1 SAMUẸLI 12 - BIBLU WIWE LỌ 1923

¹ SAMUẸLI sọ dọ hlan Islaeli lẹpo dọ, Mì dayi e go, yẹn ko tuntóai hlan ogbè mìtọn to ehe mì dọ hlan mi lẹpo mẹ, bo ko sọ basi ahọlu de do mì ji.

² Dinvie, mì dayi e go, ahọlu lọ to zọnlinzin to mì nukọn: yẹn sọ yín yónhonọ po tawhànọ po; bo, dayi e go, visunnu ṣie lẹ sọ tin to mì de: yẹn ko sọ to zọnlinzin to mi nukọn sọn ovu ṣie jẹ azán he gbè.

³ Yẹn tin to ofi: mì ni sakunnu do oji e to OKLUNỌ nukọn, podọ to mẹyíamisisádodè etọn nukọn: oyín mẹnutọn wẹ yẹn ko yí? kavi kẹtẹkẹtẹ mẹnutọn wẹ yẹn ko yí? kavi mẹnu wẹ yẹn ko hòdù? mẹnu wẹ yẹn ko bianukunna? kavi alọ mẹnutọn mẹ wẹ yẹn ko yi núblá de sọn nado yí do hẹn nukun ṣie lẹ tón? yẹn na sọ gò ẹ jo na mì

⁴ Yé sọ dọmọ, Hiẹ ma hò mí dù gba, kavi bianukunna mí, mọ hiẹ ma sọ yi núde sọn alọ mẹdepope tọn mẹ gba.

⁵ E sọ dọ hlan yé dọ, OKLUNỌ yín kunnusatọ to mì ji, mẹyíamisisádodè etọn sọ yín kunnusatọ to azán he gbè, de mì tọn ma mọ núde to alọ ṣie mẹ gba. Yé sọ dọmọ, Ewọ yín kunnusatọ.

⁶ Samueli sọ dọ hlan gbẹtọ lẹ dọ, OKLUNỌ wẹ mẹhe dè Moṣe po Aalọn po, podọ he hẹn otọ́ mìtọn lẹ hẹji tón sọn aigba Egipti tọ́n ji wá.

⁷ Enẹwutu dinvie mì ṣite abọẹ, na yẹn nido yíhódọ hẹ mì to OKLUNỌ nukọn gbọn owàlọ dódónọ OKLUNỌ tọn lẹpo tọn dali, he ewọ wà hlan mì podọ hlan otọ́ mìtọn lẹ.

⁸ Whenuena yè hẹn Jakobu wá biọ Egipti, bọ otọ́ mìtọn lẹ dawhá hlan OKLUNỌ, whenẹnu wẹ OKLUNỌ do Moṣe po Aalọn po hlan, mẹhe hẹn otọ́ mìtọn lẹ tónjẹgbonu sọn Egipti, bo hẹn yé nado nọnọ̀ otẹn he mẹ.

⁹ Ṣigba yé wọnji OKLUNỌ Jiwheyẹwhe yetọn go, ewọ sọ sà yé do alọ Sisela tọn mẹ, awhàngán awhànpa Hazoli tọn tọn, po dọ do alọ Filistini lẹ tọn mẹ, po dọ do alọ ahọlu Moabi tọn tọn mẹ, yé sọ hòavùn hẹ yé.

¹⁰ Yé sọ dawhá hlan OKLUNỌ, bo dọmọ, Míwlẹ ko wàylando, na míwlẹ ko gbẹ́ OKLUNỌ dai wutu, bo ko to Baali, mi po Asitalọti po sẹ́n: ṣigba dinvie whlẹn mí sọn alọ kẹ̀ntọ mìtọn lẹ tọn mẹ, mí na sọ nọ sẹ́n we.

¹¹ OKLUNỌ sọ do Jelubbaali hlan, po Bedani po, po Jẹfta po, po Samuẹli po, bo whlẹn mì sọn alọ kẹ̀ntọ mìtọn lẹ tọn mẹ to awà lẹpo ji, mìwlẹ sọ to jijọho mẹ nọ̀.

¹² Whenuena mìwlẹ sọ mọ dọ Nahasi ahọlu ovi Ammọni tọn tọn lẹ wá mì ji, mìwlẹ dọ hlan mi dọ, Lala, ṣigba ahọlu de na dugán tò mí ji: whenuena OKLUNỌ Jiwheyẹwhe mìtọn yín ahọlu mìtọn.

¹³ Enẹwutu dinvie mì dayi ahọlu mẹhe míwlẹ ko dè go, podọ mẹhe mìwlẹ ko biọ: bo, dayi e go, OKLUNỌ ko yí ahọlu de do mì ji.

¹⁴ Eyín mìwlẹ na dibusi OKLUNỌ, bo nọ sẹ́n ẹn, bo tuntóai hlan ogbè etọn, bo ma ṣiatẹ hẹ gbèdide OKLUNỌ tọn, bọ mìwlẹ po ahọlu lọ po ga he dugán to mì ji yín mẹhodotọ OKLUNỌ Jiwheyẹwhe mìtọn tọn, dagbe wẹ:

¹⁵ Ṣigba eyín míwlẹ ma na tuntóai hlan ogbè OKLUNỌ tọn gba, ṣigba bo ṣiatẹ hẹ gbèdide OKLUNỌ tọn, whenẹnu wẹ alọ OKLUNỌ tọn na tin to mì go, dile é ko tin to otọ́ mìtọn lẹ go do.

¹⁶ Enẹwutu dinvie mì site abọẹ bo mọ onú daho he, ehe OKLUNỌ na wà to nukun mìtọn lẹ nukọn

¹⁷ E ma yín ojijẹ oli tọn gbè wẹ egbé? Yẹn na ylọ hlan OKLUNỌ, na é nido do osò po jikun po hlan; mìwlẹ na sọ yọnẹn bo mọ dọ kiklo wẹ kanyinylan mìtọn, ehe mì ko wà to nukun OKLUNỌ tọn mẹ to bibiọ ahọlu de na mì mẹ.

¹⁸ Mowẹ Samuẹli ylọ hlan OKLUNỌ; OKLUNỌ sọ do osò po jikun po hlan to azán nẹ gbè: gbẹtọ lẹpo sọ dibusi OKLUNỌ talala po Samuẹli po.

¹⁹ Gbẹtọ lẹpo sọ dọ hlan Samuẹli dọ, hodọ́ na devi towe lẹ hlan OKLUNỌ Jiwheyẹwhe towe, dọ mí kú blo: na míwlẹ ko dèdogó ylando mìtọn lẹpo oylan he, nado biọ ahọlu de na mí.

²⁰ Samueli sọ̀ dọ hlan gbẹtọ lẹ dọ, Mì dibu blo: mìwlẹ ko wà oylan he lẹpo nugbonugbo: gãnṣo mìwlẹ lẹ́ sọn OKLUNỌ hihodo mẹ blo, ṣigba mì ni yí ayiha mìtọn lẹpo do to OKLUNỌ sẹ́n;

²¹ Mì lẹ́ do apadopo blo: na whenẹnu wẹ mì na wá hodo onu ovọ́ lẹ he ma sọgan doale kavi whlẹn, na ovọ́ wẹ yé.

²² Na OKLUNỌ ma to na gbé omẹ etọn lẹ dai gba na oyín dahó etọn tọn wutu: na é ko hẹnhomẹhùn OKLUNỌ nado yí mì do basi gbẹtọ de hlan ede.

²³ Humọ, na yẹn tọn, Jiwheyẹwhe dike blo bọ yẹn na do wàylando do OKLUNỌ go to alọdote mẹ nado hodó na mì: ṣigba yẹn na nọ plọnayiha mì to aliho dagbe po jijlọ po mẹ

²⁴ Kiki mì ni nọ dibusi OKLUNỌ kẹdẹ, bo sọ nọ yí ayiha mìtọn lẹpo do nọ sẹ́n ẹn: na mì ni lẹn le onú he é ko wà na mì lẹ klo sọ.

²⁵ Ṣigba eyín mìwlẹ gbẹ́ sọ yí ylankan do to wiwà, yè na sú mì do, míwlẹ po ahọlu mìtọn po.