Псалманууд 45 - Бурятский Библия. Отдельные книги Ветхого Завета

¹ [Дуунай бүлэгые хүтэлбэрилэгшэдэ: «Сараана» гэдэг аялга. Кораахай уг удамай ирагуу үгэнүүд, инаг дуранай дуун.]

² Гоё һайхан үгэнүүд досоомни дүүрэн байна, дуугаа хаанда зорюулнаб. Минии хэлэн шадамар зохёолшын гуурһан мэтэ.

³ Зоной дундаһаа та эгээл гоё һайханта, нигүүлэсхы үгэнүүдые хэлэдэгта. Тиимэһээ Бурхан хэтэ мүнхэдөө таниие үреэгээ.

⁴ Хүсэтэ хаан, һэлмэеэ ташаандаа зүүгты, алдар солотойт, һүр жабхалантайт.

⁵ Үнэн зүбэй, номхоной, зүб шударгын түлөө мордожо, урагшаа соёрыт! Гартнай илалта туйлахал!

⁶ Годлинуудтнай хурса, урдатнай арадууд унан һүгэдэхэл, хаанай дайсад зоригоо мохохо.

⁷ Хан шэрээтнай Бурханай шэрээ мэтэ, хэтэ мүнхэдөө оршохо. Хаанта баягтнай — зүб шударга ёһын баяг.

⁸ Үнэн зүбтэ дуратайт, муу юумэ үзэн яданат. Энээнэй түлөө Бурхан, танай Бурхан, хажуудатнай байгаа хэнииешье баярай тоһоор тоһодоогүй, харин гансал таниие тоһодон ёһолоол!

⁹ Бүхы хубсаһантнай гүгэл, зуун наһатын болон кассиягай үнэртэй. Заанай яһан ордонһоо гарагша хүбшэргэйтэ зэмэсгүүдэй хүгжэм таниие баясуулна.

¹⁰ Хаашуулай басагад танай хүреэлэнгэй дунда. Баруун гар таладатнай Опиирой эрхим алтаар шэмэглэгдэнхэй хатан зогсоно.

¹¹ Шагнаарай, охин, харан, анхаралтай соносоорой, өөрын арад түмэниие болон эсэгынгээ гэрые мартаарай.

¹² Шинии гоо һайханда хаан татагдаха, тэрэ шинии эзэн мүн, тиимэһээ тэрээндэ һүгэдэн байгаарай.

¹³ Тиир хотын зон танда бэлэг асарха, эгээл баян зон танай хайра хэшэг гуйн байха.

¹⁴ Хаанай басаган ордон соогоо сог жабхалантай, хубсаһа хунарынь алтаар шэмэглэгдэнхэй.

¹⁵ Хээтэй хубсаһа үмдэһэн тэрэниие хаанда дүтэлүүлэн асарна, тэрээнэй нүхэд басагадые хойноһоонь дахуулан хаанда абаашана.

¹⁶ Тэдэ баяр баясхалантайгаар дүтэлжэ, хаанай ордондо ороно.

¹⁷ Уг удамтнай элинсэгүүдэйнгээ һуури эзэлхэ, бүхы дэлхэйгээр удамаршадаар тэдэниие табихат.

¹⁸ Нэрыетнай үеын үедэ дурдан, һануулан байхаб. Тиимэһээ арадууд хэтэ мүнхэдөө танда магтаал үргэн байха.