1 SAMUẸLI 14 - BIBLU WIWE LỌ 1923

¹ DINVIE éjẹ azán degbè, bọ Jonatani visunnu Sauli tọn dọ hlan yọ̀pọ depẹ he hẹn awhàngbaja etọn dọ, Wá bo gbọ mí ni yì towhan Filistini lẹ tọn gododọ̃n, he tin to adà dọntọn ji. Ṣigba é ma dọ na otọ etọn gba.

² Sauli sọ tin to agapatapata adà Gibea tọn to atin pomẹglanate glọ he tin to Miglọni mẹ: gbẹtọ he tin to e de lẹ yín sunnusi nuọntọ̀n nkọ;

³ Ahija, visunnu Ahitubi tọn, nọvisunnu Ikabọdi tọn, visunnu Finehasi tọn, visunnu Èli tọn, yewhenọ OKLUNỌ tọn to Ṣilo mẹ, to efodi de do. Gbẹtọ lẹ ma sọ yọnẹn dọ yè ko hẹn Jonatani yì gba.

⁴ To gòzizẹ lẹ ṣẹnṣẹn, ehe dali Jonatani din nado yì tòwhàn Filistini lẹ tọn gododọ̃n, osé tlóntlón de tin to awà ode ji, osé tlóntlón de sọ tin to awà awetọ ji: oyín ode tọn nọ yín Bozẹzi, oyín awetọ tọn Senẹ.

⁵ Tlóntlón ode fọ́n yìaga to agewaji go to nukọn Mikinasi tọn, awetọ to hùwaji go to nukọn Geba tọn.

⁶ Jonatani sọ dọ hlan yọ̀pọ dẹpẹ he hẹn awhàngbaja etọn dọ, Wá bo gbọ mí ni yì towhàn whèmagbonọ helẹ tọn de to gododọ̃n: é sọgan yín dọ OKLUNỌ na wàzọn na mí: na oglọn de ma tin hlan OKLUNỌ gba nado whlẹn gbọn susu dali kavi gbọn vude dali.

⁷ Awhàngbaja hẹntọ etọn sọ dọ hlan ẹn dọ, Wà ehe tin to ayiha towe mẹ lẹpo: lé dewe, dayi e go yẹn tin to de we kẹdẹdi ayiha towe.

⁸ Whenẹnu wẹ Jonatani dọmọ, Dayi ego, míwlẹ na juyì omẹ ewlẹ de to gododọ̃n, mí na do mìde hia hlan yé.

⁹ Eyín yé dọ le hlan mí dọ, Mì dọ̀ngbàn kaka míwlẹ ni do wá mì de; whenẹnu míwlẹ na site abọẹ to otẹn mìtọn mẹ, bo ma na heji yi yé de gba.

¹⁰ Ṣigba eyín yé dọ le dọ, Mì hẹaga wá mí de; whenẹnu míwlẹ na hẹaga yì: na OKLUNỌ ko jó yé do alọ mìtọn mẹ: ehe wẹ na sọ yín ohia hlan mí.

¹¹ Yé omẹ awelẹ sọ do yéde hia hlan tòwhàn Filistini le tọn: Filistini lẹ sọ dọmọ, Dayi e go, Heblu lẹ tọ́n wá sọn odò le mẹ fie yé ko whla yéde do.

¹² Omẹ towhàn tọn lẹ sọ gblọnna Jonatani po awhàngbajahẹntọ eton po, bo dọmọ, Mì hẹji wá mí de, mìwlẹ na sọ do onú de hia mì. Jonatani sọ dọ hlan awhàngbajahẹntọ etọn dọ, Hẹji wá hodo mi: na OKLUNỌ ko jó yé do alọ Islaeli tọn mẹ.

¹³ Jonatani sọ sáklegbé yì aga po awhàngbajahẹntọ etọn po to godo nẹ: yé sọ jai to Jonatani nukọn; awhàngbajahẹntọ etọn sọ to yé hù to ewọ godo.

¹⁴ Hùhù tintan nẹ, ehe Jonatani po awhàngbajahẹntọ etọn po basi, yín sunnusi oko nkọ, to homẹ taidi odá whẹndọvlọ de tọn to glegban aigba tọn de mẹ.

¹⁵ Sisọsisọ de sọ tin to osla mẹ, to danji, podọ to gbẹto lẹpo ṣẹnṣẹn; tòwhàn lọ, po gblandùtọ lẹ po, yéwlẹ ga to sisọsisọ: aigba sọ sisọ; Mowẹ aigba sisisọ daho talala de sọ tin.

¹⁶ Hihọtọ Sauli tọn to Gibea Bẹnjamini tọn mẹ sọ pọ́n; bo, dayi e go, agùndaho lọ sọ yọ́ kọ̀nyìngbé, ye sọ to odé po odọ́n po yì.

¹⁷ Whenẹnu wẹ Sauli dọ hlan omẹ he tin to e de lẹ dọ, Mì hia dinvie, bo pọ́n mẹnu wẹ yì sọn mí de. Whenuena yé sọ hia, dayi e go, Jonatani po awhàngbajahẹntọ etọn po ma tin to finẹ gba.

¹⁸ Sauli sọ dọ hlan Ahija dọ, Hẹn alki Jiwheyẹwhe tọn wá file. Na alki jiwheyẹwhe tọn tin finẹ to ojlẹ nẹ mẹ to ovi Islaeli tọn lẹ de.

¹⁹ E sọ wá jọ, whenuena Sauli dọhó hlan yẹwhenọ lọ, wẹ zinzinyìnyẹn he tin to osla Filistini lẹ tọn mẹ to yìyì bo sọ to susudeji: Sauli sọ dọ hlan yẹwhenọ lọ dọ, Dòn alọ towe do godo.

²⁰ Yè sọ dòn Sauli po omẹ he tin to e de lẹpo po plidopọ, bo wá awhànfuntẹn: bo, dayi e go, ohi omẹ dopodopo tọn tin to hatọ etọn: ji, gbìgbà daho talala de sọ tin.

²¹ Dinvie Heblu he ko tin to Filistini lẹ de daidai, he heji yì po yé po biọ osla mẹ sọn oto mẹ lẹdo, yéwlẹ ga lé nado tin to Islaelinu lẹ de he tin to Sauli po Jonatani po de.

²² Mọkẹdẹ omẹ Islaeli tọn lẹpo he ko whla yéde do otò okọta Eflaimi tọn mẹ, whenuena yé sọ sè dọ Filistini lẹ họ̀nyì, yèdọ yéwlẹ ga domọna yé sinyẹnsinyẹn to awhànfuntẹn.

²³ Mowẹ OKLUNỌ whlẹn Islaeli do to azán nẹ gbè: awhàn sọ ju gbọn Bẹti-aveni gododọ̃n dali.

²⁴ Yè bo hẹn nukunbia omẹ Islaeli tọn lẹ to azán nẹ gbè: ṣigba Sauli hòdòdo gbẹtọ lọ, dọmọ, Dèhodonọ omẹ lọ yín he dù núdùdù depope kaka é do yín whèjai, bọ yè yíahọsu ṣie to kẹ̀ntọ ṣie lẹ go. Mọwẹ gbẹtọ lọ ma dò núdùdù de pọ̀n.

²⁵ Gbẹtọ lẹpo sọ wá biọ zùnkàn mẹ; owín sọ tin to aigba ji.

²⁶ Whenuena gbẹtọ lẹ wá zùnkàn mẹ, dayi e go, owín to kùnkùn: ṣigba omẹ de ma yí alọ etọn do onù etọn go gba; na gbẹtọ lọ dibusi whiwhle lọ.

²⁷ Ṣigba Jonatani ma sè whenuena otọ̀ etọn yí whiwhle do nasẹ gbẹtọ lẹ gba: enẹwutu wẹ ewọ dè obẹ̀ opò he tin to alọ etọn mẹ tọn jẹgbonu, bo ylọn ẹn do owínja lọ mẹ, bo yí alọ etọn do onù etọn; yè sọ hẹn nukun etọn lẹ hònun.

²⁸ Whenẹnu dopo sọn gbẹtọ lẹ mẹ gblọn, bo dọmọ, Otọ̀ towe ko yí whiwhle vivẹ̀ do naṣẹ gbẹtọ lọ, dọmọ, Dèhodonọ omẹ lọ yín he dù núdùdù to azán he gbè. Gbẹtọ lẹ sọ yín madogánnọ.

²⁹ Whenẹnu wẹ Jonatani dọmọ, Otò ṣie to tuklado (aigba) otò: pòn, yẹn vè we, le yè hẹn nukun ṣie lẹ hònun do, na yẹn dò vude pòn sọn owín he mẹ wutu.

³⁰ Nẹmunẹmu, eya eyín gbẹtọ lọ ko yí vivẹ́ do dù to egbé sọn ogblannú kẹ̀ntọ yetọn lẹ tọn mẹ, he yé ko dinmọ? na dinvie hùhù daho de ma ko tin to Filistini lẹ ṣẹnṣẹn gba.

³¹ Yé sọ hò sọn Filistini lẹ mẹ to gbenẹgbe sọn Mikmaṣi jẹ Aijalọni: gbẹtọ lẹ sọ yín madogánnọ.

³² Gbẹtọ lọ sọ zlọn jẹ ogblannú lọ ji, bo bẹ̀ lẹngbọ lẹ, po oyín lẹ po, po yìnvu lọ po, bo hù yé do aigba ji: gbẹtọ lẹ sọ dù yé po ohùn po.

³³ Whenẹnu yé dọ na Sauli, dọmọ, Dayi e go, gbẹtọ lẹ wàylando do OKLUNỌ go, to ehe mẹ yé dù po ohùn po. Ewọ sọ dọmọ, Mìwlẹ ko yí oylan do zán: mì bli zannu daho de hlan mi to azán he gbè.

³⁴ Sauli sọ dọmọ, Mì ni vlẹ mìde to gbẹtọ lọ ṣẹnṣẹn, bo dọ hlan yé dọ, Omẹ dopodopo ni hẹn oyín etọn wá dẹ̃ to file, podọ omẹ dopodopo lẹngbọ etọn, bo hù yé to ofi, bo dù; bo ma wàylando do OKLUNỌ go to dùdù po ohùn po mẹ blo. Gbẹtọ lẹpọ sọ hẹn wá omẹ dopodopo oyín etọn po e po to ozán nẹ mẹ, bo sọ hù yé to finẹ.

³⁵ Sauli sọ dó agbà de hlan OKLUNỌ: dopolọ wẹ agbà tintan he ewọ dó hlan OKLUNỌ.

³⁶ Sauli sọ dọmọ, Gbọ mi ni jẹte yànmọna Filistini lẹ to ozán mẹ, bo hẹn yé gble kakajẹ afọnnu hinhọ́n, a dike mí pò omẹ de dai to yé mẹ blo. Yé sọ dọmọ, Wà nudepope he sọawuhia dagbe hlan we. Whenẹnu wẹ yẹwhenọ lọ dọmọ, Gbọ mí ni dòn sẹpò file hlan Jiwheyẹwhe de.

³⁷ Sauli sọ kàn hónamẹ biọ sọn Jiwheyẹwhe de dọ, Yẹn na jẹte yì Filistini lẹ de? hiẹ na jó yé do alọ Islaeli tọn mẹ? Ṣigba ewọ ma gblọn nẹ to azán nẹ gbè gba

³⁸ Sauli sọ dọmọ, Dòn sẹpò file, mì ogán gbẹtọ lẹpo tọn emi: bo yònẹn bo sọ mọ fìemẹ ylando he ko tin te to azán he gbè.

³⁹ Na, le OKLUNỌ togbẹ̀, he whlẹn Islaeli, yín é tlẹ yín to Jonatani visunnu ṣie mẹ, ewọ na kú dandan. Ṣigba omẹ de ma tin to gbẹtọ lẹpo ṣẹnṣẹn he gblọn nẹ̀.

⁴⁰ Whenẹnu wẹ ewọ dọ hlan Islaeli lẹpo dọ, Mì omẹ pó nọ awà dopo ji, yẹn po Jonatani visunnu ṣie po na sọ tin to awà awetọ ji. Gbẹtọ lẹ sọ dọ hlan Sauli dọ, Wà núhe sọawuhia dagbe hlan we.

⁴¹ Enẹwutu Sauli dọ hlan OKLUNỌ Jiwheyẹwhe Islaeli tọn dọ, Do ojlọjẹ hia. Yè sọ yí Jonatani po Sauli po gbọn ovò dali: ṣigba gbẹtọ lẹ hòngán.

⁴² Sauli sọ dọmọ, Devò lẹ to yẹn po Jonatani visunnu ṣie po ṣẹnṣẹn. Yè sọ yí Jonatani.

⁴³ Whenẹnu wẹ Sauli dọ hlan Jonatani dọ, Dọ na mi núhe hiẹ ko wà. Jonatani sọ dọ họ̀, bo dọmọ, Nugbonugbo yẹn yí obẹ̀ opò he tin to alọ ṣie mẹ tọn do dọ̀ owín vude pọ̀n; bo, pọ̀n, Yẹn mànanọma kú gba.

⁴⁴ Sauli sọ dọmọ, Jiwheyẹwhe ni wà mọ podọ húmọ ga: na hiẹ na kú dodo, Jonatani.

⁴⁵ Gbẹtọ lẹ sọ dọ hlan Sauli dọ, Be Jonatani na kú, mẹhe ko basi whlẹngan daho he to Islaeli mẹ? Jiwheyẹwhe dike blo: le OKLUNỌ togbẹ̀, odà dopo sọn ota etọn ma na flẹ́ jẹ aigba gba; na ewọ ko wàzòn hẹ Jiwheyẹwhe to azán he gbè. Mowẹ gbẹtọ lẹ tutlu Jonatani, bọ ewọ ma do kú.

⁴⁶ Whenẹnu wẹ Sauli hẹji yì sọn mọyànna Filistini lẹ mẹ: Filistini lẹ sọ yì otẹn yetọn titi mẹ.

⁴⁷ Dinvie whenuena Sauli ko yí ahọludu to Islaeli ji, é hòavùn hẹ kẹ̀ntọ etọn lẹpo to awà lẹpo ji, hẹ Moabi, podọ hẹ ovi Ammọni tọn lẹ, podọ hẹ Edọmi, podọ hẹ ahọlu Zoba tọn lẹ, podọ hẹ Filistini lẹ: fidepope é lẹ́ ede hlan, é nọ hẹnhomẹgble yé.

⁴⁸ E sọ yí hlọnhlọn do wà, bo hò Amalẹkinu lẹ, bo whlẹn Islaeli sọn alọ yé he to yé hẹngble lẹ tọn mẹ.

⁴⁹ Dinvie visunnu Sauli tọn lẹ wẹ Jonatani, po Isivi po, po Malkisua po: oyín viyọnnu etọn awelẹ tọn wẹ ehelẹ; oyín plọnji tọn Mẹlabi, oyín nọvipẹvi tọn Mikali:

⁵⁰ Oyín asi Sauli tọn tọn wẹ Ahinoami viyọnnu Ahimaazi tọn: oyín awhàngán awhànpa etọn tọn wẹ Abneli visunnu Nẹli tọn, tavé Sauli tọn.

⁵¹ Kisi wẹ otọ̀ Sauli tọn; Nẹli otọ̀ Abneli tọn wẹ visunnu Abiẹli tọn.

⁵² Awhàn sinyẹnsinyẹn tin tọ Filistini lẹ ji to azán Sauli tọn lẹpo gbè: podọ whenuena Sauli mọ omẹ asuka depope, kavi omẹ hlọnhlọnnọ depope, é nọ yí i do e de.