Ғамос 5 - Башкирский ВЗ (неполный)

Исраил тураһында матәм йыры

¹ Эй Исраил нәҫеле, ҡолаҡ һалығыҙ. Һеҙҙең хаҡта матәм йыры йырлайым.

² Ғиффәтле ҡыҙ Исраил йығылды, Башҡаса ул тора алмаясаҡ. Үҙ тупрағында ташландыҡ хәлдә, Уны күтәреп торғоҙоусы юҡ.

³ Раббы Хаким былай ти: «Исраилдың бер ҡалаһы Мең һуғышсыһын яуға сығарһа, Уларҙың йөҙө генә һау ҡалыр; Әгәр ҙә йөҙҙө сығарһа, Тиҫтәһе генә иҫән ҡалыр».

Раббыға ынтылығыҙ

⁴ Раббы Исраил нәҫеленә былай ти: «Миңә ынтылығыҙ, шунда иҫән ҡалырһығыҙ.

⁵ Бейт-Илгә йөрөмәгеҙ, Гилгалға юлланмағыҙ. Беер-Шәвәғкә барыу урынһыҙ. Гилгал мотлаҡ әсиргә төшәсәк, Бейт-Ил бәләгә әйләнәсәк.

⁶ Раббыға ынтылығыҙ – Шул саҡ иҫән ҡалырһығыҙ. Юҡһа Ул, ялҡын шикелле, Йософ йортон ялмап алыр, Бейт-Ил дә дөрләп яныр – Уны һүндереүсе булмаҫ.

⁷ Эй һеҙ, ғәҙел хөкөмдө әремгә әйләндереүселәр, Хаҡлыҡты ергә түңкәрә бәреүселәр – ҡайғы һеҙгә!

Раббының бөйөклөгө

⁸ Өлкәр менән Орионды бар ҡылыусы, Дөм-ҡараңғыны яҡты таңға, Яҡты көндө ҡара төнгә әүерелдереүсе, Диңгеҙ һыуҙарын бергә йыйып, Ер йөҙөнә түгеүсе – Исеме Уның – Раббы!

⁹ Ул көслөләргә һәләкәт ебәрә, Ҡәлғәне ергә тигеҙләй.

¹⁰ Ҡала ҡапҡаһы янында, хөкөмдә, фашлағанды, Дөрөҫөн һөйләгәнде күрә алмайһығыҙ һеҙ.

¹¹ Игенләтә һалым алып, Ярлы-ябағаны бөлдөргәнгә күрә Шымартылған таштан йорттар һалһағыҙ ҙа, Унда йәшәү яҙмаҫ һеҙгә. Гүзәл йөҙөм баҡсалары үҫтереп тә, Шарабынан ләззәтләнеү насип булмаҫ.

¹² Беләм, енәйәттәрегеҙ бик күп, Гонаһтарығыҙ самаһыҙ ауыр; Ғәйепһеҙҙе эҙәрләп, ришүәт алаһығыҙ, Ярлыны ҡала ҡапҡаһы эргәһендә, Хөкөмдә, ситкәрәк этәһегеҙ.

¹³ Шуға был заман шул тиклем яман, Хатта аҡыл эйәһе лә телен йотор.

¹⁴ Яуызлыҡ түгел, яҡшылыҡ эҙләгеҙ – Бына шунда иҫән ҡалырһығыҙ. Шул саҡ, үҙегеҙ әйткәнсә, һеҙҙең менән Күк ғәскәрҙәре Аллаһы Раббы булыр.

¹⁵ Яуызлыҡты кире ҡағып, яҡшылыҡты үҙ итегеҙ, Ҡала ҡапҡаһы янында хак хөкөмдө тергеҙегеҙ, Бәлки, шул саҡ Раббы, Күк ғәскәрҙәре Аллаһы, Йософ нәҫеленең иҫән ҡалғандарын аяр.

¹⁶ Шуның өсөн Раббы, Күк ғәскәрҙәре Аллаһы, Хаким былай ти: «Бөтә майҙандарҙа – илау-һыҡтау, Барса урамдарҙа аһ-зар яңғырар. Игенсене ҡайғы уртаҡлашырға, Сеңләүселәрҙе матәм көнөнә саҡырырҙар.

¹⁷ Арағыҙҙан Мин үткәндә, Йөҙөм баҡсаларында ла иңрәү торор», – ти Раббы.

Раббы көнө – ҡараңғылыҡ, ә яҡтылыҡ түгел

¹⁸ Раббы көнөн көҫәүселәрҙең башына ҡайғы! Ниңә һеҙгә Раббы көнө? Ул яҡтылыҡ түгел, ҡараңғылыҡ.

¹⁹ Кеше арыҫландан ҡасып, Айыуға барып юлыҡҡан кеүек, Өйөнә йүгереп инеп, ҡулын диуарға ҡуйыуға Ҡара йылан саҡҡан кеүек,

²⁰ Раббы көнө лә шулай – Яҡтылыҡ түгел, ә ҡараңғылыҡ, Күҙгә төртһәң күренмәҫлек, унда нур юҡ.

²¹ «Байрамдарығыҙҙы күрә алмайым, кире ҡағам, Тантаналы йыйындарығыҙҙы хуш күрмәйем, – ти Раббы. –

²² Тотош яндырыу ҡорбандары, Икмәк саҙаҡаларығыҙҙы килтерһәгеҙ ҙә, Мин уларҙы хуш күрмәм. Татыулыҡ ҡорбанына килтергән Һимертелгән малдарығыҙға боролоп та ҡарамам.

²³ Шау-шыулы йырҙарыңдан арала Мине, Лирағыҙҙың ауазын ишеткем килмәй.

²⁴ Бының урынына ғәҙеллек – йылға булып, Хаҡлыҡ кипмәҫ ташҡын булып аҡһын.

²⁵ Эй Исраил нәҫеле, сүлдәге ҡырҡ йыл буйына, һеҙ Миңә ҡорбан йәки икмәк саҙаҡалары килтерҙегеҙме ни?

²⁶ Һындарын үҙегеҙ яһап алған илаһ-батшағыҙ Сиккуҫ һәм Кийун йондоҙо менән бергә

²⁷ Мин һеҙҙе һөргөнгә оҙатам. Дамаскҡа ғына түгел, унан да йыраҡҡа», – ти исеме Күк ғәскәрҙәре Аллаһы булған Раббы.