Башланмыш 5 - Башкирский ВЗ (неполный)

Әҙәмдең Нухҡа тиклемге нәҫел-ырыуы

¹ Бына Әҙәмдең һәм уның нәҫел-нәсәбенең шәжәрәһе. Алла кешене яратҡанда, уны Үҙенә оҡшатып яратты.

² Алла уларҙы ир-ат һәм ҡатын-ҡыҙ итеп яратты, уларға фатиха ҡылды. Яратҡан көнөндә уларға «кеше» тип исем бирҙе.

³ Әҙәмгә йөҙ ҙә утыҙ йәш тулғанда, уның улы тыуҙы – тап үҙенә оҡшағайны һәм үҙе рәүешле ине. Әҙәм уға Шеҫ тип исем бирҙе.

⁴ Шеҫ тыуғандан һуң, Әҙәм һигеҙ йөҙ йыл йәшәне; уның башҡа улдары һәм ҡыҙҙары ла тыуҙы.

⁵ Әҙәм туғыҙ йөҙ утыҙ йыл йәшәп вафат булды.

⁶ Шеҫҡа йөҙ ҙә биш йәш тулғанда, уның улы Әнош тыуҙы.

⁷ Әнош тыуғандан һуң, Шеҫ һигеҙ йөҙ ете йыл йәшәне; тағы ла улдары һәм ҡыҙҙары тыуҙы.

⁸ Шеҫ туғыҙ йөҙ ун ике йыл йәшәп вафат булды.

⁹ Әношҡа туҡһан йәш булғанда улы Ҡынан тыуҙы.

¹⁰ Ҡынан тыуғандан һуң, Әнош һигеҙ йөҙ ун биш йыл йәшәне; уның тағы улдары һәм ҡыҙҙары тыуҙы.

¹¹ Әнош туғыҙ йөҙ биш йыл йәшәгәндән һуң вафат булды.

¹² Ҡынанға етмеш йәш булғанда улы Маһалалил тыуҙы.

¹³ Маһалалил тыуғандан һуң, Ҡынан һигеҙ йөҙ ҡырҡ йыл йәшәне; уның башҡа улдары һәм ҡыҙҙары ла булды.

¹⁴ Ҡынан туғыҙ йөҙ ун йыл йәшәп вафат булды.

¹⁵ Маһалалилға алтмыш биш йәш булғанда, улы Йәрәд тыуҙы.

¹⁶ Йәрәд тыуғандан һуң, Маһалалил һигеҙ йөҙ утыҙ йыл йәшәне; уның тағы ла улдары һәм ҡыҙҙары бар ине.

¹⁷ Маһалалил һигеҙ йөҙ туҡһан биш йыл йәшәп вафат булды.

¹⁸ Йәрәдкә йөҙ ҙә алтмыш ике йәш булғанда, уның улы Ханох тыуҙы.

¹⁹ Ханох тыуғандан һуң, Йәрәд һигеҙ йөҙ йыл йәшәне; уның тағы ла улдары һәм ҡыҙҙары тыуҙы.

²⁰ Туғыҙ йөҙ алтмыш ике йыл йәшәп, Йәрәд вафат булды.

²¹ Ханохҡа алтмыш биш йәш булғанда, улы Меҫушелах тыуҙы.

²² Меҫушелах тыуғандан һуң, Ханох өс йөҙ йыл йәшәне, ғүмере буйына ул Алла юлында йөрөнө. Уның тағы ла улдары һәм ҡыҙҙары булды.

²³ Ханох өс йөҙ ҙә алтмыш биш йәш йәшәне,

²⁴ ғүмере буйы ул Алла юлында йөрөнө. Шунан Ханох юҡ булды, сөнки Алла уны Үҙ янына алды.

²⁵ Меҫушелахҡа йөҙ ҙә һикһән ете йәш булғанда, уның улы Ләмәх тыуҙы.

²⁶ Ләмәх тыуғандан һуң, Меҫушелах ете йөҙ һикһән ике йыл йәшәне; уның башҡа улдары һәм ҡыҙҙары ла бар ине.

²⁷ Меҫушелах туғыҙ йөҙ алтмыш туғыҙ йыл йәшәп вафат булды.

²⁸ Ләмәхкә йөҙ ҙә һикһән ике йәш булғанда, уның улы тыуҙы.

²⁹ Ләмәх уға Нух тип исем бирҙе һәм: «Раббы ҡәһәрләгән тупраҡты эшкәртеп ҡулдарыбыҙ талсыҡҡанда, ул беҙгә йыуаныс бирер», – тине.

³⁰ Нух тыуғандан һуң, Ләмех биш йөҙ туҡһан биш йыл йәшәне; уның тағы ла улдары һәм ҡыҙҙары тыуҙы.

³¹ Ләмәх бөтәһе ете йөҙ етмеш ете йыл йәшәп вафат булды.

³² Нух биш йөҙ йыл йәшәгәндән һуң, уның Шем, Хам һәм Йәфәҫ исемле улдары тыуҙы.