn yínyín ahọlu mẹ.

²⁴ Sauli sọ dọ hlan Samuẹli dọ, Yẹn ko wàylando: na yẹn ko dasa gbèdide OKLUNỌ tọn po ohó towe lẹ po: na yẹn dibusi gbẹtọ lẹ bo sọ sètónuna ogbè yetọn wutu.

²⁵ Enẹwutu dinvie, yẹn vẹ̀ we, jona ylando ṣie, bo sọ vọ́ gọ̀ po yẹn po, na yẹn nido litaina OKLUNỌ.

²⁶ Samuẹli sọ dọ hlan Sauli dọ, Yẹn ma na lẹ́gọ̀ po hiẹ po gba: na hiẹ ko gbẹ́ ohó OKLUNỌ tọn dai, OKLUNỌ ko sọ gbẹ́ we dai sọn yínyin ahọlu to Islaeli ji mẹ.

²⁷ Le Samuẹli sọ lẹ́ godo nado tón yì, é tẹ́ do tónu awu etọn tọn go, bọ é sọ tlẹn.

²⁸ Samuẹli sọ dọ hlan ẹn dọ, OKLUNỌ ko tlẹn ahọludu Islaeli tọn lọ sọn de we to azàn he gbè, bo ko sọ na ẹn hlan kọmẹnu hiẹ tọn de, he yín pónte hú hiẹ.

²⁹ Podọ ga Huhlọn Islaeli tọn ma lalo na do kavi diọlinlẹn gba: na ewọ ma yín gbẹtọ de bọ ewọ na do diọlinlẹn.

³⁰ Whenẹnu wẹ é dọmọ, Yẹn ko wàylando: gãnṣo yẹn vẹ̀ we, gbògbéna mi dinvie, to mẹho ome ṣie lẹ tọn lẹ nukọn, podọ to Islaeli nukọn; bo sọ vọ́ gọ̀ po yẹn po, na yẹn nido litaina OKLUNỌ Jiwheyẹwhe towe.

³¹ Mowẹ Samuẹli sọ vó gò hodo Sauli; Sauli sọ litaina OKLUNỌ.

³² Whenẹnu wẹ Samuẹli dọmọ, Mì hẹn Agagi ahọlu Amalẹkinu lẹ tọn wá dẽ to file. Agagi sọ wá e de po awuvivi po Agagi sọ dọmọ, Yè hẹn ovivé okú tọn fè nugbonugbo.

³³ Samuẹli sọ dọmọ, Le ohi towe lẹ ko hẹn yọnnu lẹ yín vimatinnọ, mọwẹ onọ towe na yín vimatinnọ to yọnnu lẹ ṣẹnṣẹn do. Samuẹli sọ já Agagi do flínflín to OKLUNỌ nukọn to Gilgali.

³⁴ Whenẹnu wẹ Samuẹli yì Lama; Sauli sọ hẹji yì owhé etọn gbè to Gibea Sauli tọn mẹ

³⁵ Samuẹli ma sọ wá nado pọ́n Sauli ba kaka jẹ azán okú etọn tọn gbè; na Samuẹli blawu na Sauli: OKLUNỌ sọ diọlinlẹn dọ ewọ ko yí Sauli do basi ahọlu to Islaeli ji.