Псалманууд 75 - Бурятский Библия. Отдельные книги Ветхого Завета

¹ [Дуунай бүлэгэй хүтэлбэрилэгшэдэ: «Бү усадхыт» гэдэг аялга. Асаапай псалма. Дуун.]

² Бурхан, бидэ Танда магтаал үргэжэ байнамди, магтанамди, аманһаамнай Танай нэрэ унанагүй, Танай гайхамшагта хэрэгүүдые тунхагланабди. [Бурхан:]

³ — Би саг хугасаа тодорхойлхоб, зүб сүүд ябуулхаб.

⁴ Газар дэлхэй болон ажаһуугшадынь шэшэрэлдэн байна, харин Би һуурииень бүхэлөөб. [Хүгжэм]

⁵ Би бардамлагшадта «Бү бардамлагты» гэнэб, хорото муу зондо «хамараа бү үргэгты,

⁶ тэнгэри тулама тэдэниие бү үргэгты! Толгойгоо омог бардамаар үргэн бү дуугарагты!» гэнэб. [Псалма дуулагша:]

⁷ — Сүүд хадаа зүүн зүгһөө бэшэ, баруун тээһээшье бэшэ, сүл губиһаашье бэшэ, хада уулаһаашье бэшэ ерэдэг.

⁸ Бурхан — Шүүгшэ! Нэгые панхаруутуулжа, нүгөөдые үргэгдэг.

⁹ Эзэнэй гарта аяга байна, тэрээн соо жэмэсэй архи хөөһэрнэ. Дэлхэйн хорото муу бүхы зондо тэрэниие аягалхадань, тэдэ шабхарууень шахан ууха юм.

¹⁰ Харин би хэтэ мүнхэдөө магтаал дуулахаб, Яковой Бурханда магтаал үргэхэб! [Бурхан:]

¹¹ — Хорото муу зоной эбэрнүүдые хухалхаб, зүб шударга хүнэй эбэр дээшээ үргэгдэхэ!