Ғамос 3 - Башкирский ВЗ (неполный)

Исраилдың һайлап алыныуы һәм язаға тарттырылыуы

¹ Ошо һүҙҙе тыңлағыҙ, исраилдар! Раббы уны һеҙҙең хаҡта, Мысыр еренән алып сыҡҡан был нәҫелдең бөтәһенә әйтә.

² «Ерҙәге бөтә нәҫелдәр араһынан Мин тик һеҙҙе генә һайлап алдым, Шуға ла гонаһтарығыҙ өсөн Һеҙҙән бик ҡаты һораясаҡмын!»

³ Ике кеше үҙ-ара һөйләшмәйенсә Бергәләшеп юлға сығырмы?

⁴ Ҡорбаны булмаған арыҫлан Урманда үкерерме? Әгәр ҙә емтек алып ҡайтмаһа, Йәш арыҫлан ояһында ырылдармы?

⁵ Ылыҡтырырлыҡ ем һалынмаһа, Ерҙәге тоҙаҡҡа ҡош төшөрмө? Бер нәмә лә эләкмәһә, Тоҙаҡ ерҙән ҡуҙғалырмы?

⁶ Ҡалала борғо ҡысҡыртырҙармы Ҡурҡырға сәбәп булмаһа? Раббы Үҙе ебәрмәһә, Ҡалаға афәт килерме?

⁷ Раббы Хаким ҡолдары пәйғәмбәрҙәргә Ниәтен асмайынса, һис ғәмәл ҡылмай.

⁸ Арыҫлан үкергәндә Кем ҡурҡыуға ҡалмаҫ? Раббы Хаким һөйләй башлаһа, Кем пәйғәмбәрлек ҡылмаҫ?

Раббының Исраилды һәм Самарияны хөкөм итеүе

⁹ Ашдод ҡәлғәләрендә иғлан итегеҙ, Мысыр ерендтәге нығытмаларҙа белдерегеҙ: «Самарияның тау баштарына артылығыҙ, Эсендәге башбаштаҡлыҡты күрегеҙ, Унда ҡыҫырыҡлау, иҙеү хөкөм һөрә!»

¹⁰ «Ғәҙел йәшәй белмәй улар, – тип белдерә Раббы. – Улар ҡәлғәләренә залимлыҡ менән, Талаш-тартыш менән байлыҡ йыя».

¹¹ Шуға күрә Раббы Хаким былай ти: «Дошман килеп илеңде ҡамар, Самария, Һине ҡеүәтеңдән яҙҙырып, Ҡәлғәләрегеҙҙе тотош талар».

¹² Раббы былай ти: «Ҡайсаҡ көтөүсе ике тояҡ йә ярты ҡолаҡ ҡына эләктереп өлгөрә – арыҫлан талаған малдан ни бары шулар ҡалған була. Ана шулай Самарияла йәшәгән исраилдарҙан да диван арҡаһы менән һике тояғы ғына тороп ҡалыр».

¹³ «Тыңлағыҙ һәм Яҡуп нәҫелен иҫкәртегеҙ, – ти Раббы Хаким, Күк ғәскәрҙәре Аллаһы, –

¹⁴ Исраилға енәйәте өсөн Хисап көнө еткән саҡта, Бейт-Илдәге ҡорбан усаҡтарын да юҡ итәм, Мөгөҙҙәрен ҡырҡып, ергә ырғытырҙар.

¹⁵ Ҡышҡы ла, йәйге лә һарайҙарҙы емерермен, Фил һөйәге менән биҙәлгән затлы йорттарҙы, Мөһабәт һарайҙарҙы харабаға әйләндерермен», – тип белдерә Раббы.