Псалманууд 83 - Бурятский Библия. Отдельные книги Ветхого Завета

¹ [Дуун. Асаапай псалма.]

² Бурхан! Дуугүй бү байгыт! Абяагүй бү байгыт, бү бэеэ хуряагаад байгыта!

³ Юуб гэхэдэ, дайсадтнай шууяа татана, Таниие үзэн ядагшад толгойгоо үргөөд байна.

⁴ Арад түмэнэйтнай урдаһаа хорото түсэб табижа, Танда ехэ хайратай зүйлэй урдаһаа зүблэжэ байна.

⁵ Тэдэ иигэжэ хэлэнэ: «Ошоод, арадуудай дунда Израилиин нэрэшье дурдагдахаар бэшэ болотор тэдэниие усадхая».

⁶ Тэдэ хоорондоо хэлсээтэй, Танай урдаһаа хамтараа:

⁷ эдоомууд майхангуудтаа, ишмаэлидүүд, моһаабууд болон һагаарнууд;

⁸ Гэбаал, Аммоон болон Амалег, пилишт болон Тиирэй зон;

⁹ Ассири тэдэниие дэмжээ, Лоодой хүбүүдтэ тэрэ түшэгынь болоо.

¹⁰ Тэдэнтэй Мидианда үйлэдэһэндэл адли, Кишоон голой урасхалай хажууда Сисэраа болон Ябииндэ хэһэндэл шэнгеэр хандыт.

¹¹ Газарые хүрьһэжүүлэн үхэгшэ, Эн-Доорто алагдаһан зондо мэтээр,

¹² Тэдэнэй удамаршадта — Орээб болон Зээбаада, Зээбаа болон Цалмуннаадал,

¹³ «Бурханай нютагуудые эзэмдэе!» гэгшэдтэл,

¹⁴ Бурхамни! Тэдэниие хамхуул үбһэндэл, тэмээн халаахайдал адли болгыт.

¹⁵ Галай ой модо шатаадагтал, дүлэнэй хада уулые галдадагтал,

¹⁶ Өөрын шуургаар тэдэниие хамыт, Өөрын хуй һалхяар тэдэниие айлгыт.

¹⁷ Нюурыень эшхэбэреэр дүүргыт! Эзэн, тэдэ нэрыетнай бэдэрэг лэ!

¹⁸ Хэтэ мүнхэдөө эшхэбтэр аягүй байдалда ороод байг! Нэрээ хухалжа, хосорог лэ!

¹⁹ Иигэжэ тэдэ Эзэн гэдэг нэрэтэй Тал гансаараа бүхы дэлхэйн Дээдын Бурхан гэжэ мэдэг лэ!