1 SAMUẸLI 10 - BIBLU WIWE LỌ 1923

¹ WHENẸNU wẹ Samuẹli yí ogò amisìsá tọn lọ, bo kọ́n ẹn do ota nẹ̃, bo donùnùgo nẹ̃, bo dọmọ, Be é ma yín dọ OKLUNỌ wẹ ko samisisána we nado yín ahọvi to ogú etọn ji?

² Whenuena yè hẹn we yì sọn dẽ to egbé, whenẹnu hiẹ na mọ sunnusi awe to oyọ̀whé Lakẹli tọn dali to dògboji Bẹnjamini tọn to Zelza; yé na sọ dọ hlan we dọ, Kẹtẹkẹtẹ he hiẹ yì nado din yè ko mọ: bo, pọ́n, otọ́ towe jo núhiha kẹtẹkẹtẹ lẹ tọn dai, bo yí olẹnpọ́n na mìwlẹ tọn, dọmọ, Etẹ yẹn na wà na visunnu ṣie?

³ Whenẹnu wẹ hiẹ na to yìyì sọnfinẹ hiẹ na sọ wá oaki-tin Tabọli tọn kòn, finẹ sunnusi atọ̀n he hẹji jei Jiwheyẹwhe de to Bẹteli na pé we, ode zé gbọgbọevu atọ̀n hẹn jei, omẹ awetọ zé mlinmlin akla tọn atọ̀n hẹn jei, omẹ devo sọ zé ogò ovẹ̃n ton de hẹn jei:

⁴ yé na dọnudo we bo sọ na mlinmlin akla tọn awe we; ehe hiẹ na yí sọn alọ yetọn mẹ.

⁵ To enẹgodo hiẹ na wá okọta Jiwheyẹwhe tọn kòn, fie tòwhàn Filistini lẹ tọn te: é na sọ wá jọ whenuena yè hẹn we wá tòdaho mẹ finẹ, wẹ hiẹ na mọ ogbẹ́ Yẹwhegán lẹ tọn de to tejẹ sọn otẹn yìaga lọ mẹ ja po asiazọ́n hànjinu de po, po akóhún de po, po hànjinu okànnọ de po, po ajalẹn de po, to yé nukọn; yé na sọ to dọdaidọ:

⁶ gbigbọ OKLUNỌ tọn na sọ yí huhlọn do wa òji we, hiẹ na sọ to dọdaidọ po yé po, bo na sọ yín mẹdiọ zùn omẹ devo.

⁷ Bo gbọ é ni yín, whenuena yè hẹn ohia helẹ wá de we, wẹ hiẹ ni wà dile tẹnmẹ vò na we do, na Jiwheyẹwhe tin to de we.

⁸ Hiẹ na sọ jẹte yì Gilgali jẹnukọnna mi; bò, dayi e go, yẹn na jẹte wá de we, nado na avọ́ nunina mimẹ̀ lẹ, podọ nado na avọ́ nunina jijọho tọn lẹ: azán ṣinawe wẹ hiẹ na dọ̀ngbàn họ́, kaka yẹn na do wáde we, bo do núhe hiẹ na wà hia we.

⁹ E sọ yín mọ, dọ whenuena ewọ lẹ́ nẹgbe etọn nado yì sọn Samuẹli de, Jiwheyẹwhe na ayiha devo e: ohia nẹ lẹpo sọ wá jọ to azán nẹ gbè.

¹⁰ Whenuena yé wá finẹ to okọta kọ́n, bo, dayi e go, ogbé yẹwhegán lẹ tọn de pé e; gbigbọ OKLUNỌ tọn sọ yí huhlọn do wá e ji, ewọ sọ dọdọdai to yé ṣẹnṣẹn.

¹¹ E sọ wá jọ, whenuena yé he yọ́n ẹn daidai lẹ mọ dọ, dayi e go, ewọ to dọdaidọ po yẹwhegán lẹ po, whenẹnu wẹ gbẹtọ lẹ to didọ hlan yénọzo dọ, Etẹ́ ehe yè hẹn wá visunnu Kisi tọn de he? Sauli ga tin to yẹwhegán lẹ ṣẹnṣẹn?

¹² Mẹde sọn otẹn dopolọmẹ sọ gblọn bo dọmọ, Mẹnu ka wẹ otọ́ yetọn? Enẹwutu é lẹzùn hówhinwhẹ́n de, Sauli ga tin to yẹwhegán lẹ ṣẹnṣẹn?

¹³ Whenuena ewọ ko dotana didọdai, é wá otẹn yìaga lọ mẹ.

¹⁴ Tavẹ Sauli tọn sọ dọ hlan ẹn podọ hlan devi etọn dọ, Fiedali wẹ miwlẹ yì? Ewọ sọ dọmọ, Nado din kẹtẹkẹtẹ lẹ: whenuena míwlẹ sọ mọ dọ, yè ma mọ yé gba, mi wá Samuẹli de.

¹⁵ Tavẹ Sauli tọn sọ dọmọ, Dọ na mi, yẹn vẹ́ we, núhe Samuẹli dọ hlan mì.

¹⁶ Sauli sọ dọ hlan tavẹ etọn dọ, Ewọ dọ na mí domọ́ dọ yè ko mọ kẹtẹkẹtẹ lẹ lọ. Ṣigba gbọn whẹ́ho ahọludu tọn dali fietọn Samuẹli dọ, ewọ ma dọ na ẹn gba.

¹⁷ Samuẹli sọ ylọ omẹ ewlẹ pli do OKLUNỌ de to Mizpa;

¹⁸ é sọ dọ hlan ovi Islaeli tọn lẹ dọ, Le wẹ OKLUNỌ, Jiwheyẹwhe Islaeli tọn dọ, Yẹn hẹn Islaeli hẹaga tón sọn Egipti, yẹn sọ whlẹn mì sọn alọ Egiptinu lẹ tọn mẹ, podọ sọn alọ ahọludu lẹpo tọn mẹ, he to nukunbiana mì lẹ:

¹⁹ ṣigba míwlẹ to azán he gbè gbẹ́ Jiwheyẹwhe mìtọn, mẹhe ewlọsu whlẹn mì sọn núhámẹ mìtọn lẹ mẹ po nukunbibia mìtọn lẹ po; míwlẹ ko sọ dọ hlan ẹn dọ, Lala, ṣigba dè ahọlu de do mí ji. Enẹwutu dinvie mì ni hẹn mìde sọawuhia to OKLUNỌ nukọn gbọn whẹ́ndo mìtọn lẹ dali, podọ gbọn fọtọ́n mìtọn lẹ dali.

²⁰ Mowẹ Samuẹli hẹn whẹ́ndo Islaeli tọn lẹ sẹpọ́, yè sọ yí whẹ́ndo Bẹnjamini tọn.

²¹ E sọ hẹn whẹ́ndo Bẹnjamini tọn sẹpọ́ gbọn whédo lẹ dali, yè sọ yí whédo Matlinu lẹ tọn: Sauli visunnu Klẹi tọn wẹ yè sọyí; ṣigba whenuena yé din in, yè ma sọgan mọ ẹn gba.

²² Enẹwutu yé kanbiọ sọn OKLUNỌ de dogọ́ dọ, Be omẹ de gbé sọ tin nado wá file? OKLUNỌ sọ gblọn dọ, Dayi e go, ewọ ko whla ede to hómẹnú ṣẹnṣẹn.

²³ Yé sọ dowezun bo hẹn ẹn sọn finẹ wá; whenuena é ṣite to gbẹtọ lẹ ṣẹnṣẹn, é yín mẹdite hú gbẹtọ lẹpo sọn abọ́ etọn lẹ ji yìaga.

²⁴ Samuẹli sọ dọ hlan gbẹtọ ewlẹ dọ, Mì mọ ẹn mẹhe OKLUNỌ ko dè, dọ mẹhe taidi i de ma tin to gbẹtọ lẹpo ṣẹnṣẹn? Gbẹtọ lẹpo sọ dabobo, bo dọmọ, jiwheyẹwhe ni whlẹn ahọlu lọ.

²⁵ Whenẹnu wẹ Samuẹli dọ na gbẹtọ lẹ owàlọ ahọludu lọ tọn, bo wlan ẹn dó owé de mẹ, bo tó ẹ daga to OKLUNỌ nukọn. Samuẹli sọ do gbẹtọ ewlẹ hlan yì, mẹdopodopo hlan owhé etọn gbè.

²⁶ Sauli ga sọ yì owhé etọn gbè to Gibea; awhànpa lọ sọ yì po e po, ayiha mẹhetọn Jiwheyẹwhe sọalọ.

²⁷ Ṣigba visunnu Beliali tọn dẽlẹ dọmọ, Nawẹ dawe he na whlẹn mí do? Yé bo sọ vlẹ ẹ, bo ma hẹn nunina de wá nẹ́ gba. Ṣigba ewọ tin di ewọ ko yín tókúnọ.