Йермеяһ 25 - Башкирский ВЗ (неполный)

Етмеш йыллыҡ Һөргөн

¹ Йәһүҙә батшаһы Йеһояҡим Йошияһ улы тәхеткә ултырғандың дүртенсе йылында Йермеяһҡа Йәһүҙә халҡы тураһында Раббы һүҙе булды. Был Навуходоносорҙың Бабилға батша булыуының тәүге йылы ине.

² Йермеяһ пәйғәмбәр, бөтә Йәһүҙә халҡына һәм Йәрүсәлимдә йәшәүселәргә былай тине:

³ – Йәһүҙә батшаһы Йошияһ Амон улы хакимлығының ун өсөнсө йылынан алып ошо көнгә тиклем – бына инде егерме өс йыл буйы миңә Раббы һүҙе иңеп тора. Мин уларҙы һеҙгә туҡтауһыҙ һөйләй барҙым, әммә һеҙ әйткәндәремә ҡолаҡ һалманығыҙ.

⁴ Раббы һеҙгә ҡолдары пәйғәмбәрҙәрҙе ҡабат-ҡабат ебәреп торҙо, әммә һеҙ тыңламанығыҙ, ҡолаҡ һалманығыҙ.

⁵ Улар һеҙгә: «Һәр берегеҙ яман юлдан, яуыз ғәмәлдәрегеҙҙән баш тартығыҙ. Шул сағында Раббы һеҙгә һәм ата-бабаларығыҙға мәңгелеккә биргән ерҙә йәшәрһегеҙ.

⁶ Ят илаһтарға эйәрмәгеҙ, уларға хеҙмәт итмәгеҙ һәм сәждә ҡылмағыҙ, үҙегеҙ яһаған боттар менән Мине асыуландырмағыҙ. Шун сағында Мин һеҙгә зыян килтермәм», – тине.

⁷ «Әммә һеҙ Мине тыңламанығыҙ, – тип белдерә Раббы. – Боттарығыҙ менән Мине асыуландырып, үҙ башығыҙға бәлә килтерҙегеҙ».

⁸ Шуға күрә Күк ғәскәрҙәре Раббыһы былай ти: «Әйткәндәремде тыңламағанығыҙ өсөн,

⁹ Мин бөтә төньяҡ ҡәбиләләрен һәм Бабил батшаһы ҡолом Навуходоносорҙы саҡырам, – тип белдерә Раббы. – Уларҙы был ергә, ошонда йәшәүселәргә, яҡын-тирәләге башҡа халыҡтарға ҡаршы алып киләм. Уларҙы тотош юҡ итәсәкмен, илдәрен ҡурҡыныс урынға әйләндереп, мәсхәрәгә төшөрөрмөн, мәңгелек харабаға әүрелдерермен.

¹⁰ Мин улар араһында Шатлыҡ ауаздарын, Күңел асыуҙарҙы, Кейәү менән кәләштең тауыштарын тыйырмын, Тирмән туҡылдауын туҡтатырмын, Шәм яҡтыһын һүндерермен.

¹¹ Бөтә был ер бушлыҡ һәм дәһшәткә әйләнер. Был ҡәүемдәр етмеш йыл буйы Бабил батшаһына хеҙмәт итер.

¹² Етмеш йыл үткәндән һуң, Бабил батшаһын, уның халҡын һәм халдейҙар илен ҡылған ейәнәттәре өсөн язалаясаҡмын, – тип белдерә Раббы. – Мин был ерҙе мәңгелек бушлыҡҡа әйләндерәсәкмен.

¹³ Ул ер тураһында һөйләгәндәремдең барыһын, ошо китапҡа яҙылған һүҙҙәрҙең һәммәһен, Йермеяһтың бөтә халыҡтарға пәйғәмбәрлек итеп әйткәндәрен бойомға ашырасаҡмын.

¹⁴ Бабилдар ҙа күп ҡәүемдәргә, бөйөк батшаларға ҡол булырҙар. Ҡылған ғәмәлдәренә күрә Мин уларға тейешле әжерен бирермен».

Раббының асыу туҫтағы

¹⁵ Исраил Аллаһы Раббы миңә былай тине: – Ҡулымдағы ярһыуым шарабы менән тулы кәсә ал, һине ниндәй ҡәүемдәргә ебәрәм, шуларҙың бөтәһенә лә эсер.

¹⁶ Улар эсеп сайҡалырҙар һәм Мин уларға ебәргән ҡылыс ҡаршыһында аҡылдан шашырҙар.

¹⁷ Мин Раббы ҡулынан кәсә алдым да Ул мине ебәргән бөтә ҡәүемдәргә эсерҙем:

¹⁸ Йәрүсәлим һәм Йәһүҙә ҡалалары әлеге кеүек емереклек һәм дәһшәт билдәһенә әйләнһен, илдең батшалары һәм түрәләре мәсхәрәгә ҡалһын, ләғнәтләнһен өсөн эсерҙем мин ул шарапты.

¹⁹ Шулай уҡ мин уны Мысыр батшаһы фирғәүенгә, уның хеҙмәтселәренә, түрәләренә һәм бөтә халҡына,

²⁰ улар араһында йәшәгән барса килмешәктәргә, Ғус еренең бөтә батшаларына, Пелешти иленең бөтә батшалары – Ашҡылон, Газа, Ғәҡрон ҡалалары хакимдары һәм Ашдодтың иҫән ҡалған халҡына;

²¹ Эдом, Моав, Ғаммон халҡына;

²² Тирҙың, Сидондың бөтә батшаларына; диңгеҙ буйындағы ерҙәрҙең батшаларына;

²³ Деданға, Темаға, Бузға һәм сикә сәстәрен ҡырып йөрөгән бөтә халыҡтарға;

²⁴ Ғәрәбстандың батшаларына, сүлдә йәшәгән ҡәбиләләрҙең барлыҡ батшаларына;

²⁵ Зимри, Ғелам, Мадайҙың барлыҡ батшаларына;

²⁶ төньяҡтағы яҡын һәм йыраҡ илдәрҙең батшаларының барыһына, ер йөҙөндәге бөтә халыҡтарҙың батшаларына бер-бер артлы эсерҙем. Ә Шешах батшаһына килгәндә инде, ул иң аҙаҡтан эсер.

²⁷ – Йермеяһ, һин уларға, Исраил Аллаһы, Күк ғәскәрҙәре Раббыһы былай тип әйтә, тигән: «Эсегеҙ, иҫерегеҙ, ҡоҫоғоҙ, йығылығыҙ ҙа башҡа тормағыҙ, сөнки Мин һеҙҙең өҫтөгөҙгә ҡылыс ебәрәм».

²⁸ Әгәр ҙә кәсәне ҡулыңдан алып эсеүҙән баш тартһалар, әйт, Күк ғәскәрҙәре Раббыһы былай ти: «Мотлаҡ эсәсәкһегеҙ!

²⁹ Ҡарағыҙ, Минең исемем менән аталған ҡалаға һәләкәт юллайым икән, әллә һеҙ язаһыҙ ҡалырбыҙ тип уйлайһығыҙмы? Юҡ, һеҙ язаһыҙ ҡалмаясаҡһығыҙ, сөнки Мин ер йөҙөндә йәшәгәндәрҙең барыһына ҡаршы ҡылыс саҡырам», – тип белдерә Күк ғәскәрҙәре Раббыһы. –

³⁰ Уларға ошо пәйғәмбәрлек һүҙҙәрен еткер, әйт: «Юғарынан күкрәр Раббы, Мөҡәддәс торлағынан тауыш күтәрер; Үҙенең төйәгенә дәһшәтле дөһөрләр, Йөҙөм иҙеүсе кеүек ҡысҡырыр, Донъяла йәшәүселәрҙең барыһына һөрәнләр.

³¹ Был гөрһөлдәү ерҙең сиктәренә барып етер, Сөнки Раббы ҡәүемдәргә дәғүә ҡуйыр; Һәр бер йән эйәһе менән хөкөмләшер, Яуыздарҙы ҡылыстан үткәрер», – тип белдерә Раббы.

³² Күк ғәскәрҙәре Раббыһы былай ти: «Ҡара, бәлә халыҡтан халыҡҡа күсә, Ерҙең сиктәренән ғәрәсәт ҡуба!»

³³ Ул көндө бөтә ер йөҙө, бер сигенән икенсе сигенә тиклем, Раббы һәләк иткән кешеләрҙең мәйете менән тулыр. Мәрхүмдәр өсөн һис кем йәш түкмәҫ, йыйып алып ерләмәҫ; улар тупраҡ өҫтөндә тиҙәк кеүек ятыр.

³⁴ Илағыҙ, көтөүселәр, һыҡтағыҙ! Туҙанға ятып аунағыҙ, эй көтөү башлыҡтары! Һеҙҙе салыу көнө килеп етте! Мәйеттәрегеҙ ерҙә туҙрап ятыр, Селпәрәмә килгән затлы һауыттай булыр.

³⁵ Көтөүселәргә йәшенер урын, Башлыҡтарына ҡотолоу булмаясаҡ.

³⁶ Көтөүселәрҙең илаған тауыштары, Көтөү башлыҡтарының иңрәүе ишетелә! Раббы уларҙың көтөүлектәрен юҡҡа сығарҙы.

³⁷ Раббының асыуынан иркен көтөүлектәр харап булды.

³⁸ Өңөн ташлап сыҡҡан арыҫлан һымаҡ Ул! Баҫҡынсының ярһыуынан, Раббының аяуһыҙ асыуынан Уларҙың ере сүлгә әйләнде.