Әйтемдәре 24 - Башкирский ВЗ (неполный)

¹ Яман кешеләргә көнләшмә, улар менән бергә булырға тырышма,

² күңелдәрендә йәбер-золом ниәтләйҙәр, телдәре яманлыҡ сәсә уларҙың.

³ Аҡыл менән йорт һалыныр, зиһен менән нығытылыр,

⁴ бүлмәләр иһә белем менән оҫталарса затлы һәм күркәм әйберҙәргә тулыр.

⁵ Аҡыллы кеше ҡеүәтле булыр, белемле әҙәм үҙ көсөн арттырыр.

⁶ Һуғышыңды һәр яҡтан уйлап алып бар, уңыш кәңәшселәр күп урында була.

⁷ Ахмаҡ өсөн зирәклек артыҡ юғары, ҡала ҡапҡаһы төбөндә ауыҙын аса алмаҫ.

⁸ Золом ниәтләгәнде залим тиерҙәр.

⁹ Ахмаҡлыҡ менән ҡоролған ниәт – гонаһ, башҡаларҙы мәсхәрәләүсегә ерәнеп ҡарарҙар.

¹⁰ Бәлә килгәндә тәҡәтһеҙ ҡалаһың икән, тимәк, көс-ҡеүәткә ярлыһың.

¹¹ Үлемгә дусар ителгәнде йолоп ал; һәләкәт янаған әҙәмдән баш тартырһыңмы ни?

¹² «Беҙ быны белмәнек бит», – тиһәң дә, йөрәгендәген Үлсәүсе белмәҫме? Һинең йәнеңде Күҙәткән аңламаҫмы? Ул һәр кемгә ғәмәленә күрә әжерен бирә.

¹³ Улым, бал ҡап, бик тәмле ул; кәрәҙле бал, тамағыңа татлы булыр.

¹⁴ Күңелеңә аҡыл тигәнең дә шулай, уны эҙләп таптыңмы – һөҙөмтәһе лә булыр, өмөттәрең һинең бушҡа китмәҫ.

¹⁵ Эй залим, тәҡүәнең торлағы янында боҫҡон ҡорма, йортон уның туҙҙыраһы булма:

¹⁶ тәҡүә кеше ете йығылып, ете торор, залимдар йығылыр ҙа харап булыр.

¹⁷ Дошманым ҡоланы, тип шатланма, абынды тип йөрәгең һөйөнмәһен.

¹⁸ Юҡһа, Раббы күреп, был эште оҡшатмаҫ, Үҙенең асыуын дошманың өҫтөнән алыр.

¹⁹ Яманлыҡ эшләүсене күреп йәнең көймәһен, яуыз бәндәләрҙән көнләшмә;

²⁰ барыбер ямандарҙың киләсәге юҡ, намыҫһыҙҙың сырағы тиҙ һүнә.

²¹ Раббынан ҡурҡ, улым, батшанан ҡурҡ, фетнәселәр менән аралашма;

²² сөнки уларҙан бәлә көтмәгәндә килер, һәр икеһенең бирәсәк язаһын кем белә?

Аҡыл эйәләре әйткән һүҙҙәр

²³ Аҡыл эйәләре тағы ла былай ти: Хөкөмдә ғәҙелһеҙлек – яман эш;

²⁴ ғәйеплегә: «Һин хаҡлыһың», – тиеүсене ил ләғнәтләр, халыҡтар уға нәфрәтләнер,

²⁵ ә ғәйеплене фашлаусылар һөйөнөр, Баштарына мул бәрәкәт яуыр.

²⁶ Ғәҙел яуап татлы – ирендән үбеү менән бер.

²⁷ Башта тыштағы эштәреңде башҡар, баҫыуыңдағы эште тамамла, шунан ғына өй һалып кер.

²⁸ Яҡыныңа ҡаршы ялған шаһитлыҡ ҡылма, ауыҙыңда алдаҡ һүҙ сыҡмаһын.

²⁹ «Ул миңә нимә эшләне, мин дә уға шуны эшләйем, ғәмәленә күрә әжерен бирәм», – тимә.

³⁰ Бер саҡ мин ялҡау әҙәмдең баҫыуы, ахмағыраҡ хужаның йөҙөм баҡсаһы эргәһенән бара инем.

³¹ Күрәм, бөтә ерҙе сәнскәк баҫҡан, ҡый үләне күкрәп үҫеп сыҡҡан, баҡсаның таш ҡоймаһы емерелеп ята.

³² Ҡараным да, үҙемә һабаҡ алдым, күргәндәрҙән шуны аңланым мин:

³³ йәнә әҙерәк йоҡлап, серем итһәң, ҡул ҡаушарып тағы ултыра бирһәң –

³⁴ өйөңә ҡараҡ һымаҡ мохтажлыҡ инер, ҡораллы баҫҡынсы булып нужа һөжүм итер.