Левиҙәр 16 - Башкирский ВЗ (неполный)

Гонаһтарҙан пакланыу көнө

¹ Һарундың ике улы Раббы хозурына яҡынлашып үлгәндән һуң, Раббы Мусаға былай тине:

² – Ағайың Һарунға әйт, пәрҙә артындағы Иң Мөҡәддәс урынға теләһә ҡайһы ваҡытта инмәһен, Изге һандыҡ өҫтөндәге ҡапҡасҡа яҡынламаһын, юғиһә үлер. Мин бит ҡапҡас өҫтөндә, болот эсендә пәйҙә булырмын.

³ Шуға күрә Һарун Иң Мөҡәддәс урынға кергәндә гонаһ ҡорбаны итеп бер башмаҡ, тотош яндырыуға һарыҡ тәкәһе килтерергә тейеш.

⁴ Изге етен күлдәк, етен ыштан кейһен, биленә етен билғау быуһын, етен сәллә ураһын: был – изге кейемдәр. Уларҙы кейгәнгә тиклем йыуынһын.

⁵ Һарун Исраил халҡы йәмғиәтенән гонаһ ҡорбаны итеп ике кәзә тәкәһе, тотош яндырыуға бер һарыҡ тәкәһе алһын.

⁶ Үҙе һәм ғаиләһе гонаһтан пакланһын өсөн ул гонаһ ҡорбаны итеп үгеҙ башмаҡ тәҡдим итһен.

⁷ Шунан ике кәзә тәкәһен Раббы хозурына, Осрашыу сатыры ауыҙына алып килһен дә

⁸ йәрәбә һалһын: тәкәләрҙең береһе – Раббы, икенсеһе Ғазазел өсөн булыр.

⁹ Йәрәбә буйынса Раббыға сыҡҡан тәкәне Һарун гонаһ ҡорбаны итеп тәҡдим итһен.

¹⁰ Ә йәрәбә буйынса Ғазазелгә сыҡҡан тәкәне тере килеш Раббы хозурына килтерһен. Был кәзә тәкәһе халыҡтың гонаһтарын паклар өсөн сүлгә, Ғазазелгә ебәрелһен.

¹¹ Һарун үҙен һәм ғаиләһен гонаһтан паклау өсөн үгеҙ башмаҡты һуйып гонаһ ҡорбаны килтерһен. Башмаҡты салғандан һуң

¹² Раббы ҡаршыһындағы ҡорбан усағынан төтәҫләгескә ҡуҙ тултырһын, яҡшылап төйөлгән һумала-майҙарҙы ҡуш услап алһын һәм пәрҙә артына индерһен.

¹³ Һарун һумала-майҙарҙы Раббы ҡаршыһында ҡуҙға һалһын һәм хуш еҫле төтөн болото Килешеү һандығының ҡапҡасын ҡаплар. Шул саҡта Һарун үлмәҫ.

¹⁴ Һарун бармағын башмаҡтың ҡанына манып алып, бармағы менән ҡапҡастың алғы яғына ете тапҡыр һирпһен.

¹⁵ Унан һуң халыҡтың гонаһ ҡорбаны булараҡ кәзә тәкәһен салһын. Уның ҡанын пәрҙә эсенә алып инһен. Тәкәнең ҡанын да, башмаҡтыҡы кеүек үк, ҡапҡастың өҫтөнә һәм алғы яғына һирпһен.

¹⁶ Шул рәүешле Иң Мөҡәддәс урынды Исраил халҡының нәжестәренән, енәйәттәренән – барлыҡ гонаһтарынан паклар. Улар араһында, уларҙың нәжеслеге араһында торған Осрашыу сатыры менән дә шулай эшләһен.

¹⁷ Һарун гонаһтан паклау йолаһын башҡарыу өсөн Иң Мөҡәддәс урынға ингәндән алып сыҡҡанға тиклем Осрашыу сатырында бер кем дә булмаһын. Үҙен, ғаиләһен һәм бөтә Исраил халҡын гонаһтарынан паклағандан һуң

¹⁸ Һарун Раббы хозурындағы ҡорбан усағы янына сығып уны паклау йолаһын башҡарыр, башмаҡ менән кәзә тәкәһенең ҡанын алып усаҡтың бөтә мөгөҙҙәренә һөртөр.

¹⁹ Бармағын ҡанға манып ете тапҡыр ҡорбан усағының өҫтөнә һирпер. Шул рәүешле уны Исраил халҡының нәжеслегенән таҙартыр һәм изге ҡылыр.

²⁰ Һарун Иң Мөҡәддәс урынды, Осрашыу сатырын, ҡорбан усағын паклау йолаһын башҡарғандан һуң тере тәкәне килтерһен.

²¹ Ике ҡулын тәкәнең башына ҡуйһын һәм Исраил халҡының бөтә ғәйептәрен, енәйәттәрен – барлыҡ гонаһтарын танып һөйләһен дә, шул гонаһтарҙы тәкәнең башына йөкмәһен. Шунан был эш өсөн тәғәйенләнгән берәй кеше оҙатыуында тәкәне сүлгә ебәрер.

²² Тәкә уларҙың ғәйептәрен үҙенең өҫтөндә кешеһеҙ ерҙәргә алып китер. Оҙатып барыусы кеше тәкәне сүлгә ебәргәндән һуң,

²³ Һарун Осрашыу сатырына кереп, Иң Мөҡәддәс урынға ингәндә кейгән етен кейемдәрен сисһен,

²⁴ изге урында йыуынып, үҙ кейемдәрен кейһен. Унан һуң сығып, үҙе һәм халҡы өсөн паклау йолаһын башҡарып үҙенең һәм халыҡтың тотош яндырыу ҡорбандарын ғәмәл ҡылһын.

²⁵ Гонаһ ҡорбанының майын ҡорбан усағында яндырһын.

²⁶ Тәкәне Ғазазелгә оҙатҡан кеше кейемен йыуып, йыуынғас ҡына тупламға инә ала.

²⁷ Иң Мөҡәддәс урынды паклау йолаһын башҡарыу өсөн ҡандары эскә индерелгән гонаһ ҡорбаны башмағы менән тәкәһе тупламдан ситкә сығарылһын. Улар тиреләре, ите, эсәк-ҡарындары менән бергә тотош яндырылһын.

²⁸ Уларҙы яндырған кеше кейемен һәм тәнен йыуырға тейеш, шунан һуң ғына ул тупламға инә ала.

²⁹ Бына былар һеҙҙең өсөн мәңгелек ҡағиҙә: етенсе айҙың унынсы көнөндә бөтә нәмәнән дә тыйылығыҙ, ерле халыҡ та, арағыҙҙа төйәкләнгән килмешәктәр ҙә бер нәмә лә эшләмәгеҙ,

³⁰ сөнки был көндө һеҙҙең өсөн паклау йолаһы башҡарыласаҡ ки, һеҙ Раббы ҡаршыһында бөтә гонаһтарығыҙҙан таҙарынырһығыҙ һәм таҙа булырһығыҙ.

³¹ Был – һеҙҙең өсөн махсус ял көнө. Үҙегеҙҙе бөтә нәмәнән дә тыйығыҙ. Был – мәңгелек ҡағиҙә.

³² Пакландырыу йолаһын мәсихләнгән һәм атаһының урынына бағышланған ҡаһин башҡарыр. Ул етен кейемдәрен – изге кейемдәрҙе кейер һәм

³³ Иң Мөҡәддәс урын, Осрашыу сатыры, ҡорбан усағы өсөн паклау йолаһын башҡарыр, шулай уҡ был йола менән ҡаһиндарҙы һәм барса халыҡты пакландырыр.

³⁴ Был – һеҙҙең өсөн мәңгелек ҡағиҙә: Исраил халҡы бөтә гонаһтарынан арынһын өсөн йылына бер тапҡыр пакландырыу йолаһы башҡарылһын. Раббы Мусаға нисек бойорған булһа, Һарун барыһын да шулай эшләне.