Башланмыш 10 - Башкирский ВЗ (неполный)

Ер йөҙөндәге халыҡтар

¹ Бына Нухтың улдары Шем, Хам һәм Йәфәҫтең нәҫел шәжәрәләре. Туфан һыуы ҡайтҡандан һуң, Шем, Хам һәм Йәфәҫтең балалары тыуҙы.

² Йәфәҫтең улдары: Ғүмәр, Магог, Мадай, Яуан, Тувал, Мәшәх һәм Тирас.

³ Ғүмәрҙең улдары: Ашкеназ, Рифаҫ һәм Тогарма.

⁴ Яуандың ул-нәҫелдәре: Әлиша, Таршиш, шулай уҡ киттиҙәр һәм доданиҙар.

⁵ Улар – һәр ҡайһыһы үҙ телдәрендә һөйләшеп, ырыу-ҡәбиләләр булып диңгеҙ ярында үҙ ерҙәрендә йәшәгән Йәфәҫ нәҫелдәре.

⁶ Хамдың улдары: Куш, Мисраим, Пут һәм Ҡәнғән.

⁷ Куштың улдары: Сева, Хауила, Савта, Рағма һәм Савтеха. Рағманың улдары: Шева менән Дедан.

⁸ Куштың тағы Нимрүд исемле улы бар ине, ул ер йөҙөндә иң беренсе батыр булды.

⁹ Раббы алдында ҡеүәтле аусы ине ул. «Раббы хозурында Нимрүд кеүек оҫта һунарсы» тигән әйтем шунан ҡалған.

¹⁰ Тәүҙә уның батшалығына Шинғар ерҙәрендәге Бабил, Әрәх, Аккад, Калне ҡалалары инә ине.

¹¹ Был илдән ул Ашшурға китеп, унда Ниневеға, Реховот-Ирға һәм Калахҡа,

¹² шулай уҡ Ниневе менән Калах араһындағы Ресенға – ул бик ҙур ҡала – нигеҙ һалды.

¹³ Мисраим луди, ғанами, леһави, нафтухи,

¹⁴ патруси, каслухи (уларҙан пелештиҙәр тарала) һәм кафториҙарҙың тәүбабаһы булды.

¹⁵ Ҡәнғәндең улдары: Сидон (был уның баш балаһы), Хит,

¹⁶ шулай уҡ унан йевусиҙәр, әмөриҙәр, гиргашиҙәр,

¹⁷ хиууиҙәр, ғарҡиҙар, синиҙар,

¹⁸ аруадиҙар, семариҙар һәм хамаҫиҙар тарала. Һуңынан Ҡәнғәндең нәҫел-ырыуы тирә-яҡҡа йәйелде.

¹⁹ Уларҙың биләмәләре Сидондан алып Герар яғына табан Газаға тиклем, ә Содом, Ғамора, Адма һәм Севоим яғынан Лашағҡа тиклем һуҙыла.

²⁰ Былар – үҙ ерҙәрендә ырыу-ҡабилә булып йәшәгән, үҙ телдәрендә һөйләшкән Хам нәҫелдәре.

²¹ Йәфәҫтең ағаһы Шемдың да балалары булды. Шем бөтә Ғевәр нәҫеленең атаһы ине.

²² Шемдың улдары: Ғелам, Ашшур, Арпахшад, Луд һәм Арам.

²³ Арамдың улдары: Ғус, Хул, Ғәҫәр һәм Маш.

²⁴ Арпахшад – Шелахтың, Шелах – Ғевәрҙең атаһы.

²⁵ Ғевәрҙең ике улы тыуҙы: береһенең исеме – Пәләг – сөнки тап шул ваҡытта ер бүленгәйне, икенсеһенеке – Йоҡтан.

²⁶ Йоҡтан – Алмодад, Шәләҫ, Хасармавеҫ, Ярах,

²⁷ Һадорам, Узал, Диҡла,

²⁸ Ғовал, Авимаил, Шева,

²⁹ Офир, Хауила һәм Йовавтың тәүатаһы. Былар барыһы ла – Йоҡтандан таралған нәҫелдәр.

³⁰ Уларҙың ерҙәре Мешанан көнсығышҡа табан Сефар тауҙарына хәтлем һуҙыла ине.

³¹ Былар – үҙ ерҙәрендә ырыу-ҡабилә булып йәшәгән, үҙ телдәрендә һөйләшкән Шем нәҫелдәре.

³² Туфандан һуң Нух улдары нәҫеленән сыҡҡан һәм ырыу-ҡәбилә булып ер йөҙөнә таралған халыҡтарҙың нәҫел шәжәрәһе ошо.