Псалманууд 90 - Бурятский Библия. Отдельные книги Ветхого Завета

1 [Бурханай хүн Моисейн зальбарал.]

¹ [Бурханай хүн Моисейн зальбарал.] Эзэн, Та үеһөө үедэ маанадай оршохо газар мүн.

² Хадануудай бии болохоһоо урид, газар дэлхэй болон юртэмсэ мүндэлхэһөөнь урид, эгүүриһээ эгүүри хүрэтэр Та Бурхан мүн.

³ Та хүниие һөөргэнь, шорой руу бусаажа, «Хүнэй хүбүүд, һөөргөө бусагты!» гэнэт.

⁴ Мянган жэл хадаа Танда үнгэрһэн үдэртэл гү, али һүниин нэгэ харуулай хугасаа мэтэ.

⁵ Та зониие үерэй уһандал туугаат, тэдэ нойрто абтаа. Үглөөгүүр тэдэ шэнээр ургаһан ногоон мэтэ.

⁶ Үглөө тэдэ сэсэглэжэ, шэнээр ургадаг. Үдэшэ дүтэлхэдэ, тэдэ хагдаран хатадаг.

⁷ Иигэжэ бидэ Танай уур хилэнгээр шатаагдажа, Танай уур хилэнһээ айнабди.

⁸ Та манай бурууе Өөрын урда табижа, манай нюусые Өөрын оршоһон гэрэлдэ байлгабат.

⁹ Иигэжэ манай бүхы үдэрнүүд уур хилэн дундатнай үнгэрөө. Бидэ һанаа алдаһан мэтэ он жэлнүүдээ дууһаабди.

¹⁰ Маанадай амидарха хугасаа далан жэл, хүн хүсэ шадалтай байбал, наян жэл. Гэбэшье тэдэнэй эгээл ехэнхинь зоболон, ажал соо үнгэрдэг, энэшье үнгэржэ, бидэ хиидэн ошонобди.

¹¹ Танай уур хилэнгэй хүсые хэн мэдэхэб? Танһаа айхань уур хилэндэтнай адли хүсэтэй.

¹² Үдэрнүүдээ яажа тоолохыемнай һургыт, сэсэн ухаатай байхыемнай үршөөгыт.

¹³ Эзэн, һөөргөө бусыт! Хэды болотор юм? Өөрын зарасанарые хайрлыт.

¹⁴ Маанадай бүхэли наһаараа баясан, хүхилдэн байхын тула үглөө маанадта энэрэл хайраа элбэг хайрлыт.

¹⁵ Маанадые зүдэрүүлһэн үдэрэй тоогоор, маанадай хохидол үзэһэн жэлнүүдэй тоогоор бидэниие баясуулыт.

¹⁶ Бидэндэ, Өөрын зарасанарта, Өөрын хэрэгүүдэй гайхамшагые, зарасанарайнгаа хүбүүдтэ алдар солоёо үзүүлыт!

¹⁷ Эзэн Бурханаймнай талархал маанад дээрэ байхань болтогой! Хэһэн хэрэгүүдтэмнай туһалыт, хэһэн хэрэгүүдтэмнай туһалыт!