Йермеяһ 43 - Башкирский ВЗ (неполный)

Йеремияның Мысырға алып кителеүе

¹ Йермеяһ Аллалары Раббының әйткәндәрен, Аллалары Раббының уның аша белгерткән һүҙҙәрен бөтә халыҡҡа һөйләп биргәс,

² Һошағъяһ улы Ғазаръяһ, Кареах улы Йоханан һәм башҡа тәкәббер әҙәмдәр уға: – Ялған һөйләйһең! – тине. – Аллабыҙ Раббы һине: «Мысырға бармағыҙ, унда төйәкләнмәгеҙ», – тип әйтергә ебәрмәгән.

³ Нерияһ улы Барух, беҙҙе үлтерһендәр йәки Бабилға һөргөнгә алып китһендәр өсөн халдейҙарға тотторорға теләп, һине беҙгә ҡаршы ҡоторта.

⁴ Шулай итеп, Кареах улы Йоханан, бөтә хәрби түрәләр һәм халыҡ Раббының Йәһүҙәлә ҡалырға бойороуын тыңламаны.

⁵ Кареах улы Йоханан һәм хәрби түрәләр төрлө илдәргә һибелеп йәшәгән һәм үҙ илдәре Йәһүҙәлә йәшәйбеҙ тип кире ҡайтҡан тере ҡалған йәһүҙиҙәрҙе,

⁶ нөгәрҙәр башлығы Невузарадан тарафынан Шафандан тыуған Ахиҡамдың улы Гедалъяһ ҡарамағына ҡалдырған ирҙәрҙе, ҡатындарҙы, балаларҙы, батша ҡыҙҙарын, шулай уҡ Йермеяһ пәйғәмбәрҙе, Нерияһ улы Барухты алып,

⁷ Раббының һүҙен тыңламайынса, Мысырға юлланды һәм Тахпанхесҡа барып етте.

⁸ Тахпанхеста Йермеяһҡа Раббы һүҙе булды:

⁹ – Ҙур-ҙур таштар ал да йәһүҙиҙәрҙең күҙ алдында фирғәүендең Тахпанхестағы һарайына ингән ерҙә түшәлгән балсыҡ аҫтына йәшер.

¹⁰ Шунан уларға әйт: «Исраил Аллаһы, Күк ғәскәрҙәре Раббыһы былай ти: „Бына, Мин Бабил батшаһы ҡолом Навуходоносорҙы бында алып киләм. Уның тәхетен йәшерелгән ошо таштар өҫтөнә ҡуям. Ошонда ул үҙенең күркәм сатырын ҡорор.

¹¹ Ул килеп Мысыр илен тар-мар итер: Кемгә үлемесле ауырыу яҙған – шул үлемгә, Кемгә әсирлек яҙған – шул һөргөнгә, Кемгә ҡылыс яҙған – шул ҡылысҡа дусар булыр.

¹² Мин Мысыр илаһтарының ҡорамдарына ут һаласаҡмын. Навуходоносор уларҙы яндырасаҡ, боттарын үҙе менән алып китәсәк. Бетен сүпләп, сапанын таҙартҡан көтөүсе һымаҡ, ул да Мысыр ерен шулай таҙартасаҡ һәм имен-аман сығып китәсәк.

¹³ Ул Мысыр ерендәге Ҡояш йортона урынлаштырылған табыныу бағаналарын емерер, Мысыр илаһтарының ҡорамдарын яндырыр“».