Левиҙәр 8 - Башкирский ВЗ (неполный)

Һарун менән улдарының ҡаһинлыҡҡа бағышланыуы

¹ Раббы Мусаға былай тине:

² – Һарун менән улдарын, кейемдәрен, мәсех майын, гонаһ ҡорбаны өсөн үгеҙ башмаҡ, ике һарыҡ тәкәһе, бер кәрзин сөсө икмәк ал да,

³ барса йәмғиәтте Осрашыу сатыры ауыҙына йый.

⁴ Муса Раббы бойорғанса эшләне. Йәмғиәт Осрашыу сатыры ауыҙына йыйылды.

⁵ Муса уларға: – Раббы бына нимәләр эшләргә бойорҙо, – тине.

⁶ Шунан Һарун менән улдарын алға сығарып, уларҙы һыу менән йыуындырҙы.

⁷ Һарунға күлдәк кейҙерҙе, билен быуҙы, ябынса кейҙерҙе, эфод һалды, эфодтың биҙәлгән билғауы менән быуҙы ла, эфодты нығытып ҡуйҙы.

⁸ Иң өҫтән түшлек кейҙереп, түшлеккә урим менән туммим һалды.

⁹ Башына сәллә һалды, сәллә өҫтөнән маңлайына алтын сәскә рәүешендәге изгелек тажы таҡты. Алла нисек бойорһа, шулай эшләне.

¹⁰ Шунан һуң Муса мәсех майы алды, Сатырҙы һәм сатыр эсендәге бөтә нәмәне мәсехләп изгеләндерҙе.

¹¹ Майҙы ете тапҡыр ҡорбан усағына һирпте; ҡорбан усағын, уның бөтә кәрәк-ярағын, йыуынғысты, йыуынғыс таяуын – барыһын да изгеләндерер өсөн мәсехләне.

¹² Һарунды изгеләндереү өсөн башына май ҡойоп мәсехләне.

¹³ Шунан Һарундың улдарын алға сығарҙы, уларға ла күлдәк кейҙерҙе, билдәрен билғау менән быуҙы, баштарына бәйҙәрен бәйләне. Раббы Мусаға нисек бойорһа, шулай булды.

¹⁴ Шунан гонаһ ҡорбаны булған үгеҙҙе килтерҙе. Һарун менән улдары ҡулдарын үгеҙҙең башына ҡуйҙы.

¹⁵ Муса үгеҙҙе салып, ҡанын алды ла бармағы менән ҡорбан усағының мөгөҙҙәренә һәр яҡлап һөртөп, ҡорбан усағын пакланы. Ҡалған ҡанды ҡорбан усағының төбөнә түкте һәм нәжеслектән арындырып уны шул рәүешле изгеләндерҙе.

¹⁶ Үгеҙҙең эске ағзаларын ҡаплаған бөтә майҙы, бауыр аҫтындағы өлөшөн, майы менән бергә ике бөйөрөн алып уларҙы ҡорбан усағында яндырҙы.

¹⁷ Үгеҙҙе – тиреһен, итен, нәжесен – тупламдан ситкә сығарып яндырҙы. Раббы Мусаға нисек бойорһа, шулай булды.

¹⁸ Шунан һуң Муса тотош яндырыу ҡорбаны булған һарыҡ тәкәһен алып килде. Һарун менән улдары ҡулдарын тәкәнең башына ҡуйҙы.

¹⁹ Муса тәкәне салды, ҡанын ҡорбан усағына һәр яҡлап һирпте.

²⁰ Тәкә түшкәһен киҫәктәргә тураны һәм башын, киҫәктәрен, майын яндырҙы.

²¹ Эсәк-ҡарынын, тояҡтарын йыуып, тәкәне тулыһынса ҡорбан усағында яндырҙы. Был – тотош яндырыу ҡорбаны, Раббыға күркәм хуш еҫ, ут ҡорбаны ине. Раббы Мусаға нисек бойорһа, шулай булды.

²² Шунан Муса икенсе тәкәне алып килде. Быныһы ҡаһинлыҡҡа бағышлау йолаһының тәкәһе ине. Һарун менән улдары ҡулдарын тәкәнең башына ҡуйҙы.

²³ Муса тәкәне салды. Бер аҙ ҡанын алып Һарундың уң ҡолағының осона, уң ҡулының һәм уң аяғының баш бармаҡтарына һөрттө.

²⁴ Шунан Һарундың улдарын алға сығарҙы. Уларҙың да уң ҡолаҡтарының осона, уң ҡулдарының һәм уң аяҡтарының баш бармаҡтарына ҡан һөрттө. Ҡалған ҡанды ҡорбан усағының яҡ-яғына һирпте.

²⁵ Тәкәнең майын һәм ҡойроҡ майын, эсәк-ҡарынын ҡаплаған бөтә майҙы, бауыр аҫтындағы өлөшөн, майы менән бергә ике бөйөрөн, артҡы уң ботон алды.

²⁶ Шунан Раббы хозурында торған сөсө икмәкле кәрзиндән бер икмәк, зәйтүн майына баҫылған бер икмәк, бер йоҡа көлсә алып, уларҙы малдың майы менән артҡы уң бото өҫтөнә ҡуйҙы.

²⁷ Быларҙың бөтәһен дә Муса Һарун менән улдарының ҡулына һалды. Уларҙы Раббы хозурында һелкетмә ҡорбан булараҡ күтәреп күрһәтте.

²⁸ Бынан һуң Муса барыһын да уларҙың ҡулынан алып, ҡорбан усағында тотош яндырыу ҡорбаны өҫтөндә ҡаһинлыҡҡа бағышлау йолаһы ҡорбаны итеп яндырҙы. Был – Раббы өсөн ут ҡорбаны, Раббыға күркәм хуш еҫ.

²⁹ Унан һуң Муса түш итен алды. Уны Раббы хозурында өҫкә күтәреп күрһәтте. Был – бағышлау йолаһы ҡорбаны булған тәкәнән Мусаның үҙ өлөшө ине. Раббы Мусаға нисек бойорһа, шулай булды.

³⁰ Муса мәсех майы, ҡорбан усағы өҫтөндәге ҡанды алып Һарун менән улдарына һәм уларҙың кейемдәренә һирпте. Шул рәүешле Һарунды һәм уның кейемен, улдарын һәм уларҙың кейемдәрен изгеләндерҙе.

³¹ Шунан Һарун менән улдарына: – Итте Осрашыу сатыры ауыҙында бешерегеҙ ҙә шунда ҡаһинлыҡҡа бағышлау йолаһы ҡорбаны кәрзинендәге икмәк менән ашағыҙ, – тине, – сөнки миңә: «Уны Һарун улдары менән ашарға тейеш», – тип бойоролдо.

³² Ә ҡалған ит менән икмәкте яндырығыҙ.

³³ Бағышланыу көндәрегеҙ тулғанға тиклем, ете көн буйы, Осрашыу сатыры ауыҙынан китмәгеҙ, сөнки бағышланыуығыҙ ете көнгә һуҙылыр.

³⁴ Бөгөн эшләгән һәр нәмәне Раббы һеҙҙе гонаһтарығыҙҙан паклау өсөн бойорҙо.

³⁵ Ете тәүлек буйы, көнө-төнө Осрашыу сатыры ауыҙында булығыҙ. Раббы талап иткәнсә эшләгеҙ, юғиһә үләсәкһегеҙ. Миңә шулай бойоролдо.

³⁶ Һарун менән улдары Раббының Муса аша еткерелгән бөтә бойороҡтарын да тулыһынса үтәне.