Зәбүр 3 - Башкирский ВЗ (неполный)

¹ Дауыттың мәҙхиәһе. Улы Авшаломдан ҡасҡан ваҡытта әйтелгән.

² Йә Раббы! Дошмандарым ни тиклем күбәйҙе! Күптәр миңә ҡаршы баш күтәрҙе.

³ «Алла уны ҡотҡармаясаҡ!» – тигәндәр Эргә-тирәмдә бихисап. Села

⁴ Ә һин, Раббы, мине уратҡан ҡалҡанһың; Һин – даным, башымды юғары сөйҙөрөүсе.

⁵ Раббыға мин ауаз һалам – Яуап ҡайтарыр изге тауынан. Села

⁶ Ятам да йоҡлайым, йәнә уянам – Раббы мине һаҡлай.

⁷ Ҡурҡыу юҡ солғаған ғәм халыҡтан Ҡамап алһалар ҙа һәр тарафтан.

⁸ Йә Раббым, ҡалҡ! Ҡотҡара һал, Аллам! Ҡундыр бар дошмандарымдың яңағына; Ҡыра һуҡ бөтә тештәрен яуыздарҙың.

⁹ Ҡотолоу бары Раббынан! Халҡың өҫтөндә булһын фатихаң! Села