Әйтемдәре 13 - Башкирский ВЗ (неполный)

¹ Аҡыллы улан ата өгөтөн тыңлар, йүнһеҙ улан шелтәгә ҡолаҡ һалмаҫ.

² Кеше үҙ һүҙенең емештәре менән игелек табыр; мәкерленең күңеле тик золом теләр.

³ Кем телен тыя, шул йәнен һаҡлар, телен тыймаған харап булыр.

⁴ Ялҡау әллә нәмәләр көтөп ятҡансы, егәрле тамағын туйҙырған.

⁵ Тәҡүә әҙәм алдаҡты һөймәй, боҙоҡ иһә хурлыҡҡа төшә, мәсхәрәгә ҡала.

⁶ Дөрөҫлөк юлында булғанды тоғролоғо ҡотҡарыр, яуызды ҡылған гонаһы һәләк итер.

⁷ Ҡайһылар хәйерсе булһа ла бай булып ҡылана, икенселәр бай булһа ла хәйерсе булып күренергә тырыша.

⁸ Бай әҙәм байлығы менән ғүмерен һаҡлай, ә ярлыға һис нәмә янамаҫ.

⁹ Иманлының шәме яҡты яна, яуыздыҡы быҫҡып һүнә.

¹⁰ Тәкәбберлектән тик ыҙғыш сыға, кәңәшле эш иткәндәр аҡыл йыя.

¹¹ Харам юл менән табылған байлыҡ тарҡала, бөртөкләп йыйылған байлыҡ арта бара.

¹² Оҙаҡ бойомға ашмаған өмөт – йөрәк әрнеүе, ә ғәмәлгә ашҡаны – тормош ағасы.

¹³ Нәсихәтте һанға һуҡмаған зыян күргән, бойороҡто тотҡан – бүләкләнгән.

¹⁴ Аҡыл эйәһенең тәғлимәте – тормош шишмәһе, Ул үлем тоҙағынан һаҡлай.

¹⁵ Айыҡ аҡыл илтифат ҡаҙана, мәкер юлы һәләкәткә илтә.

¹⁶ Зирәк кеше белеменә таянып эш итер, аҡылһыҙ ахмаҡлығын күрһәтер.

¹⁷ Яман илсе бәлә алып килә, тоғро илсе күңелгә шифа килтерә.

¹⁸ Нәсихәткә ҡолаҡ һалмаған малһыҙ-данһыҙ ҡалыр, нәсихәтте үҙ иткән ҡәҙер-хөрмәт табыр.

¹⁹ Ғәмәлгә ашҡан теләк – күңелгә дауа, йүләргә яуызлығы менән хушлашыу – ҡот осҡос.

²⁰ Аҡыллы менән эш иткән – аҡыл йыйған, аҡылһыҙҙы иш иткән – туңған.

²¹ Гонаһлыны – бәлә-ҡаза, тәҡүәне яҡшылыҡ оҙата йөрөй.

²² Тәҡүә балаларының балаларына ла мираҫ ҡалдыра, гонаһлының тапҡаны тәҡүәгә насип була.

²³ Ярлының баҫыуында уңышы мул, тик уны ғәҙелһеҙлек харап итә.

²⁴ Сыбығын йәлләй икән, тимәк, улын яратмай, улын яратһа, ваҡытында арт һабағын уҡытыр.

²⁵ Яҡшы әҙәм туйғансы ашар, яман әҙәмдең ҡорһағы буш ҡалыр.