Сығыу 37 - Башкирский ВЗ (неполный)

Килешеү һандығын яһау

¹ Бесалил сәрүәр ағасынан һандыҡ яһаны. Уның буйы ике терһәк ярым, иңе терһәк ярым һәм бейеклеге терһәк ярым ҙурлығында ине.

² Уны эстән дә, тыштан да саф алтын менән көпләне һәм ситенән алтын ҡаймаланы.

³ Дүрт алтын дүңгәләк ҡойоп, уны һандыҡтың дүрт тояғына беркетте: ике дүңгәләкте – һандыҡтың бер яғынан, икәүһен – икенсе яғынан булды.

⁴ Сәрүәр ағасынан ҡолғалар эшләп, уларҙы алтын менән көпләне.

⁵ Һандыҡты ҡолғаға ултыртып йөрөтөр өсөн уларҙы һандыҡтың ике яғындағы дүңгәләктәргә кейҙерҙе.

⁶ Һандыҡ өсөн саф алтындан буйы ике терһәк ярым, иңе терһәк ярым ҙурлығында ҡапҡас эшләне.

⁷ Һандыҡ ҡапҡасының ике осона алтындан сүкеп ике кируб эшләне.

⁸ Кирубтарҙың береһе – бер, икенсеһе икенсе оста булып, ҡапҡас менән бер бөтөндө тәшкил итә ине.

⁹ Кирубтарҙың ҡанаттары, өҫкә йәйелеп, һандыҡ ҡапҡасын ҡаплаған. Улар бер-береһенә йөҙҙәре менән ҡапма-ҡаршы тора һәм ҡапҡас өҫтөнә ҡарай ине.

Изге икмәк ҡуя торған өҫтәлдең яһалыуы

¹⁰ Ул сәрүәр ағасынан өҫтәл эшләне; буйы ике терһәк, иңе бер терһәк һәм бейеклеге терһәк ярым ине.

¹¹ Уны саф алтын менән көпләне һәм ситтәрен алтын менән ҡаймаланы.

¹² Ситтәренә ус аяһы бейеклегендә эргәлек эшләне һәм уны алтын менән ҡаймаланы.

¹³ Дүрт алтын дүңгәләк ҡойоп, уларҙы өҫтәлдең дүрт мөйөшөнә аяҡтары тәңгәленә беркетте.

¹⁴ Дүңгәләктәрҙе эргәлек янына урынлаштырҙы; өҫтәлде күсереп йөрөтөргә кәрәк булғанда, уларға ҡолға кейҙереләсәк ине.

¹⁵ Ул өҫтәлде күсереп йөрөтөр өсөн сәрүәр ағасынан ҡолғалар эшләне һәм уларҙы алтын менән ҡапланы.

¹⁶ Өҫтәлгә ҡуйыр өсөн һауыт-һаба: саф алтындан тәрилкәләр, сеүәтәләр, түкмә ҡорбандар өсөн кәсәләр һәм ҡомғандар эшләне.

Шәмдәлдең яһалыуы

¹⁷ Бесалил саф алтындан сүкеп, шәмдәл эшләне. Уның нигеҙен, һабағын, кәсәләрен, бөрөләрен һәм таждарын бер бөтөн итеп тоташтырҙы.

¹⁸ Шәмдәлдең бер яғынан – өс, икенсе яғынан – өс, йәмғеһе алты ботаҡ бар ине.

¹⁹ Алты ботаҡтың һәр береһендә бөрөләре һәм таждары менән баҙам сәскәһенә оҡшаған өсәр кәсә бар ине.

²⁰ Шәмдәлдең һабында бөрөләре һәм таждары менән баҙам сәскәһенә оҡшаған дүрт кәсә бар ине.

²¹ Ике ботаҡ аҫтында бер бөрө, икенсе ике ботаҡ аҫтында бер бөрө, өсөнсө ике ботаҡ аҫтында бер бөрө – шәмдәлдең бөтә алты ботағы аҫтында ла шулай ине.

²² Кәсәнең бөрөләре лә, ботаҡтар ҙа – шәмдәл менән бер бөтөн: һәммәһе лә саф алтындан сүкелгәйне.

²³ Ул ете майшәм эшләне. Филтә ҡыҫҡыстар һәм һоҫҡолар саф алтындан ине.

²⁴ Шәмдәлгә һәм уның кәрәк-ярағына бер талант саф алтын китте.

Хуш еҫ төтәтеү өсөн ҡорбан усағының яһалыуы

²⁵ Ул сәрүәр ағасынан хуш еҫ төтәтә торған ҡорбан усағы яһаны: буйы бер терһәк, киңлеге бер терһәк, бейеклеге ике терһәк ҙурлығында, дүрткел ине. Мөгөҙҙәре ҡорбан усағы менән бер бөтөн ине.

²⁶ Ул уның өҫтөн, ян-яҡтарын һәм мөгөҙҙәрен саф алтын менән көпләне, ситтәрен алтын менән ҡаймаланы.

²⁷ Ике алтын дүңгәләк эшләне һәм, ҡорбан усағын күсереп йөрөтөргә ҡолға кейҙереп ҡуймалы итеп, уларҙы, ситтәре буйлап, ҡайма аҫтына беркетеп ҡуйҙы.

²⁸ Ул сәрүәр ағасынан ҡолғалар эшләне һәм уларҙы алтын менән көпләне.

²⁹ Ул, хушбуй әҙерләгәндәге һымаҡ, мәсехләү өсөн изге май һәм төтәтеү өсөн хуш еҫле матдәләр ҡатнашмаһы яһаны.