Псалманууд 80 - Бурятский Библия. Отдельные книги Ветхого Завета

¹ [Дуунай бүлэгэй хүтэлбэрилэгшэдэ: «Хэлсээнэй сараананууд» гэдэг аялга. Асаапай псалма.]

² Иосифой зониие хонин һүрэг мэтээр адуулагша Израилиин хонишон, соносыта! Херүбүүд дээгүүр заларагша, Өөрыгөө харуулыта!

³ Эпрааимай, Бэньямиинэй болон Мэнашшээгэй урда Өөрын хүсые харуулыт, Маанадые абархаа ерыт.

⁴ Бурхан! Маанадые һөөргэнь бусаагыт! Нюуртнай гэрэлтэг, бидэ абарагдахабди!

⁵ Түмэн Сэрэгтэ Эзэн Бурхан! Өөрын арад түмэнэй зальбаралда уурлахатнай хэды болтор юм?

⁶ Та маанадые нулимсаар хооллуулжа, нулимсаар ундалуулаат.

⁷ Хүршэнэрэймнай наада энеэдэн болгоот, дайсаднай маандые баһана.

⁸ Түмэн Сэрэгтэ Бурхан! Маанадые бусаагыт! Нюуртнай гэрэлтэг, бидэ абарагдахабди.

⁹ Египедһээ Та уһан үзэмэй мүшэр асараат, бусад арадуудые үлдөөд, тэрэнээ һуулгаат.

¹⁰ Та тэрээндэ газар хүрьһэ бэлдэжэ, тэрэ һайнаар үндэһэлөө, газар нютагые дүүргээ.

¹¹ Тэрэнэй һүүдэр хадые бүрхөөгөө, мүшэрнүүдынь Бурханай хуша шэнги.

¹² Тэрэ мүшэрөө далай хүрэтэр, һалаагаа мүрэн хүрэтэр һунган татаа.

¹³ Харгыгаар ябагша бүхэн тэрээнһээ таһалхаар юундэ Та тэрэнэй хашаа эбдээбта?

¹⁴ Ойн бодон гахай тэрэниие ухан эдинэ, хээрэ талын амитан тэрэниие хазан хооллоно.

¹⁵ Түмэн Сэрэгтэ Эзэн! Хойшоо эрьеыт, тэнгэриһээ хаража, анхарыт, энэ уһан үзэмэй мүшэр харыт.

¹⁶ Өөрын гараар тариһан модоо аршалыт, Өөртөө гэжэ бата бэхи болгоһон һалаануудаа дүнгыт.

¹⁷ Тэрэ галда шатаагдааһан, сабшуулһан. Танай урда дайсад һүнэг лэ!

¹⁸ Танай гар баруун гар таладахи хүн дээрэтнай, Өөрынгөө түлөө бата болгоһон хүн дээрэтнай байха болтогой!

¹⁹ Бидэ Танһаа холо болохогүйбди. Маанадые һэргээгыт, Танай нэрэ дуудахалди!

²⁰ Түмэн Сэрэгтэ Эзэн Бурхан! Маанадые бусаагыт! Нюуртнай гэрэлтэг, бидэ абарагдахабди!