Юныс 3 - Башкирский ВЗ (неполный)

Юныстың Раббыға буйһоноуы

¹ Юнысҡа икенсе тапҡыр Раббы һүҙе булды:

² – Бар, юлға сыҡ! Бөйөк ҡала Ниневеға бар ҙа уның халҡына Мин һиңә әйткәндәрҙе иғлан ит.

³ Юныс юлға сыҡты, Раббы ҡушҡанса, Ниневеға юлланды. Ниневе Алланың шундай ҙур ҡалаһы ине: уны урап сығыр өсөн өс көн кәрәк булыр ине.

⁴ Көнө буйы: «Тағы ҡырҡ көндән Ниневеның аҫты-өҫкә әйләнәсәк!» – тип ҡысҡырып, Юныс ҡала буйлап йөрөй башланы.

⁵ Ниневеның бар халҡы Аллаға инанды. Улар ураҙа иғлан итте, олоһонан кесеһенә тиклем ҡыл туҡыма уранды.

⁶ Был хәбәр Ниневе батшаһына барып еткәс, ул тәхетенән тороп батша кейемен систе лә ҡыл туҡыма уранып көлгә ултырҙы.

⁷ Батша үҙенең һәм вәзир-бәктәренең исеменән Ниневела ошо фарманды халыҡҡа еткерергә ҡушты: «Кешеләр ҙә, хайуандар: эреле-ваҡлы мал-тыуар ҙа бер нәмә лә ашамаһын, утлауҙа йөрөмәһен, һыу эсмәһен.

⁸ Кешеләр ҙә, мал да, ҡыл туҡыма ябынып, бар көсөнә Аллаға ялбарһын. Һәр кем яман юлдан тайпылһын, золом ҡылыуҙан туҡтаһын.

⁹ Кем белә, бәлки, шул саҡ Алла беҙҙе йәлләр ҙә кире уйлар, асыуын баҫыр, һәм беҙ иҫән ҡалырбыҙ».

¹⁰ Алла уларҙың яуызлыҡ ҡылыуҙан туҡтағандарын, яман юлдан тайпылғандарын күрҙе. Шуға күрә Алла уларҙы йәлләне һәм әүәл уларға ебәрергә янаған бәләне күндермәне.