Псалманууд 94 - Бурятский Библия. Отдельные книги Ветхого Завета

¹ Үһөөгөө абалгын Бурхан болохо Эзэн, үһөөгөө абалгын Бурхан, Өөрыгөө харуулыт!

² Дэлхэйн Шүүгшэ, бодыт, бардамлагшадта хэмээрнь бусаагыт.

³ Хэды болотор хорото муу зон, хорото муу зон хэды болотор баясан байхаб?

⁴ Тэдэ дээрэлхүү үгэнүүдые сасажа, хуулита бэшэ юумэ хэжэ, тэрээнээ һайрхан байна.

⁵ Эзэн, тэдэ Танай арад түмэниие дарлана, уг залгамжалалыетнай зобооно.

⁶ Бэлбэһэн эхэнэрнүүдые, хариин зониие алана, үншэн хэнзэнүүдые усадхана.

⁷ «Эзэн харахагүй, Яковой Бурхан мэдэхэгүй» гэжэ хэлэнэ.

⁸ Мунхаг зон, ухаа орыт! Тэнэг зон, хэзээ ойлгохобта?!

⁹ Шэхэ бүтээгшэ Тэрэ соносохогүй гэжэ гү? Нюдэ бүтээгшэ Тэрэ харахагүй гэжэ гү?

¹⁰ Үндэһэтэнүүдые гэгээрүүлдэг, хүндэ эрдэм заадаг Тэрэ зэмлэхэгүй гэжэ гү?

¹¹ Эзэн хүнэй бодолнуудые мэдэдэг: тэдэ хооһон дэмы юм.

¹² Эзэн, Танай гэгээрүүлдэг, һургаал заабаринуудаа хэлэн һургадаг хүн юрөөлтэйл!

¹³ Иигэжэ хорото муу хүндэ нүхэ малтажа, зоболонгой үдэрһөөнь эхилэн амгалан байдал үгэнэт.

¹⁴ Юуб гэбэл, Эзэн арад түмэнөө орхихогүй, Өөрын угай зөөри хаяхагүй.

¹⁵ Иигэжэ сүүд дахин шударга зүб болохо, зүрхээрээ зүб сэхэ зон булта тэрэниие дахаха.

¹⁶ Мууе хэгшэдэй урдаһаа хэн намтай хамта бодохоб? Гэм хэгшэдэй урдаһаа намтай хамта бодохоб?

¹⁷ Эзэнэй намда туһалаагүй һаань, би аниргүйшүүлэй орон руу мордохо бэлэйб.

¹⁸ «Хүлни шэшэржэ байна» гэжэ хэлэхэтэйм хамта, Эзэн, энэрэл хайратнай намайе дүнгэдэг байгаа.

¹⁹ Һанаа зобоогшо зүйлэй досоомни олон болоходо Танай һатааруулһан үгэнүүд намайе баясаадаг мүн.

²⁰ Хуулида харша муу муухайе һанаашархаһан зоной, үгышье гэбэл, сүйд тодхорой шэрээ Танһаа холо.

²¹ Зүб шударга хүниие алахаяа тэдэ бүлэгөөрөө шуумайжа. Гэмтэй бэшэ хүнэй шуһа урдахуулхаяа һэдэнэ.

²² Харин Эзэн минии хамгаалалта, Бурхамни намайе хоргодуулагша хада хабсагай мүн.

²³ Тэрэ гэм нүгэлынь өөһэд дээрэнь тохохо, гэмтэ хэрэгэйнь түлөө тэдэниие усадхаха, Эзэн Бурхамнай тэдэниие усадхаха!