1 SAMUẸLI 1 - BIBLU WIWE LỌ 1923

¹ DINVIE dawe Lamataimi-zofimi tọn de tin, sọn otò okọta Eflaimi ton mẹ, oyín etọn nọ yín Ẹlkana, visunnu Jelohami tọn, visunnu Elihu tọn, visunnu Tohu tọn, visunnu Zufì tọn, Eflaiminu de.

² Ewọ sọ tindo asi awe; oyín ode tọn nọ yín Hanna, oyín awetọ tọn nọ yín Pẹnina: Pẹnina tindo ovi lẹ, ṣigba Hanna ma tindo ovi de.

³ Dawe he nọ hẹji tọ́n yì sọn tòdaho etọn mẹ whème whèmẹ nado sẹn podọ nado sanvọ́ hlan OKLUNỌ awhànpa le tọn to ṣilo mẹ. Visunnu Eli tọn awe lẹ Họfini po Finehasi po, yẹwhenọ lẹ hlan OKLUNỌ, tin finẹ.

⁴ Whenuena azán lọ wá bọ Ẹlkana sanvọ́, é na mimá lẹ hlan Pẹnina asi etọn, podọ hlan visunnu etọn lẹpo po viyọnnu etọn lẹ po:

⁵ ṣigba hlan Hanna é na mimá awepọ de: na é yiwanna Hanna, ṣigba OKLUNỌ ko sú adò etọn.

⁶ Asísi etọn sọ nọ doadihomẹ nẹ badabada, na nado hẹn ẹn fiẹ, na OKLUNỌ ko sú adò etọn wutu.

⁷ Le é nọ to mọ wà to whèmẹ whèmẹ, whenuena é hẹji yì ohò OKLUNỌ tọn mẹ, mọwẹ é nọ to adidohomẹ nẹ̃; enẹwutu é nọ viavi, bo ma dùnú.

⁸ Ẹlkana asú etọn sọ dọ hlan ẹn dọmọ, Hanna, Etẹwutu hiẹ toavivi? podọ etẹwutu hiẹ ma dùnú? etẹwutu ayiha towe to adisa? Yẹn ma ka pọ́nte hú visunnu ao hlan we?

⁹ Mọwẹ Hanna tite to godo yé ko dùnú to Ṣilo, podọ godo yé ko nù. Dinvie Eli yẹwhenọ sinai to aisinnu etọn ji to ohọ̀n dòtin tẹmpli OKLUNỌ tọn tọn dali.

¹⁰ Ewọ sọ tin to vivè ayiha tọn mẹ, bo hòdẹ hlan OKLUNỌ, bo viavi badabada.

¹¹ Ewọ sọ do opà de, bo dọmọ, OKLUNỌ awhànpa lẹ tọn, eyín hiẹ nugbonugbo na pọ́n nukunbibia deviyọnnu towe tọn, bo flin mi, bo ma wọ̀n deviyọnnu towe gba, ṣigba bo na yọ̀pọ sunnu de hlan deviyọnnu towe, whenẹnu yẹn na na ẹn hlan OKLUNỌ to azán ogbè etọn tọn lẹpo mẹ, dalunhi de ma na wá ota etọn go.

¹² E sọ wá jọ, le é dotena dẹhiho to OKLUNỌ nukọn, wẹ Eli payido onù etọn.

¹³ Dinvie Hanna, to hódọ to ayiha etọn mẹ; nùflo etọn lẹ kẹdẹ wẹ to whinwhàn, ṣigba yè ma sè ogbè etọn gba: enẹwutu Eli lẹn dọ yè ko hẹn ahánmú in.

¹⁴ Eli sọ dọ hlan ẹn dọ, Na yè na hẹn ahànmú we dẹn sọ? dè ovẹ̃n towe sọn de we.

¹⁵ Hanna sọ gblọn bo dọmọ, Lala, klunọ ṣie, yọnnusi ayiha awublanọ tọn de wẹ yẹn: Yẹn ma ko nù ovẹ̃n kavi ahàn sinsinyẹn de gba, ṣigba yẹn to ayiha ṣie túntún jẹgbonu to OKLUNỌ nukọn.

¹⁶ A hia deviyọnnu towe na viyọnnu Beliali tọn de blo: na sọn ogégé okuefan ṣie mẹ po adidohomẹnamẹ ṣie po wẹ yẹn do to hódọ jẹdinvie.

¹⁷ Whenẹnu wẹ Eli gblọn bo dọmọ, Yì jijọho mẹ: Jiwheyẹwhe islaeli tọn ni sọ okanbiọ towe he hiẹ biọ sọn e si na we.

¹⁸ Ewọ sọ dọmọ, Gbọ devi towe ni din nukundagbe mọ to nukun towe mẹ. Mowẹ nawe lọ wleali etọn yì, bo dùnú, nukunmẹ etọn ma sọ yín awublanọ ba gba.

¹⁹ Yé sọ tite to afọnnu íú, bo sẹ̀n to OKLUNỌ nukọn, bo lẹ̀gò, bo wá owhé yetọn gbè to Lama: Elkana sọ yọ́n Hanna asi etọn; OKLUNỌ sọ flin in.

²⁰ E sọ wá jọ, whenuena yè hẹn ojlẹ lọ wá, wẹ Hanna mọhò, bo ji visunnu de: é sọ ylọ oyín etọndọ Samuẹli, dọmọ, Na yẹn ko biọ ẹ sọn OKLUNỌ si wutu.

²¹ Dawe lọ Ẹlkana, po owhé etọn lẹpo po, hẹji yì nado nanú whèmẹ-whèmẹ tọn lọ hlan OKLUNỌ, po padido etọn po.

²² Ṣigba Hanna ma hẹji yì gba; na é dọ hlan asú etọn dọ, Yẹn ma to na hẹji yì gba kaka yè na do dèanọna ovi lọ, whenẹnu wẹ yẹn na hẹn ẹn wá, na é nido sọawuhia to OKLUNỌ nukọn, bo nọnọ̀ finẹ kakadoi.

²³ Ẹlkana asú etọn sọ dọ hlan ẹn dọmọ, Wà núhe sọawuhia dagbe na we; dọngbàn kaka hiẹ na ko dèanọ nẹ̃; OKLUNỌ ni sa ko hẹn ohó etọn lódo kẹdẹ. Mowẹ nawe lọ dọngbàn, bo to anọdona visunnu etọn, kaka é do dèanọna ẹn,

²⁴ Whenuena ewọ ko dèanọna ẹn, é zé e hẹaga po e po, po oyín aflanmẹ atọ̀n po, po ẹfa dopo olinfìn tọn po, po ogò ovẹ̃n tọn dopo po, bo hẹn ẹn wá owhé OKLUNỌ tọn gbè to Ṣilo mẹ: ovi lọ sọ tin to ovú.

²⁵ Yé sọ hù oyín aflanmẹ lọ, bo hẹn ovi lọ wá Eli de.

²⁶ Ewọ sọ dọmọ, A klunọ ṣie, le ayiha towe to ogbẹ̀, klunọ ṣie, yẹn wẹ nawe he nọte to dali towe to ofi bo to dẹ́ho hlan OKLUNỌ.

²⁷ Ovi he wẹ yẹn hodẹ̀ na; OKLUNỌ ko sọ na okanbiọ ṣie mi he yẹn biọ sọn e si:

²⁸ enẹwutu yẹn ga ko sọ ẹ na hlan OKLUNỌ; sọ le é to ogbẹ̀ dẹn do ewọ yín mẹsọna hlan OKLUNỌ. E sọ sẹ̀n OKLUNỌ to finẹ.