1 SAMUẸLI 11 - BIBLU WIWE LỌ 1923

¹ WHENẸNU wẹ Nahasi Ammọninu hẹaga wá, bo doalo Jabẹsi-gileadi ji: Omẹ Jabẹṣi tọn lẹpo sọ dọ hlan Nahasi dọ, Basi alẹ̀nù de hẹ mí, míwlẹ na sọ nọ sẹ́n we.

² Nahaṣi Ammọninu lọ sọ dọ hlan yé dọ, Ehe tamẹ wẹ yẹn na basi alẹ̀nù hẹ mì te, dọ adusi nukun mìtọn lẹpo ni yín didè sẹ́; yẹn na sọ sọ ẹ dai na ovlẹ de do Islaeli lẹpo ji.

³ Mẹho Jabẹṣi tọn lọ sọ dọ hlan ẹn dọ, Na azán ṣinawe agọ̀jijo tọn mí, na mí nido do mẹdagun lẹ hlan agboji Islaeli tọn lẹpo: whenẹnu, eyín mẹde ma tin nado whlẹn mí, míwlẹ na tón jẹgbonu wá de we.

⁴ Whenẹnu wẹ mẹdagun lẹ wá Gibea Sauli tọn, bo dọ ohó helẹpo to otó gbẹtọ ewlẹ tọn lẹ mẹ; gbẹtọ lẹpo sọ zé ogbè yetọn daga, bo viavi.

⁵ Bo, dayi e go, Sauli hodo oyìnsu lẹ sọn danji ja; Sauli sọ dọmọ, Etẹ́ wẹ jọ do gbẹtọ lẹ go bọ yé do to avivi? Yé sọ dọ ohó Omẹ Jabẹṣi tọn lẹ tọn lẹ na ẹn.

⁶ Gbigbọ OKLUNỌ tọn sọ yí huhlọn do wá Sauli ji whenuena é sè ohó nẹlẹ, yè sọ hẹn adi etọn jimiyọn talala.

⁷ E sọ yí glepònu oyín lẹ tọn de, bo sán yé do flinflin bo bẹ́ yé hlan agboji Islaeli tọn lẹpo lẹ́do gbọn alọ mẹdagun lẹ tọn mẹ, dọmọ, Mẹdepope he ma tón wá Sauli po Samuẹli po godo, mọwẹ yè na wà hlan oyín etọn lẹ do. Obu OKLUNỌ tọn sọ jẹ gbẹtọ lẹ ji, yé sọ tọ́n wá di omẹ dopo.

⁸ Ewọ sọ hia yé to Bezeki mẹ; ovi Islaeli tọn lẹ yín fọtọ́n fọdekanweko, omẹ Juda tọn lẹ yín fọtọ́n ogbàn.

⁹ Yé sọ dọ hlan mẹdagun he wá lẹ, dọ, Le wẹ mì na do hlan omẹ Jabẹsi-gìleadi tọn lẹ, dọ, To osọ̀, to ojlẹ whenuena yè hẹn owhè hùnmiyọn, míwlẹ na tindo whlẹngan. Medagun lẹ sọ wá bo dọ na omẹ Jabẹṣi tọn lẹ; yé sọ yín homẹhùnnọ.

¹⁰ Enẹwutu omẹ Jabẹṣi tọn lẹ dọmọ; to osò, míwlẹ na tón wá mì de, míwlẹ na sọ wà hẹ mí ehe sọawuhia dagbe hlan mì lẹpo.

¹¹ E sọ yín mọ to aihọngbe, wẹ Sauli yí gbẹtọ lẹ do ogbẹ́ atọ̀n mẹ; yé sọ wá biọ gblagbla osla lọ tọn mẹ to hihó afọnnu tọn mẹ, bo họ̀ Ammọninu lẹ kakajẹ yozo okle tọn mẹ: é sọ wá jọ, na yè vúnvún yé mẹhe pò lẹ, sọmọ dọ yè ma jo awe sọn yé mẹ dai dopọ gba.

¹² Gbẹtọ lẹ sọ dọ hlan Samuẹli bọ, Mẹnu wẹ ewọ he dọmọ, Be Sauli na dugán to mí ji wẹ? hẹn omẹ ewlẹ wá, na mí nido hù yé.

¹³ Sauli sọ dọmọ, Yè ma na hù omẹ de to azán he gbè gba: na egbé wẹ OKLUNỌ basi whlẹngan to Islaeli mẹ.

¹⁴ Whenẹnu wẹ Samuẹli dọ hlan gbẹtọ lẹ dọ, Mì wá bo gbọ mí ni yì Gilgali, bo hẹn ahọludu jẹyọyọ́ to finẹ.

¹⁵ Gbẹtọ lẹpo sọ yì Gilgali; finẹ wẹ yé sọ yí Sauli do basi ahọlu te to OKLUNỌ nukọn to Gilgali mẹ; finẹ wẹ yé sọ na avọ́ nunina jijọho tọn lẹ te to OKLUNỌ nukọn; finẹ wẹ Sauli po omẹ Islaeli tọn lẹpo po jaya te talala.