Һошеяғ 8 - Башкирский ВЗ (неполный)

Боттарға табынған Исраилдың хөкөмгә тартылыуы

¹ Борғо ҡысҡыртырға әҙерлән! Раббының йорто өҫтөндә Гүйә бөркөт өйөрөлә – Сөнки исраилдар Минең менән килешеүҙе боҙҙо, Минең ҡануныма ҡаршы сыҡты.

² „Эй Аллам! Беҙ, Исраил, Һине таныйбыҙ!“ – тип Миңә һығынырҙар.

³ Исраил яҡшылыҡты инҡар итте – Дошман эҙәрләр уны.

⁴ Ризалығымдан башҡа үҙҙәренә батша ҡуйҙылар, Миңә әйтмәй башлыҡ һайланылар. Үҙ баштарына һәләкәт юллап Алтын-көмөштәренән боттар ҡойҙолар.

⁵ Эй Самария, башмаҡ һының инҡар ителде! Асыу-ярһыуым уларға ҡаршы ялҡынланды – Улар бер саҡ таҙарына алырҙармы?

⁶ Был бот – Исраилдың эше, Уны һөнәрсе яһаған, Ул – Алла түгел! Самарияның башмағы селпәрәмә ватылыр!

⁷ Кем ел сәсә, шул ғәрәсәт урыр. Башаҡта ашлыҡ булмаһа, он да булмаҫ, Булһа ла уны яттар ашап бөтәсәк.

⁸ Исраилды йоттолар! Ул хәҙер ҡәүемдәр араһында Бер файҙаһыҙ һауыт һымаҡ ҡалды.

⁹ Башы һуҡҡан яҡҡа барған ҡырағай ишәк шикелле Ул Ашшур тарафына йүнәлде. Әфраим үҙенә уйнаштарҙы аҡса биреп һатып алды.

¹⁰ Сит өәүемдәргә аҡса-бүләктәр бирһә лә Мин хәҙер Үҙ халҡымды хөкөм өсөн йыйып алам. Күп тә ваҡыт үтмәҫ яһаҡтың ауырлығынан Батша ла, түрәләр ҙә ҡалтырап төшөр.

¹¹ Әфраим гонаһ ҡорбаны килтерер өсөн Бихисап ҡорбан усаҡтары эшләне. Тик был ҡорбан усаҡтары уны гонаһҡа батырҙы.

¹² Мин уға бик күп ҡанундарымды яҙҙым, Ул иһә ят нәмә һымаҡ ҡабул итте.

¹³ Бүләк итеп Миңә ҡорбан килтерәләр, Ҡорбан итен ашайҙар. Раббы уларҙы хуш күрмәй. Инде уларҙың яман ҡылыҡтарын иҫкә төшөрөр, Гонаһтарына күрә язалар, Һәм улар Мысырға әйләнеп ҡайтыр.

¹⁴ Бар ҡылыусыһын онотто Исраил, Һарай өҫтөнә һарай төҙөнө. Йәһүҙә лә ҡәлғәле күп ҡалалар һалды. Ләкин Мин уның ҡалаларына ут ебәрәм, Ҡәлғәләрен ялҡынға ем итәм.