Башланмыш 40 - Башкирский ВЗ (неполный)

Йософтоң тотҡондарҙың төштәрен юрауы

¹ Ошо хәлдәрҙән һуң бер аҙ ваҡыт үткәс, батшаның шарап ҡойоусыһы менән икмәк бешереүсеһе үҙ хакимдары – Мысыр батшаһы алдында ғәйепкә тарыны.

² Фирғәүен был һанаттарына – баш шарап ҡойоусы менән баш икмәксегә – бик ныҡ асыуланды ла

³ уларҙы һаҡсылар түрәһе йортондағы төрмәгә, Йософ ултырған зинданға ябырға ҡушты.

⁴ Һаҡсылар түрәһе Йософто уларға хеҙмәтсе итеп тәғәйенләне. Улар шулай бер ни тиклем ваҡыт зинданда бергә булдылар.

⁵ Бына бер көндө Мысыр батшаһының зинданда тотҡон булып ултырған шарап ҡойоусыһы менән икмәксеһе төш күрҙе. Икеһенең төшө ике төрлө, мәғәнәләре лә төрлөсә ине.

⁶ Йософ иртәнсәк улар янына ингәйне, быларҙың нимәгәлер күңелдәре тыныс түгел икәнен күрҙе.

⁷ Йософ үҙе менән бергә һаҡсылар башлығының өйөндәге зинданда ултырған фирғәүен һарайы әһелдәренән: – Ниңә бөгөн йөҙөгөҙ бик бойоҡ? – тип һораны.

⁸ Улар Йософҡа: – Төш күргәйнек тә, юрарға кешеһе юҡ, – тинеләр. – Юрау Алла ихтыярында түгелме ни? – тине Йософ. – Төшөгөҙҙө миңә һөйләһәгеҙ ине.

⁹ Шарап ҡойоусылар башлығы Йософҡа төшөн һөйләне: – Миңә шундай төш керҙе: имеш, алдымда йөҙөм ағасы ботағы.

¹⁰ Унан өс үҫенте киткән. Бына улар үҫә башланы ла, имеш, сәскә атты, шунан емештәр хасил булды, ҡараһам, бешеп тә еттеләр.

¹¹ Ҡулымда фирғәүендең һауыты икән, тим. Мин йөҙөм тәлгәшен өҙөп алдым да, һутын теге һауытҡа һығып, фирғәүенгә бирҙем.

¹² – Төшөңдөң мәғәнәһе шул, – тине уға Йософ. – Өс үҫенте – өс көн ул.

¹³ Өс көн үтер – фирғәүен һине тағы күтәрер: элекке урыныңа кире ҡуйыр ҙа һин уға элеккесә шарап ҡойоп, шараплы туҫтаҡне уның ҡулына тоттороп торорһоң.

¹⁴ Тик һин миңә лә ярҙам ит: үҙең бәхеткә ирешкәс, мине лә онотма, фирғәүен менән һөйләшкәндә минең турала йылы һүҙ әйт, бынан ҡотҡар мине!

¹⁵ Мине ғивриҙәр еренән урлап алып килделәр. Бында ла зинданға бикләрлек бер нимә лә эшләмәнем!

¹⁶ Баш икмәксе төштөң хәйерлегә юралыуын күреп, Йософҡа: – Ә мин шундай төш күрҙем, – тине. – Башым өҫтөндә өс кәрзин, имеш;

¹⁷ өҫкөһөндә фирғәүен өсөн бешерелгән төрлө-төрлө икмәктәр. Шул кәрзиндәге аҙыҡты ҡоштар суҡый икән, тим.

¹⁸ – Һинең төшөңдөң мәғәнәһе былай, – тине уға Йософ. – Өс кәрзин – өс көн ул.

¹⁹ Өс көн үткәс, фирғәүен һине лә күтәрер: һин дар ағасында аҫылынып торорһоң, ә тәнеңде ҡоштар суҡып өҙгөләр.

²⁰ Өс көндән һуң фирғәүендең тыуған көнө ине. Ул һарай әһелдәре өсөн мәжлес ойошторҙо һәм шулар алдында баш шарап ҡойоусы менән баш икмәксене юғары күтәрҙе –

²¹ шарап ҡойоусылар башлығын элекке урынына ҡайтарҙы; ул тағы шараплы туҫтаҡты фирғәүен ҡулына тоттороп тора башланы;

²² ә баш икмәксене дарға аҫтырҙы – Йософ нисек әйтһә, шулай булды.

²³ Әммә шарап ҡойоусы Йософто ла, уның үтенесен дә онотто.