Миха 1 - Башкирский ВЗ (неполный)

¹ Йәһүҙә батшалары Йоҫам, Ахаз һәм Хизкияһ хакимлыҡ иткән осорҙа Морешеҫ кешеһе Михаға Самария һәм Йәрүсәлим хаҡында күренмеш менән Раббы һүҙе булды.

Раббы Исраил һәм Йәһүҙә менән хөкөмләшә

² Бөтә халыҡтар, тыңлағыҙ, Ер йөҙө һәм унда йәшәгәндәр, ҡолаҡ һалығыҙ! Раббы Хаким Үҙенең изге ҡорамынан Һеҙгә ҡаршы шаһитлыҡ ҡыласаҡ.

³ Бына, Раббы урынынан сығыр, Тау баштарына баҫып, аҫҡа төшөр.

⁴ Утта ирегән балауыҙмы ни, Аяҡ аҫтарында тауҙар ирер; Түбәләрҙән аҡҡан һыуҙармы ни, Үҙәнлектәр икегә йырылыр.

⁵ Былар барыһы ла Яҡуптың енәйәте, Исраил халҡының гонаһы арҡаһында. Яҡуп нәҫеленең фетнәһе өсөн кем яуаплы? Самария түгелме ни? Йәһүҙәләге табыныу ҡалҡыулыҡтары өсөн кем яуап бирер? Йәрүсәлим түгелме ни?

⁶ – Шуға күрә Мин Самарияны харабаға – Йөҙөм ағастары үҫтерә торған урынға әйләндерәм. Ҡала таштарын үҙәнгә быраҡтырам, Нигеҙенә тиклем емерәм, – ти Раббы. –

⁷ Һын-боттары ватып ырғытылыр, Зина ҡылып алған бүләктәре яндырылыр, Бөтә боттарын юҡҡа сығарам! Фәхешлеге өсөн йыйған бүләктәре Фәхишәләргә түләргә тотонолор!

⁸ Шуға күрә мин илап һыҡтармын, Ялан аяҡ, ялан өҫ йөрөрмөн. Ҡайғым ҡаты – сүл бүреһеләй олойом, Төнгө ябалаҡтай ухылдайым.

⁹ Сөнки Самарияның яралары уңалмаҫ, Уның сире Йәһүҙәгә лә килде, Халҡым йәшәгән Йәрүсәлимдең Ҡапҡаларынаса барып етте.

¹⁰ Быны Гаҫта белдермәгеҙ, Унда һыҡтамағыҙ, һыҡтамағыҙ. Бейт-Леғафрала ҡайғынан туҙанға ятып аунағыҙ.

¹¹ Эй Шафир халҡы, Шыр яланғас, мәсхәрәлә килеш китерһегеҙ. Саананда йәшәгәндәр ҡалаларынан сыға алмаҫ, Бейт-Әсәлдең халҡы ҡайғырып йәш түгер: Һеҙгә ярҙам күрһәтеүсе булмаҫ.

¹² Марот халҡы өмөтләнеп яҡшылыҡ көткәйне, Әммә Раббынан Йәрүсәлим ҡапҡаларына афәт килде.

¹³ Эй Лахишта йәшәгәндәр, Аттарығыҙҙы яу арбаларына егегеҙ. Сион-ҡыҙ гонаһ юлына баҫҡанға Һеҙ сәбәпсе булдығыҙ, Сөнки Исраилдың енәйәттәре һеҙҙән башланды.

¹⁴ Шуның өсөн Морешеҫ-Ғаҫҡа бирнә бирерһегеҙ; Ахзив ҡалаһы Исраил батшаларын алдаясаҡ.

¹⁵ Эй Марешала йәшәгәндәр, Раббы һеҙгә илбаҫарҙар алып килә. Исраилдың затлы кешеләре Ғадуллам мәмерйәһенә һыйынасаҡ.

¹⁶ Эй Йәһүҙә, ғәзиз балаларың ҡайғыһынан сәсеңде ҡыр, Башың ҡарағош башылай ялтас ҡалһын, Сөнки балаларығыҙ һинән һөргөн китәсәк!