Башланмыш 46 - Башкирский ВЗ (неполный)

Яҡуптың Мысырға күсеп килеүе

¹ Исраил, бөтә мөлкәтен йыйып алып, юлға сыҡты. Беер-Шәвәғкә килеп еткәс, ул атаһы Исхаҡтың Аллаһына бағышлап ҡорбан салды.

² Шул төндө Алла күренмештә: – Яҡуп, Яҡуп, – тип өндәште. – Эйе, – тип яуап бирҙе Яҡуп.

³ Алла былай тине: – Мин Алла, атайың Аллаһымын. Ҡурҡма, күс Мысырға: унда Мин һинән бөйөк халыҡ бар ҡылырмын.

⁴ Мысырға һинең менән Мин Үҙем барам, Үҙем үк һине унан алып та сығырмын. Йософ күҙҙәреңде үҙ ҡулдары менән йомдорор.

⁵ Яҡуп Беер-Шәвәғтән ҡуҙғалып китте. Улдары аталары Яҡупты, бала-саға, ҡатын-ҡыҙҙарҙы фирғәүен ебәргән арбаларға ултыртып алып китте;

⁶ үҙҙәре менән Ҡәнғәндә туплаған мал көтөүҙәре, мөлкәттәре бара ине. Шулай итеп, Яҡуп бөтә нәҫел-ырыуы менән Мысырға күсенде:

⁷ улдарын, ҡыҙҙарын, ейән-ейәнсәрҙәрен – барлыҡ ырыуын Мысырға алып килде ул.

⁸ Бына Исраилдың Мысырға күсеп килгән улдарының – Яҡуп менән улдарының исемдәре: Яҡуптың баш балаһы Рәүвән.

⁹ Рәүвәндең улдары: Ханох, Паллу, Хесрон һәм Карми.

¹⁰ Шимғондың улдары: Йемуел, Ямин, Оһад, Яхин, Сохар һәм ҡәнғәниҙәрҙән алған ҡатынының улы Шаул.

¹¹ Левиҙең улдары: Гершон, Ҡыһаҫ һәм Мерари.

¹² Йәһүҙәнең улдары: Ғер, Онан, Шела, Пәрәс һәм Зерах. Ғер менән Онан Ҡәнғәндә саҡта уҡ вафат булды, ә Пәрәстең Хесрон һәм Хамул исемле улдары тыуҙы.

¹³ Исасхарҙың улдары: Толағ, Пуа, Йов һәм Шимрон.

¹⁴ Зевулундың улдары: Сәрәд, Элон һәм Яхлеил.

¹⁵ Былар Яҡуптың Лиәнән тыуған балалары. Лиә уларҙы һәм ҡыҙы Динәне Паддан-Арамда тапҡайны. Яҡуптың улдары һәм ҡыҙҙары йәмғеһе утыҙ өс кеше ине.

¹⁶ Ғадтың улдары: Сифион, Хагги, Шуни, Әсбон, Ғери, Ароди, Арели.

¹⁷ Ашерҙың улдары: Имна, Ишуа, Ишуи һәм Бериға. Уларҙың ҡыҙ туғаны Сәрах. Бериғаның улдары: Хәвәр һәм Малкиил.

¹⁸ Былар Лавандың ҡыҙы Лиәгә хеҙмәтсе итеп биргән Зилпаның Яҡупҡа табып биргән балалары. Улар барлығы ун алты кеше.

¹⁹ Яҡуптың ҡатыны Рәхиләнән тыуған улдары: Йософ менән Бинйәмин.

²⁰ Йософтоң Мысырҙа Он ҡалаһының ҡаһины Потиферағтың ҡыҙы Аснаҫтан Менашше менән Әфраим исемле ике улы тыуҙы.

²¹ Бинйәминдең улдары: Белағ, Бәхәр, Ашбел, Гера, Нағаман, Әхи, Рош, Муппим, Хуппим һәм Ард.

²² Яҡуп менән Рәхиләнән таралған нәҫел: барлығы ун дүрт кеше.

²³ Дандың улы: Хушим.

²⁴ Нафталиҙың улдары: Яхсеил, Гуни, Йесәр һәм Шиллем.

²⁵ Былар Лавандың ҡыҙы Рәхиләгә биргән Билһатан тыуған балалар. Билһа Яҡупҡа бөтәһе ете бала тапты.

Яҡуп улдарының Гошенда төйәкләнеүе

²⁶ Улдарының ҡатындарынан башҡа, Яҡуп нәҫеленән булған һәм уның менән бергә Мысырға күсеп килгән кешеләр бөтәһе алтмыш алты ине. Былар барыһы ла Яҡуптың нәҫеле.

²⁷ Йософтоң Мысырҙа тыуған ике улы менән бергә Яҡуптың Мысырға күскән ғаиләһе етмеш кешенән тора ине.

²⁸ Яҡуп Гошен юлын белешер өсөн Йәһүҙәне Йософҡа алдан ебәргәйне. Улар Гошенға етеп килгәндә,

²⁹ Йософ арбаһын егергә ҡушты ла Гошенға атаһын ҡаршыларға китте. Атаһын күреү менән, атлығып уның муйынына барып һарылды һәм ҡосағында бик оҙаҡ иланы.

³⁰ Исраил Йософҡа: – Һине имен-аман күрҙем, инде үлһәм дә үкенмәйем, – тине.

³¹ Йософ ағаларына һәм барлыҡ туған-ырыуына: – Хәҙер фирғәүенгә, минең яныма Ҡәнғәндән ағайҙарым менән атайымдың ғаиләһе килде, тип хәбәр итергә барам, – тине. –

³² Улар мал бағыусылар, һарыҡ көтәләр, үҙҙәре менән ваҡ һәм эре малдарын, бөтә мөлкәттәрен алып килгәндәр, тип әйтәм.

³³ Фирғәүен һеҙҙе саҡырып: «Нимә менән шөғөлләнәһегеҙ?» – тип һораһа,

³⁴ былай тип яуап бирегеҙ: «Беҙ ҡолдарың, ата-бабаларыбыҙ кеүек, бала саҡтан уҡ мал көтәбеҙ». Шул саҡта һеҙҙе Гошен ерендә төйәкләндерер, сөнки мысырҙар мал көтөүселәрен ерәнгес һанай.