Һошеяғ 4 - Башкирский ВЗ (неполный)

Раббының Исраил менән дәғүәләшеүе

¹ Эй исраилдар, тыңлағыҙ Раббы һүҙен: Раббы ошо ерҙәге кешеләр менән дәғүәләшә, Сөнки был ерҙә тоғролоҡ та, мөхәббәт тә, Алланы танып белеү ҙә юҡ.

² Ант боҙоу, алдау һәм үлтереш, Уғрылыҡ һәм аҙғынлыҡ хөкөм һөрә. Ҡан өҫтөнә ҡан түгелә.

³ Шул арҡала ер иңрәр, бөтә тереклек әлһерәр, Ҡырағай януарҙар, күктәге ҡоштар, Хатта диңгеҙҙәге балыҡтар ҙа һәләк булыр.

⁴ «Һис кем башҡа берәүҙе хөкөм итмәһен! Бер кем дә бүтәнгә ғәйеп ташламаһын. Минең дәғүәм һинең менән бит, эй ҡаһин.

⁵ Һин көндөҙ абынырһың, Төндә пәйғәмбәр ҙә һинең менән бергә абыныр. Мин һинең әсәңде харап итәм –

⁶ Халҡым белекһеҙлектән һәләк булды. Һин белемде кире ҡаҡҡан өсөн Мин һине кире ҡағам – Башҡа Миңә ҡаһинлыҡ итмәйәсәкһең. Һин Аллаңдың ҡанунын оноттоң – Мин һинең балаларыңды онотормон.

⁷ Ҡаһиндар күберәк булған һайын, Миңә ҡаршы гонаһтары арта барҙы. Шуға күрә Мин уларҙың данын Хурлыҡҡа әйләндерәсәкмен.

⁸ Халҡым гонаһтары ҡаһиндарҙың тәғәме була бара, Улар кешенең яман ҡылығын теләп тора.

⁹ Халыҡты ла, ҡаһиндарҙы ла бер тәҡдир көтә: Мин уларҙы ҡылғандары өсөн язалаясаҡмын, Ғәмәлдәренә күрә әжерен бирәсәкмен.

^10-11 Ашарҙар, ләкин туймаҫтар, Уйнаш итерҙәр, ләкин тоҡом бирмәҫтәр, Сөнки улар Раббынан баш тартып, Аҙғынлыҡҡа хеҙмәт итә. Иҫке һәм яңы шарап йөрәктәрен биләне.

¹² Минең халҡым ағасҡа һорау бирә, Уға ағас таяҡ яуап ҡайтара! Сөнки фәхешлек рухы уларҙы юлдан яҙҙырҙы: Уйнаш итеп, үҙ Аллаһынан йыраҡлаштылар.

¹³ Тау баштарында ҡорбан салалар, Ҡалҡыулыҡтарҙа – имән, тирәк, теребинҫ аҫтында Күләгәлә рәхәтләнеп хуш еҫ төтәтәләр. Бына ни өсөн ҡыҙҙарығыҙ фәхешлек итә, Килендәрегеҙ зина ҡыла.

¹⁴ Әммә Мин ҡыҙҙарығыҙҙы уйнаш өсөн. Килендәрегеҙҙе зина өсөн язаламам – Ирҙәрегеҙ фәхишәләргә йөрөйҙәр, Уйнашсылар менән бергә ҡорбан килтерә. Аҡылын юғалтҡан халыҡ һәләк буласаҡ!

¹⁵ Һин, Исраил, уйнаш итһәң дә, исмаһам, Йәһүҙә ғәйепкә тарымаһа ине. Гилгалға йөрөмәгеҙ, Бейт-Ауенға сыҡмағыҙ, Унда: „Тере Раббы шаһит!“ – тип ант итмәгеҙ.

¹⁶ Исраил, ҡарышмал тана ише, тиҫкәре булды – Бынан ары Раббы уларҙы, сәхрәләге бәрәс ише, көтөрмө?

¹⁷ Әфраим боттарына йәбешкән – ҡалдыр уны.

¹⁸ Саҡ айный башланылармы, фәхешкә тотоналар, Уларҙың түрәләре аҙғынлыҡты ярата.

¹⁹ Ел уларҙы үҙ ҡанатында өйөрөлтөп алып китер. Үҙ ҡорбанлыҡтары ҡаршыһында хурлыҡҡа ҡалырҙар.