Әйтемдәре 18 - Башкирский ВЗ (неполный)

¹ Бүтәндәр менән иҫәпләшмәгән кеше нимә теләй, шуны эшләй; һәр төрлө аҡыллы нәсихәткә ҡаршы килә.

² Ахмаҡ белемде яратмай, үҙенең фекерен генә алға һөрә.

³ Яуызлыҡ артынан нәфрәт килә, намыҫһыҙлыҡҡа хурлыҡ эйәрә.

⁴ Кеше ауыҙынан сыҡҡан һүҙҙәр – тәрән йылға һымаҡ, аҡыл сығанағы – ташҡын һыу.

⁵ Яуызды яҡлашыу, ғәйепһеҙҙе хаҡ хөкөмдән мәхрүм итеү – енәйәт.

⁶ Ахмаҡтың теле ыҙғыш ҡуптара, ауыҙы туҡмаҡҡа сәбәп була.

⁷ Ахмаҡтың теле – үҙе өсөн һәләкәт сығанағы, әйткән һүҙе – йәненә тоҙаҡ.

⁸ Ғәйбәтсенең һүҙе – тәмле тәғәм, кешенең эс-бауырына үтеп инә.

⁹ Эшендә ялҡау булған кеше – емереүсенең туғаны.

¹⁰ Раббы исеме – ҡеүәтле ҡәлғә, тәҡүә әҙәм унда ҡасып имен ҡала.

¹¹ Бай өсөн мал-мөлкәт – гүйә нығытма, бейек диуар һымаҡ күренә уға.

¹² Һәләкәттән алда күңел тәкәбберлеге килә, тыйнаҡлыҡ иһә үҙе артынан дан-шөһрәт эйәртә.

¹³ Тыңлап бөтмәйенсә яуап ҡайтарыу – ахмаҡлыҡ һәм хурлыҡ.

¹⁴ Кешенең рухы ауырыуға сыҙай ала, тик рух һынһа, нимә эшләргә һуң?

¹⁵ Аҡыллы әҙәм ҡолағы менән белем эҙләр, аңлы бәндә йөрәге менән аҡыл туплар.

¹⁶ Бүләк биреү кешегә юл аса, бөйөктәр алдына алып бара.

¹⁷ Хөкөмдә беренсе һөйләгән кеше икенсеһе бәхәскә ҡушылғанға тиклем хаҡ күренер.

¹⁸ Көслө дәғүәселәр араһында бәхәсте йәрәбә хәл итә.

¹⁹ Асыулы туған – нығытмалы ҡала, ә ыҙғыш бикле ҡапҡа һымаҡ айыра.

²⁰ Үҙ теленең емеше менән туя кеше, теле нәмә таба, шуға ҡәнәғәт була.

²¹ Үлем менән йәшәү телдең хөкөмөндә, телгә оҫталар уның емеше менән туйына.

²² Ҡатын тапҡан – хазина тапҡан, Раббының илтифатын ҡаҙанған.

²³ Ярлы ялбарып һорар, бай тупаҫ яуаплар.

²⁴ Дуҫы күптең эш-мәшәҡәте күп, ләкин туғандан да яҡыныраҡ дуҫ була.